Тексты
Вернуться к списку | редактировать | удалить | Создать новый | История изменений | Статистика | ? Помощь
Jelena Filina. Ičtain ecind vai Kuz’mičan starinad
Jelena Filina
Ičtain ecind vai Kuz’mičan starinad
вепсский
Младописьменный вепсский
Kaik
ted konz-ni lopiše .Üksjaine te , miččel ei ole lopud , nece om te ičhein vai ičtain ecind .Teravas mänii aig om meiden opendai , erašti se voib vajehtada meid muga , miše om jüged tundištada .Ei kerdalaz mö tedištam ičemoi polhe sidä , midä mö eskai em tednugoi-ki .Pahad vai hüväd .I erašti paha da hüvä mäneba rindati .I necidä mugažo pidab el’geta .Kodvdusiden da kadotusiden abul mö zavodim erigoitta , kus om tozi , a kus – kelastuz .Elos om äi erazvuiččid jügedusid i konz mö proidum päliči niiš , vajehtase meiden taba-ki .I ühtes senke kazvab meiden heng , se tegese pehmdembaks .
Mäneb aig i mö tegemoiš melekahambikš . Nece om ülembaine lahj , mitte om tehtud meiden iškendoišpäi da satusišpäi , mitte om vahvištoittud uskondal ülembaižehe oiktudehe .Mö kaik mänem da mänem , i niken rohktas ei voi sanuda , miše tedišti ičtamoi täuzin .Muga pidab-ki olda .Jüged om löuta ičtain , i proitta se elonte pidab vaiše ičelein .No ei kaikutte ristit voib necidä tehta .
Erašti meile oigetas ülähänpäi melevid mehid , kudambad , kuti männuden aigan kaičijad , kaičeba kal’hid johtutesid .Nece om meile anttud , miše mö em tehnuižigoi tozižid vigoid ,miše elonte ičhemoi ei olnuiži mugoižen jügedan .Algat holdugoi , ku völ ei vasttanugoi mugošt mest ičetoi elontel .Mugoine mez’ om kaikuččen ristitun elos .Voib olda , tö völ et el’gendanugoi , miše ken-se pagižeb teidenke ei muite ,miše hänel om teiden täht nevond vai südäinsana .Kackat tarkemba , kundelgat .Voib olda , nece om leibänpaštamon möi vai taksin vedäi .
Minai oli ningoine vastuz .Kuzmičanke minä tundištimoi siloi , konz keza äjak-se päiväks tuleskeleb sügüzel .Rahvahas nece aig nimitadas jäl’gkezaks .Čoma aig om , sanun teile .Sidä voib rindatada vaiše Venäman aigvoččiden naižiden čomudenke .Päiväine prostides tervehtab pun lehtesid , laskav döl puhub kuldaižiden vahtariden kupoloihe .I maihutaba pajatajad pud siričimänijoile hahkhibusižile čomile naižile ičeze kuldaižil kämnil ,kuti kidastaba : "Tervhen , čomad naižed !Teiden täht keza pördihe !"Lendaba semned kut kirjeižed , en teda , ken oli oigetanu niid .Lendaba , kuti johtutaba siš , miše pidab ehtta peitta kezad ičeze muhus ,miše tal’vel jagadas sil kal’hiden ristituidenke .Kut voib ištta kodiš mugoižil lämil päivil !
Kerdan minä-ki ajoin podruškannoks Borha , penehe küläižehe .Pätin mända senihe da babukoihe .Podrušk läžeganzi i minei pidi mända mecha häneta .Minä meletin , miše hüvin tedan sijad , kuna pidi mända .Kävelin pedajiden keskes i segoin .Ozaks , minei vastha tuli vahv 84-vozne uk i abuti minei .Hän oli kuti ukoine-mechine , kudamb abuti minei lähtta mecaspäi .
– Ala varaida mindai , neižne . Tägalaine olen minä ,Vasilii Kuz’mič , – čoman muhunke sanui ukoine .– Segoid-ik , kasatk ? Nu lähtkam , kahten veslemb linneb .
Vasilii Kuz’mič om vepsläine tatan polespäi .Hüvä ižand , radonnavedii .Mugoižiš ristituiš endevanhoiš aigoiš pagištihe – hänel kaik lähteb käzišpäi .Mahtab Kuz’mič naižiden radoid-ki tehta : pesta sobid , panda varha marjoid , paštta kürzid .A ku küläs om kirjoiden navedii , ka hänele edahan om Kuz’mičahasai .Konz hänel om hot’ vähäine joudajad aigad , hän kaiken lugeb .Kuz’mič lujas äjan lugeb , hän völ nägeb hüvin tähasai .
– En olend kacnu verhiden naižiden polehe , – sel’genzoitab uk i nagrab .
Kundelta Kuz’mičad voib hätken .Ičeze paginaha hän otab kut posadan sanoid , muga literaturižid-ki .Kaikuččen kerdan čududelimoi , kut jagase hän ičeze johtutesil .Kuti puzuižespäi sab hän peittud lahjan – ičeze muštvirgoid .Äjak om niid neciš päs da ukon südäimes , äjak om modoid da elo-ozoid peittud hänen päs – ei sa lugeda-ki .
Kuz’mič eskai ei teda , miše minä olen hüvätunduine hänele meiden lämiš paginoiš .Neniš voziš , kut mö sebrastam hänenke , äjak kal’hid nevondoid minä kulištin , äjak kacegid eloho olen vajehtanu , ei sa lugeda .Minä zavodin kacta eloho toižin i ezmäi kaiked Kuz’mičan starinoiden taguiči ,miččiš hän starinoiči toižiden ristituiden elo-ozoiš da ičeze polhe .Kenen täht minä olen kirjutanu niid ?Teiden täht .
Ičtain ecind vai Kuz’mičan starinad
вепсский
Младописьменный вепсский