Тексты
Вернуться к списку | редактировать | удалить | Создать новый | История изменений | Статистика | ? Помощь
Lazarev Ivan . Ehkoi neče mečäständy!
Lazarev Ivan
Ehkoi neče mečäständy!
карельский: ливвиковское наречие
Новописьменный ливвиковский
Elokuun
lopul algavuu vezilinduloin mečästys .Sit jälles ruaduo valmistuin minä avuamah pyvvändyaigua : keräin orožan , patronsumkan , sorzien kuvat , termosan voileibienke , fufaikan kylmändäs .Ehätyin toizele rannale da livuin pyöräl ajamah , kuni suau ajua pyöräl .Tavallizesti työndyi minule jälles susiedoin lyhytjalgu koiraine Tarzik .
Ajan pyöräl , orožu repunke selläs , tagan istuu koiraine , ymbäri meččy – hil’l’ažus , čomus , mečästandän hyvät vuotandumielet .
Ajoimmo kilometrii kaksi , ielleh ei ole putillistu troppastu , yhtelläh jallai tulou mennä , hyvä , gu järvessäh ei ole puoldutostu kilometrii .
Jätin pyörän omah sydämellizeh kohtah , ei loitton troppazes .Koiraine kerras rubei haukkumah kedälienne da lähti jälgie myöte , hyvä , gu järven čurah päi .
Kodvazen peräs kačon , tulou vastah L’oha-Mamai , muga sidä miesty kučuttih pos’olkas , a lapset sanottih Jemel’akse , sentäh gu joga vuottu pruazniekkoin aigah čuraitti lapsii regyöl päčinke .Myö hänenke lähenimmö , häi kyzyi :
– Kunnebo ?
– Mečästämäh sorzii .
– O , sie jo on vägitukku mečästäjiä , robl’oloi viritetäh , mečäständysijoi varustetah , erähät jo pajoloi pajatetah , sie jo on vessel .
Kuule vai , sanou L’oha .– Miksebo sinuu pidäy sorzii !
Täs ei loitton ylen suurel kuuzel lomeikon rinnal näin kaksi hanhie .Vo-o-ot nengozet !Yksi istuu alimazel varval , toine kuuzen keskel toizes puolespäi .
Minä vastain :
– L’oha , hanhiloil vie on aijoi lendiä suveh , vai syvyskuun lopul , ligakuun allus net lendämäh lähtietäh .Yödymäh net suoloile azetutah , konzu allot järves ollah suuret .A tavallizesti muiten heitytäh järvele loitton rannas libo suariloile .
– Ei , vastuau , – Iivan , en minä kielasta , toven kaksi hanhie näin kuuzel suolluo .
Minä , tiettäväine , en uskonuh , ga ebäilemizet hiivottih , sentäh , gu ylen uskottavasti häi sellitteli , kuvaili .Minä otin orožan , otin patronat sorzih n :o 5, täytin karjembal n :o 1.
Votgi se kohtu , kuduadu sanoi L’oha .Toven rinnal pikkarazien kuuzužienke kazvetah korgiembat ristikanzua .Ga midäbo minä näin : tottu , alahazel varval istuu ylen suuri lindu .Ga tämähäi on mečoi juurdunuh .A kus ollou toine ?Minä harpain vähäzel bokkah dai dogadiin toizen mečoin , tottu keskel puudu toizes puolespäi .
Nostaldin minä orožan , ammuin – mečoi alahazes varvaspäi pakui , a toine kohunke lendi .Minä ammuin toizes svolaspäi lendäjäh mečoih , ga se lendäy ielleh !Vai onnuako ei viuhkuta siivil , vai liidäy alah , pakkuu vie suuremban kohunke ihan lomeikkoh .
Minä uvvessah täytin orožan da sit vihjain , kui Tarziekku , kudai kuuli ammundat , juoksi kohuh da libui sinne , kunne hävii lomeikkoh mečoi .Lähenin , kačon , ga lomeikos lendäy mukitellen Tarziekku .Vikse mečoi n’okkai libo viškai jalloil .Tuli , gor’a , minulluo abevunnuh , ižändy , silitä la !
Minä sanon :
– Tarzik , mibo rodih sinunke ?Kenbo sinuu ruohti nenga kurittua ?Nu-ka , ottua händy !
Tarzik rohkevui da hakkai juostozil lomeikkoh .Minä en ehtinyh mennä sih kohtassah , kunne pakui mečoi , kui kuulen siibien kohinehen varboin keskes .
Kui liennen mennyh lähembi , kačon : Tarziekku tabai mečoin niškas da pidäy muga .Midä ruadua ?Ambuo ?Puutut koirazeh .Jätin orožan da avvutin Tarziekale ottua mečoidu loppussah .
– Vot nenga L’oha-Jemel’an avul myö Tarziekanke saimmo lyhyöh aigah kaksi mečoidu .
Minä olin ylen hyväs mieles , muga lykystäy ylen harvah .A gu Tarziekku on hyväs mieles : händy pistolietan mugah , minuh armastelehes , mečoidu näpistelöy , sulgii riuhtelou .
Nengoine tapahtui sorzien mečäständy 1980 vuozil L’ohaJemel’an avul .
Kiändi Valentina Libertsova
Ehkoi neče mečäständy!
карельский: ливвиковское наречие
Новописьменный ливвиковский
–
–
–