Тексты
Вернуться к списку | редактировать | удалить | Создать новый | История изменений | Статистика | ? Помощь
Lujendamah karjalan kieldy Koivuselgäh
Lujendamah karjalan kieldy Koivuselgäh
карельский: ливвиковское наречие
Новописьменный ливвиковский
Pieni
karjalaine Koivusellän kylä kuuluu Vieljärven paikkukundah .Talvizin sie eläy vähembi sadaččuu eläjiä .
Piälpäi kaččojen hil’l’aine elaigu lekahtihes mennyön vuvven aigah .Rahvas iče piätettih muuttua se parembah päi .Muijien ruadoloin ližäkse havahtettihes opastumah karjalan kieleh .Kaččomattah sih , ku pos’olkan suuri vuitti rahvastu on karjalastu , kieli on unohtumas jo ruavahiengi keskses .Koivusellän piälimäine kieli nägyväh on jo ven’an kieli .
Enzimäine karjalankieline vastavundukerdu piettih pyhänpiän 23. kevätkuudu muga sanotus kul’tuurutalois .Tädä taloidu meinatah kohendua ičeväil .
Koivusellän meččypos’olku on Vieljärvespäi päivylaskupuoleh kolmenkymmenen kilometrin piäs – pala federuallistu dorogua da toine pala meččydorogua , kudai on hyväs kunnos rospuututtomal aijal .Dorogan luaduu pidäy silmäl kylän nuori deputuattu Kristina Dmitrijeva , kudai kurittau kaiken talven mečänvedäjii .Virgah tulduu neidine rubei oppimah kohendamah koivuselgäläzien elaigua .Enzimäzikse , pani heidy yhteh sobuh , rubei keriämäh pidoloih da paginoih .Ku olis kunne kerdyö da paista , rahvas piätettih kohendua pos’olkan ainavo kädeh pättävy taloi – endine lapsienkodi , kudai ei rua jo läs kahtukymmendy vuottu .Se ei ole leyhkettäväs kunnos , ga lahot levo da seinät ollah .Uudeh levoh niškoi suadih jen’gukannatustu Priäžän piirin kukkarospäi , kaikkii toizii kohendusruadoloi ruvetah pidämäh ičeväil , alletah kevätčural .Iče Koivusellän eläjät da nämmih kohtih rovivunnuot rahvas kerätäh varua sih niškoih .
Ezi-ižien kielen mustoitandu da opastundu tuli piäh ruvettuu kerävymäh yhteh .Rahvas iče jo ellendetäh , ku se on pošti unohtettu .Pagizendas vie erähät paistah , ga sanat piäs muututah jo ven’alazikse .Opastajakse kučuttih kieliaktivistu Vieljärvelpäi Natalja Antonova .Meinatah kerävyö kerran kuus pyhinpäivin .Natalja sanelou :
– Minä hyväl mielel menin myödäh .Mennyt pyhänpiän ajelin enzimästy kerdua .Ruan sen minun vahnembien mustokse , kuduat nuorete ruattih meččiä da elettih Koivuselläl .Tuatto on nämmih kohtih rodivunnuhgi – Kudžoin pieneh kyläzeh da kazvoi Ruokoskes , se on kuuzi kilometrii välii Koivuselläspäi .Tänne tulduu kerras näin , ku rahvas keskenäh jo kaikin paistah ven’akse .Kieliymbäristyö pošti jo ei ole .Äijät ket vie ellendetäh , ga paistah jo valehembah .Joukos vai nelli hengie maltoi paista hyvin , dostalit piädy vai n’utkutetah libo yhtel-kahtel sanal maltetah vastata karjalankielizih kyzymyksih .Yksikai on ylen hyvä mieli , rahvas rounu havačuttih da ruvettih kalleksimah muamankieldy .Enzimäzel urokal nevvoin karjalankielizet kirjaimet , opastuimmo lugemah da kirjuttamah , tuttavuimmo , opastuimmo tervehtysvirkehih , erähii jogapäiväzii sanondoi , vähäzen verbilöi , numerualoi , kuuloin nimii , pajatimmo .Jiäs vai tämä tahto koivuselgäläzile hätkembäkse .
– Tulin kielikursiloile mustoittamah omua kieldy . Kuda-midä ellendän , ga paista jo ni vouse en voi .Konzu kyzyn omii pagizemah minunke karjalakse , ga heil joga toine sana puuttuu sanuo ven’akse .En tiedänyh , ku karjalakse voibi kirjuttua .Net tänäpäi jygiettäväh andavuttih .Ga muite vessel oli , piä on täyzi kaikkie uuttu , sanou Koivusellän eläi Iivan Dmitrijev .
Lujendamah karjalan kieldy Koivuselgäh
карельский: ливвиковское наречие
Новописьменный ливвиковский
–