Тексты
Вернуться к списку | редактировать | удалить | Создать новый | Статистика | ? Помощь
Nadežda Mičurova. Tahtahalas seizou pieni časounaine
Nadežda Mičurova
Tahtahalas seizou pieni časounaine
карельский: ливвиковское наречие
Новописьменный ливвиковский
Ammuzis
aijoispäi pravosluavnoin Ven’an dorogoil pystytettih kumardusristoi da nostettih časounoi , gu siiriči ajai libo menii voinnus kumarduo da moliekseh Jumalal .
Časounat oldih piälimäzet rakendukset kylis .Niilöi nostettih rossoih paikallizel kalmužinmual libo kodiloin välih .Yksi moizis časounois , kudamal on Kolmekäzizen Jumaldoman obrazan nimi , on säilynyh Anuksen piirin Tahtahalan hierus .Se seizou-kokottau Anuksen joven korgiel rannal säilyttäjen mustuo endizis aijoispäi .Rahvas ainos käydih sih časounah molimahes Jumalal da pakiččemah abuu Jumaldomas .Vie tässähgi siiriči menijät , tulolazetgi azetutah časounan luo da ristitäh silmii .Ijän kaiken hierun pruazniekannu Emiänpäivänny rahvas enzikse mendih časounazeh virittämäh tuohuksii , äski sit pajatettih , pläšittih da juodih čuajuu .
Uskon kohtu
Jumaldoman kunnivokse nostettu časounu Tahtahalan hierus on srojittu kuito XIX vuozisuan lopus – XX vuozisuan allus .Tarkua tieduo sih näh ei ole .Dokumentua , kuduat kuvattas sillozen aijan Anuksen muan časounoi , on säilynyh ylen vähä .Uspen’n’an kirikön pappi Viktor (Kolesnikov ) oli sidä mieldy , gu časounu nostettih XIX vuozisuan puolivälis .Kuigi Uspen’n’an kirikkö , se on obšivoittu hoikil lavvoil .Časounua nostajes käytettih tavottuloi nuagloi (vikse oli seppy hierus ).Ken nosti tämän časounan – niken ei tiijä .Ennevahnas časounoi nostettih jiäksindän mugah .Vikse oli moine ristikanzu hierus , kudai jiäksiheze Jumalale nostua časounu , toinah pahas voimattomuos piästämizekse .
Časounan piälimäine obrazu
Tahtahalan hierun časounan piälimäine obrazu on Kolmekäzine Jumaldom .Sanotah , gu tämä obrazu oli mualattu XVIII vuozisuan allus .Se oli uskovalazien vuardamizen aigu .Ristikanzannu , kudai nouzi pravosluavnoin uskon pengojien da obrazoin hävittäjien vastah , oli Ioann Damaskin .Häi oli Damask-linnan piälikönny da Siirien kalifan nevvonandajannu .Sil aigua Konstantinopol’an halliččijannu oli Lev III , kudai ylen äijäl vihai obrazoin kunnivoiččijoi .Imperuatoru piätti kirjuttua vihakirjazen kalifua vastah da pani sil prepodobnoin Damaskinan allekirjutuksen .Kalif andoi käskyn leikata Ioannal oigien käin da riputtua sen linnan lagevol , gu toizet kačottas da varattas .Ehtäl kivus muokkavunnuh Ioann Damaskin pakičči kalifua andua hänel järilleh oman käin havvattavakse .Halliččii andoi Ioannal hänen kain .Leikatun käin suaduu Ioann pani sen niveldy vaste , heityi polvile Jumaldoman obrazan edeh da rubei pokoroiččijen molimahes Jumaldomale kibulois piästämizekse .Hänen usko , gu Jumaldom avvuttau , oli moine suuri , ga hänel ei olluh ni mieles duumaija toizin .Ioann uskaldi , gu tuou hyödyy pravosluavnoile uskole .Malittuu panduu häi uinoi .Unis hänel ozuttihes Pyhä Jumaldom .Häi sanoi , gu piästi Ioannua kibulois da mustoitti hänen jiäksindysanat .Konzu Ioann Damaskin havačui , hänen käzi oli uvvessah terveh , buito igänäh sidä ei koskiettu .Ioann oli muga äijäl kiitolline Jumaldomal , ga kai luadi hobjukäin hänen kunnivokse da pani sen obrazua vaste .Sendähgi tänäpäi pyhiä obrazua sanotah "Trojeručnitsa ".Čuvvon viesti meni kalifassah .Häi puašitti Damaskinua tulemah järilleh omale ruadopaikale , ga Ioann kieldavyi .Häi jagoi kai omat jen’gat da omažus köyhile da meni elämäh kuundelijannu Pyhitetyn Savvan lavrah .Keräl häi otti Jumaldoman obrazan , kudai tänäpäigi on lavras jo viizi sadua vuottu .Vuvvennu 1661 obrazan koupii oli vietty Moskovah , jälles se levii kogo Ven’ale .
Čuvvonluadii Jumaldoman obrazu
Kolmekäzizen Jumaldoman obrazu on čuvvonluadii .Sil on kuvattu kui Jumaldom sebiäy yhtel käil mladenčua , toizel ozuttau tulieh muailman piästäjäh Spussah päi .Obrazan alapuoles on vie yksi käzi , kudai ei ole Jumaldoman .Kui oli jo mainittu , se on lahju Ioann Damaskinaspäi Jumaldoman čuvvonluajindan kunnivokse .Se buitogu puolistau meidy kaikkii pahas .
Algajen XIV vuozisuas muinaine Kolmekäzizen Jumaldoman obrazu on Afonal , Hilandar-nimizes serbilazes manasteris .Sadoi vuozii "Hilandaras " ei olluh igumenua .Manuahat uskottih , gu manasterin elostu ohjuau iče Jumaldom .Jygielöin kyzymyksien sellitettäväkse hyö malittuloinke kiännyttih hänen puoleh kyzyjen abuu .Tänäpäigi rahvas suajah čuvvonabuu Jumaldomaspäi .Ven’an kirikkölöis suau nähtä Kolmekäzizen Jumaldoman obrazan koupieloi , kudamat mualattih Afonan manuahat .Yksi obrazois oli mualattu XVII vuozisual patriarhu Nikonah niškoi .Se nygöi on ruokos Moskovan Danilovskois manasteris .Kolmekäzizen Jumaldoman obrazua on Jekaterinburgan , Černigovan da toizis Ven’an muan linnoin manasterilois .Jumaldomale pannah malittuu omahizien tervehyös da jygies voimattomuos piästämizekse .Häi ylen äijäl avvuttau niilöi , kenel voimattomuon periä ollah pahat jallat da käit .
Tahtahalas seizou pieni časounaine
карельский: ливвиковское наречие
Новописьменный ливвиковский