Тексты
Вернуться к списку | редактировать | удалить | Создать новый | История изменений | Статистика | ? Помощь
Larisa Smolina. Kuldaižed käded (Vepsläine mastar’ Vehkojaspäi)
Larisa Smolina
Kuldaižed käded (Vepsläine mastar’ Vehkojaspäi)
вепсский
Младописьменный вепсский
Vepsän
rahvahan keskes sanutas erašti : ”Vepsläine mužik om sündunu kirvez vös ”.I nece om tozi .Ved’ kut äi mastarid om nügüd’ vepsän rahvahan keskes , kudamibad iče sauvoba pertin da iče čomenzoitaba-ki sen .A erased tegeba eskai mugoižid čomid tehmusid , miše ku ed osta , ka ed löuda-ki mugošt ni ühtes laukas .
Vepsläine mastar’ , kudamban polhe minä tahtoižin starinoita ičein kirjuteses , om pohjoižvepsläižes küläspäi – Vehkojaspäi .Hänen nimi Ivan F’odorovič Rastvorov .Iče Ivan F’odorovič om vepsläine .Hänen jured oma Änižröunan agjaspäi Vehkoi-küläspäi .Ivan F’odorovič oli lujas hätken vehkolaižen školan opendajan , vedi lapsil käzitön urokoid .A konz vaiše oli joudajad aigad , ka kaikuččen kerdan jokseli mecha , miše kerata miččid-ni meckaluid da tehta niišpäi čomid tehmusid .A völ Ivan F’odorovič om lujas hüvä mecnik da kalanik .
Todesine mecnik
Kävelta mecha Ivan F’odorovič zavodi ani penespäi .Ezmäks openzi mecan peitusid , primetoid da veroid , jäl’ges – mectamaha .Ičeze armhan azjan polhe Ivan F’odorovič johtutab : “Kävuda mecha minä zavodin ani lapsen .A openzi mindai minun d’ad’ Aleksei Polikarpovič .Hän starinoiči minei , pidab zverile kävuda da kut niid sada .Minä muštan , miše kerdan sain nädan , iče en voinu puhtastada , ka d’ad’ale toin .Hän heiti nahkan , ozuti minei kaiken .A jäl’ges minä iče jo hargnin kaiken tehta .Iče zavodin mecha kävelta .Olen ambnu kaks’ kondjad , olen riknu lujas äi händikahid , reboid , losid , a kuverz’ olen sanu tedrid da meclinduižid , ka ei voi lugeda-ki .
Mecastusen polhe Ivan F’odorovič tedab äjan i voib äjan starinoita .Muštan , konz mö muloižel kezal vaumičim vepsläižen fil’man ( ”Živatad vepsläižiden elos ”), ka tulim hänennoks , i videokamer oli kerdal , a ak sanub meile : ”Ivan F’odorovič läžub nügüd’ .Tervhuz’ om paha , verenpainuz om korged , päd punotab , a sil’mäd ei nähkoi nimidä .
Mö tulim lujas pahaze mel’he , sikš miše meil ei lähtnuiži nimidä necidä meheta .No konz Ivan F’odorovič kulišti vaiše , miše mö tahtoim pagištoitta händast mecastusen polhe , ka nouzi sid’-žo , sil’mäd zavodiba hoštta , väged ližadui , a jaugad iče joksiba irdale .Mö kacuim hänen päle i em voinugoi uskta , miše pol’ časud tagaze Ivan F’odorovič läžui .
Kuldaižed käded
Ivan F’odorovič navedi kävelta mecha ei vaiše mectamaha , no keradamha meckaluid-ki .Hänen sil’mäd ei jätnugoi homaičemata ni üht melentartušt pud , kapad , nimittušt pupahkad ili meckalud .Voib olda toine mez’ mäniži neniš kaluiš siriči , a Ivan F’odorovič toi niid kodihe i tegi mugoižid čomid tehmusid , miččid ed nagišta ni ühtes laukas .
A ved’ tehta niid - ei ole kebn azj i lühüd process .No Ivan F’odorovič ei žalleičend ni aigad , ni väged : ”Kut vaiše nägištan mugoižid hüvid koivuižid kapoid da griboid , ka otan niid da ton kodihe .Kodiš ligotan vedhe .Pidan vedes sutkad , kaks’ , koume i nel’l’ , miše ei satatada nenid kaluid .Ka kor’-ki lähteb paremba .A miše toižes polespäi mugažo čomin tehta , ka otan malatan da parembzoitan vähäižen .Eskai laučan kodiš olen tehnu , miše oliži mugoine hüvä aluz radon täht .Necil kaiken tegen-ki .
Korktoid i madaloid mal’l’oid , tohusiden pidimid , erazvuiččid puižid živatoid , venehid i äi tošt Ivan F’odorovič om tehnu ičeze kuldaižil käzil .Hänen suren abunikan kaiken aigan om olnu ak Vera Ivanovna .Ved’ edel sidä , miše tehta miččen-se tehmusen , Ivan F’odorovič tegi pirdatesid , ozuti niid akale i varasti , midä ak sanub , om-ik mel’he hänele mužikan idei .
Ivan F’odorovič paneb lujas äi väged , aigad da armastust kaikuččehe ičeze tehmusehe .Ni üks’ hänen tehmuz ei nahodi toižehe .Kaikutte om erilaine i čoma ičeze kartte .Om melentartušt , miše kaikuččen tehmusen polhe Ivan F’odorovič starinoičeb lujas lämäs , armastusenke südäimes : “Minä kävelin mecha , kaikuččen kerdan kandišeskelin sumkas pilan .Ühten kerdan nägištin čoman pun , se oli koume metrad ülähäks .Nägen , miše gad ili udav lähteb necišpäi .Olen veretanu necen pun , pilin sigäpäi palaižen , a jäl’ges tegin udavan .Lujas mel’he minei om nece udav .
Minai om völ lujas armaz živataine - nece neglik .Kaiken hänele olen tehnu - lapaižed , künded , sil’mäd , usaižed , karvaižed .Kacud hänehe , ka kuti todesine neglik om .Om minai tehtud völ senid čomid .Ühten kerdan mužikad minunnoks tul’dhe , a sened-se stolal venuba .Üks’ minai küzub-ki , Ivan F’odorovič , sinä oled jo senid keranu , ka om-ik äi niid mecas ?
Ivan F’odorovič om todesine mastar’ .Hänen käded oma vaumhed nügüd’-ki tehta midä-ni , no sil’mäd ei nähkoi nimidä .Kaiken , midä hän voi , Ivan F’odorovič om andnu ičeze vunukoile .Hän tegi eskai openduzkursid kodiš i lapseb tuleskeliba .Hö kacuiba da openzihe hüviš meliš .
A ved’ opetas Ivan F’odorovičal om mihe !Konz tuled hänen pert’he , ka kaiken aigan vaiše čududeletoi .Hän iče sauvoi pertin , tegi sen katusen , iknad , tegi kaik škapad , paličad , laučad , stolad , eskai magaduzsijan-ki .Hän sauvoi kül’betin , radhonusen , eskai kaikid haravoid , vitakehid , kirvezvarzid tegi ičeze kuldaižil käzil .
Om vepsläižiden keskes ičeze čomid mastarid i üks’ heišpäi om Ivan F’odorovič Rastvorov Vehkojaspäi !”Kodima ”-lehtesen kal’t minä tahtoižin toivotada Ivan F’odorovičale vahvad tervhut , väged da pit’kid elon vozid !
Kuldaižed käded (Vepsläine mastar’ Vehkojaspäi)
вепсский
Младописьменный вепсский