Тексты
Вернуться к списку
| редактировать | удалить | Создать новый
| История изменений
| Статистика
| ? Помощь
Al’ona Jegorova.
MAFUN meiden mal
Источник:
Kodima. № 8, 2009
Al’ona Jegorova
MAFUN meiden mal
вепсский
Младописьменный вепсский
Elokus 14.-15.
päiväl Petroskoiš mäni IX MAFUNan kongress.
MAFUN om venänkeline abbreviatur, kudamb znamoičeb suomalaiž-ugrilaižiden rahvahiden norišton associacijan.
Nece om sur’ rahvazkeskeine ühtenzoituz, kuna mülüb erazvuiččid suomalaiž-ugrilaižid norišton organizacijoid.
MAFUNan pätegend om abutada kaita i kehitoitta suomalaiž-ugrilaižid kelid i kul’turoid, levitada tedoid niiden polhe.
Sen täht om tehtud äi erazvuiččid azjtegoid: vastusid, ezitusid, festivalid, matkoid i muga edemba.
MAFUN om tehtud 1990.
vodel.
Siš aigaspäi kerdan kahtes vodes mäneb kongress, kuna tuleb delegatoid i kacujid suomalaiž-ugrilaižiš rahvahišpäi i organizacijoišpäi.
Nece om sur’ vastuz, kus pagištas erazvuiččiš azjoiš, tegoiš i projektoiš.
I sen ližaks voib kulištada starinoid siš, kut norišton organizacijoiden ezitajad radaba, miččid planoid i projektoid heil om, midä om tehtud, miččid problemoid om.
Muga joga organizacii voib antta toižile i sada ičeleze uzid idejoid i miččid-ni tarbhaižid nevondoid.
Täl vodel kongress oli meiden mal, Karjalan pedagogižes universitetas.
Nece om jo toine mugoine sur’ suomalaiž-ugrilaine azjtego meiden lidnas necil vodel.
Ezmäižen oli IFUSCO- noriden tedomehiden konferencii, mitte oli semendkus.
MAFUN-vastusehe ühtni delegatoid i kacujid Karjalaspäi, Mordoviaspäi Udmurtiaspäi, Komišpäi, Marii Elaspäi, Baškortostanaspäi i mugažo Hanti-Mansin i Jamalo-Nenecan okrugoišpäi, Tverin oblastišpäi, Permin röunaspäi, Moskvaspäi i Piterišpäi.
Kongressan kahtes päiväs om tehtud äi radod.
Radoi koume sekcijad:
1.
Suomalaiž-ugrilaižed tedoresursad; 2.
Suomalaiž-ugrilaižen norišton rad; etnokul’turine turism; 3.
Nor’ suomalaiž-ugrilaine kanz.
Suomalaiž-ugrilaižen norišton ičetundmuz.
Kel’.
Openduz..
Joga sekcijas nored mehed ezitiba dokladoid, starinoičiba erazvuiččiden projektoiden polhe da sid’ lodaižiba neniš projektoiš da erasiš jügedusiš.
Kaikuččes sekcijas i mugažo päištundoiden aigan radoi specialistoid-ki: juristoid, politikoid, tedomehid i toižid, ked abutiba, ku sündui mitte-ni jüged ridaküzund.
”Vepsän vezad” – norišton organizacijan ühtnikad tegiba kaks’ dokladad.
Ezmäižen pidi ičeze ezitusen Julija Naumova.
Hänen doklad oli vepsän kalendarin polhe, mitte oli paindud täl kevädel.
Julja oli necen projektan pämez’ i nügüd’ starinoiči sen polhe.
Toižen dokladan tegiba Petroskoin universitetan 5.
voz’kursan üläopenikad Galina
Baburova i minä, necen kirjutesen tegii.
Mö starinoičim vepsläižiš kel’laregiš, kudambad radoiba täl kezal Šoutjärves, Vidlas i Kujas.
Mugoižed lagerid om lujas tarbhaine azj, mitte abutab kehitoitta lapsil armastust i melentartust vepsän kel’he i kul’turaha, no om žal’, miše Karjalan openduzministerstvas ei kackoi sihe i ei abutagoi tehta nenid lagerid, ei antkoi dengoid sen täht, i sikš joga voz’ lageriden tegemine rippub erazvuiččiden organizacijoiden abuspäi da grantoišpäi.
Voib olda MAFUN kut-se voib abutada siš küzundas.
Sekcijoiden lizaks päištundoiš MAFUNan valdmehišt starinoiči, midä om tehtud associacijal kahtes vodes.
Mugažo pagištihe kohetud MAFUNan ustavas i kongressan reglamentas, om valitud uz’ valdmehišt kahteks vodeks.
Om lujas arvokast, miše udeks MAFUNan pämeheks tuli Aleksei Cikarev, ”Nuori Karjala”-organizacijan ühtnik.
Se znamoičeb, miše edembaine associacijan rad äjal rippuškandeb mehespäi, kudamb om meiden Karjalan malpäi.
Voib olda, se abutab kut-se karjalaižile i vepsläižile.
Kongressan aigan associacijaha om ottud uzid-ki suomalaiž-ugrilaižen norišton organizacijoid Piterišpäi, Moskvaspäi i Karjalaspäi.
Nece azj ozutab, miše MAFUNan vägi kazvab suomalaiž-ugrilaižes mirus.
Om pättud erased toižed-ki küzundad, kudambad koskeba MAFUNan radod, i om mugažo märitud erasid pätegendoid i päpolid, kut associacijale pidab rata edemba.
Om pättud mugažo, miše vodel 2011 X MAFUNan kongress linneb Saranskas, Mordovian pälidnas, a uden valdmehišton ezmäine ištund linneb kül’mkus Joškal-Ola –lidnas.