Тексты
Вернуться к списку | редактировать | удалить | Создать новый | История изменений | Статистика | ? Помощь
Heini Rostkova. Praznik vihman al: Šoutjärves mäni Külän päiv
Heini Rostkova
Praznik vihman al: Šoutjärves mäni Külän päiv
вепсский
Младописьменный вепсский
11. elokud
vanh vepsläine Šoutjärv’-külä kerazi adivoid praznikale .
Ezmäi tervhensanoidenke ezini Änižröunan administracijan pämez’ Grigorii Šemet .Hän ozateli külän eläjid praznikanke da lahjoiči kitändkirjeižed ristituile , kudambad tegiba suren panendan Šoutjärv’külän kehitoitandaha .Mugažo Šoutjärven eländtahon administracijan pämez’ Irina Safonova andoi kitändkirjeižed "Keradam da kaičem " -tradicionaližiden käzitöiden mastariden sebrale da volont’oroile "ZOV Karel’skie seti " -organizacijaspäi abus specialižen voinoperacijan soldatoile .
– Meiden küläs eläba hüväd ristitud , kudambad radaba kodiman hüvüdeks , – sanui Irina Safonova .
Külän päiväle Šoutjärvehe tuliba artistad Voznesenje-küläspäi : "Änižen zor’ad " -kollektiv , "Fejeria " -lapsiden kargsebr , "Seičeme notad " -vokal’ansambl’ da "Samobitnie "-sebr Petroskoišpäi .Kollektivad eziniba scenal , mitte om külän keskes läz administracijan pertid .Praznikale tuliba rauhad da aigvoččed ristitud , norišt da lapsed .
Ezitusiden keskes artistad taričiba praznikan ühtnikoile kargaita ühtes heidenke .
– Minä olen pajatanu da kargaidanu penespäi . Nügüd’ minei om 80 vot , i surel tahtol ühtnin tämbei karguihe .Minun mužik om vepsläine .Šoutjärves om hänen heimolaižiden pert’ , tuleskelem tänna kezal .Tedištin , miše küläs linneb praznik .Tulin kacmaha , kut tägä iloiteldas , – starinoiči Nina Žerebcova Petroskoišpäi .
Paiči artistoid praznikale tuliba Karjalan mastarid .Hö toiba möndaks erazvuiččid käzitehmusid .Praznikan keskes vihmuškanzi , no se ei küksend ristituid .Ilo jatkui vihman al .
– Olen sündunu Šoutjärves , tägä kazvoin , lopin školan . Nügüd’ elän Petroskoiš , no tuleskelen kaikile vepsläižile praznikoile .Tämbei sä tahtoi telustada meile , no sille ei ozastund – praznik läksi čoma !– starinoiči L’udmila Mosenzova .
Kanman Külän päiväd , 10.elokud , Šoutjärves mäniba mugažo lendmäčvandon , jaugmäčvändon , pionermäčvändon da armrestlingan sportvoibištelendad .Niihe ühtniba külän pened da aigvoččed eläjad .
Praznik-žo lopihe ehtdiskotekal .
Praznik vihman al: Šoutjärves mäni Külän päiv
вепсский
Младописьменный вепсский