Тексты
Вернуться к списку | редактировать | удалить | Создать новый | История изменений | Статистика | ? Помощь
Sberbank Online
Sberbank Online
карельский: ливвиковское наречие
Новописьменный ливвиковский
Sberbank Online on
Sberbankan verkopalvelus , kudai avvuttau klijentoile todevuttua läs kaikkii toimindoi , kudamii tariččou banku omis toimistolois , online - da offline -ruadotavas .
Vuvven 2023 mennes Sberbank Online on suadavis App Stores nimel ven . "Сбол ".
Histourii
Enziallus onlinebanku rubei ruadamah sulakuul vuvvennu 2008 kui palvelus siästökirjoin halliččemizekse nimel "Sähkösberkassu " (ven . "Электронная Сберкасса ").
Vuvvennu 2009 "Sähkösberkassu " sai kartoin ja čottien halliččemizen toimindat persounallizen čotan kauti da sen nimekse tuli Sberbank Online .
Kylmykuul vuvvennu 2012 Sberbank Online uvvistettih , sen jälles sai avata metallučottii Internetas , kudamih pannah dengoi ei rublis , a kallehet metallat grammois , dai luajittih kebjiembäkse kirjanpidosistiemu , kudai rajoittau dengusiirdoloi suutkien aloh .Muutui sežo piäzy sovitukseh — nygöi tarvittih vaiku 5-merkine koudu .
Vuvvennu 2013 sovituksel enzikerdua oli 1 miljonua käyttäjiä , a Sberbank Onlinen reitingu App Stores kazvoi 2,4 tiähtes 4,5 tiähtessäh .
Vuvvennu 2015 sovitukseh ližättih persounallizet tervehtykset da nelli "eläviä " näyttösiästäjiä , kuduat muututtih suutkien aijas rippujen .Jälles sovitukses sai ozuttua nimi , kudamal sistiemu kiändyy klijentan puoleh , sežo sijoittua omii fotokuvii näyttösiästäjäh .Samannu vuon sovitukses otettih käyttöh adressikniigan ozuttamistu .Nenga siirdiä dengoi telefonan noumeran mugah rodih kebjiembi — moizien toimindoin lugu ruttoh kazvoi .
Vuvvennu 2017 Sberbank Online rodih enzimäzekse onlinebankakse , kudai sovitti oman palveluksen sogieloih rahvahih niškoi — rodih "diktoru " sovitukses , kudai iänitti toimindoi .
Vuvvennu 2019 sovituksel oli läs 50 miljonua käyttäjiä .Samannu vuon algavui suuri uvvistus .Enne kaikkie muutui dizainu : rodih vähembi vihandua värii , roittih uvvet näyttösiästäjät , niilöin joukos kuvat nähtävyksienke .Muututtih ilmoitukset iPhones , ku käyttäi suas eroittua bankan viestilöi .Muututtih funksiet da palvelukset : neuroverkot da älykkähät algoritmat analiziiruijah käyttäjän ičenviendiä da harjavutah sih andajen toimindoin eri variantoi .Sidä paiči piänäytöl roittih interfeisumerkit , kudamat suatetah ruttoh toimindah : ezimerkikse , dengoin siirdämizeh kontaktale .
Vuvven 2019 syvyskuukse päiväl käyttäjiä oli 20 miljonua hengie , a kuus oli enämbi 50 miljonua .
Vuvvennu 2020 Sberbank Onlinen webversien käyttäjiä oli 10 miljonua hengie , niilöin joukos viizi miljonua aktiivistu käyttäjiä .Sinävuon sovitukses oli suadavis enämbi 140 palvelustu , mi avvutti klijentoile suaja läs kaikkii palveluloi , kudamii tariččou Sberbanku toimistolois , online-formuatas .
Vuvvennu 2021 sovitustu joga päiviä käytti läs 32 miljonua klijentua , a kuus aktiivizii käyttäjii oli enämbi 65 miljonua hengie .Ližäkse kaheksa miljonua hengie vie käytettih Sberbank Onlinen webversiedy .Nenga sovitus rodih tallendettuvimii Ven'al .
12. sulakuudu vuvvennu 2022 Sberbank Online -sovitus otettih iäre App Storespäi , а 13. sulakuudu — Google Playspäi . Iäreotandan syynny oli Sberbankan liitändy Amierikan Yhtysvaldoin sankciiluvetteluh .
16. elokuudu vuvvennu 2022 App Storeh rodih ven . "Сбол "-sovitus . Sovituksen kauti suau todevuttua samoi bankutoimindoi , kui vahnas Sberbank Online -sovitukses .Pidäy panna merkile se , ku sovituksen kehittäjänny ei olluh Sberbanku , a ven . ООО "Открытые ИТ-решения ".Jälles se sežo otettih iäre App Storespäi .
10. ligakuudu vuvvennu 2022 App Storeh uvvessah rodih ven . "Сбол "-sovitus , samanjyttyine alguperäzen sovituksenke , sen kehittäjänny oli "LLC Open Information Solutions " (с angl . — "ООО "Открытые информационные решения ""). Ga sil kerduagi sovitus lukittih .
Vuvven 2023 allus Sberbanku ilmoitti , ku luadi oman ohjelmiston Sbol-sovituksen azetandah nähte .Sovitus suau tallendua bankan toimistoh kiänyttyy .
Kolmanden kerran sovitus rodih App Stores sulakuul vuvvennu 2023.Ga kižalaukan ečon kauti sidä ei sua löydiä — azettua se voibi suorua linkua myöte , kudaman Sberbanku työndi omile käyttäjile viestilöis .Moine sovitus voibi löydiä kehittäjän mugah : "Open Digital Solutions ".
Sulakuul vuvvennu 2023 sovitukses rodih palvelus "Valua benziniä mašinah ", ku suas maksua poltoainehes mašinas olles , se oli yksittyzien da laitoksien klijentoin suadavis .
Vuvven 2023 syvyskuukse Urualal sovituksen käyttäjien lugu oli enämbi kaheksua miljonua hengie — hyö pietäh läs 86% kaikkii maksoloi Sberbank Onlinen kauti .
Toimindat
Piäzy sovitukseh
Enziallus sovitukseh sai piästä käyttäjen käyttäjäntunnustu da peittosanua .Ga vuvvennu 2012 palvelus kebjendi tämän toimindan da nenga rodih 5-merkine koudu piäzendäh nähte .
Vuvvennu 2014 Sberbank Online ližäi tunnustandan sormien jälgilöi myöte — se rodih mahtonalaine , konzu Apple otti käyttöh Touch ID -kannatuksen .
Vuvvennu 2023 sovitukseh suau piästä käyttäjäntunnuksen (libo telefonan noumeran ) da peittosanan kauti daigi biometrizen tunnustandan avul : sormien jälgilöi myöte libo rožien tunnustandan avul .Piästä palveluksele voibi sežo QR-koudan avul .
Piämahtot
Sovitukses käyttäi suau todevuttau moizii toimindoi :
Tiijot olemas olijois bankutuottehis (kartois , čotis da muus );
Alallizien klijentoin ohjelmu da Passibo-bounusat ;
Dengoin siirdämine telefonan noumeran kauti , omien kartoin da čottien välil , niilöin luvus dengoin siirrot ulgomualazile kartoile Mastercard da Visa ;
Maksot yhtevykses , kunnantalovuos da toizis palvelulois ;
Maksoloin da dengoin siirdoloin histourii ;
Mahto avata tallendus da kartu (plastiekkukartan ilmahpiäständiä enne rodieu mahto käyttiä virtualistu kartua , kudai voibi ližätä mobiilikukkaroh ), tarkastua balansu čotal ;
Mahto suaja krediitty libo maksua se käymättäh toimistoh .
Vuvvennu 2020 Sberbank Onlines rodih interfeisan mustu tiemu da piänäytön levendetyt azetukset .
Virtualizet abuniekat
Vuvvennu 2020 sovitukseh azetettih ven . "Салют "-sistieman virtualizii abuniekkoi — Sber , Afina da Džoi .Hyö avvutetah terväh da varuamattah siirdiä dengoi , löydiä lähimäine bankomuattu , sanellah val'uuttukursois , voijah kirjuttua käyttäjiä kaunehus-salonah , varata stola koufeilas da muudu .
Abuniekoil on eri paginluaduloi , kudamii käyttäi voi vallita oman mielen mugah :
Sber — azielline da ystävälline paginluadu , luotettavu ystävy ;
Afina — lauhkei iäni , ellendäi paginkanzu joga dieloh ;
Džoi — kebjei paginluadu da ilokas mieli .
Storiz
Ligakuul vuvvennu 2018 sovituksen piänäytöl roittih ven . "сториз " libo "histouriet " — pienet tekstat , kudamih liittyy vizualizacii , kus käyttäi tavan mugah voi löydiä ei vaiku hyövyllizii , ga iloitustiedoloigi .
Vuvvennu 2020 rodih mahto sovittua syväindö käyttäjien kiinnostuksien mugah .
Vuoropaginat da paginat
Vuvvennu 2018 sovitukses roittih "Vuoropaginat " da paginat — sai kirjuttua viestilöi dengusiirdoloi työndäjes .Tämän ližäkse paginois voibi panna alguh dengoin keriändy , työndiä stiker libo poštukartočku .
Kezäl vuvvennu 2019 "Vuoropaginois " roittih kanualat — temuattizet paginat , kudamih alalleh sijoitetah käyttäjii kiinnostuttajii tiedoloi : ezimerkikse , aijallizii uudizii omažuos , rahois libo ekolougies .Käyttäjät voijah luadie kanualan tilavuksen da tiijustua uudizii .
Vuvvennu 2020 kanualoin käyttäjiä sovitukses oli jo enämbi 1 miljonua käyttäjiä .
Turvalližus
Heinykuul vuvvennu 2020 sovitukses rodih "Kiberturvalližuon kabiniettu ", kus ezitettih opastusmaterjualoi : ezimerkikse , tieduo muanittelijois suojelemizekse .Materjualoin kačottuu käyttäjät voijah piästä pienes testas läbi .
Ližätä moine palvelus piätettih sendäh , ku vuvven 2020 enzimäzen viijen kuun aigah oli pandu kirjoile enämbi 1,3 miljonua muanittelijoin yrrästysty , mi oli 2,5 kerdah enämbi migu samal aigua vuvvennu 2019.
Vuvvennu 2023 sovituksen piänäytöl suau löydiä Turvalližus-oza , kus suau luadie tarkastukset tulijoile soittoloile , tarkastua , eigo puututtu käyttäjien omat tiijot muanittelijoile da sežo tiijustua muanittelijoin uuzis muanituksis .
Muanittelijois suojelu
Vuvven 2021 pakkaskuus "Sberbank Online " otti käyttöh uvven tegoälyh pohjavujan muanitandantunnustus-sistieman — se auttau tunnustua käyttäjäle ebätavallizet patternat da sit lukiččou kai toimindat , kudamii muanittelii voi luadie klijentan čotas .
Vuvvennu 2021 tämä sistiemu käzitteli läs 370 miljonua tapahtumua suutkis , kerras lukičči varattavii .
Sulakuul vuvvennu 2024 App Stores rodih Sberbankan viärendetty sovitus — ven . "Сбер : Онлайн Банк ".Sberbankas tovestettih , ku sovitus on muanittelijoin luajittu da sen tallendamizen periä voibi menettiä persounallizii tiedoloi .
Maksotavat
Sberbank Online -sovitukses voibi vallita maksotaba : QR-koudan mugah , bankutiedoloin mugah da rožien biometrien mugah .Toistujii maksoloi voibi ližätä šablonah piänäytöl , ku tuliel aigua suas teriämbäh maksua .
QR-koudan mugah maksajes pidäy ohjata telefonan kameru sih , tarkastua makson tiijot da sit maksua .
Ostoksien maksandas da rahatoimindoin todevutandas biometrizii tiedoloi käyttäjes pidäy ottua käyttöh funksii sovitukses .Sih nähte Sberbank Onlineh piästes pidäy vallita tarvittavu kartu , mennä "Azetuksih " da ottua käyttöh "Makso yhtes kačahtukses ".
Androidal suau maksua yhten kosketuksen avul — pidäy vai ottua iäre telefonan lukitus da panna se terminualua vaste .Sih nähte pidäy yhtyö SberPay -palvelukseh .
Finansutilan sellitys
Vuvvennu 2014 sovitukses sai tarkailla käyttäjien menoloi .Tämän ližäkse sovitukses rodih palvelus nimel "Tarkoitukset ", ku klijentu omii tuloloi da menoloi tutkittuu vois suittua tietyn summan .Ga käyttäjät ruvettih käyttämäh tädä palvelustu "dengukanvertannu ", ku ei piettäs dengua enämbiä , migu pidäy .
Jälles rodih mahto luadie rajoituksii vältämättömih menoloih , lugie vällii dengoi kuukse da päiväkse , sežo ennustua kululoi kategourieloin mugah .
Tunnustus
Vuvvennu 2014 Global Finance -žurnualu sanoi "Sberbank Onlinen " parahakse verkobankakse Ven'al .Sidä paiči palvelus rodih voittajakse vie kolmes nominacies : "Paras mobiilibanku Keski - da Päivännouzu-Jevroupas ", "Paras SMS-banku Keski - da Päivännouzu-Jevroupas " da "Paras sovitus mobiilitelefonoih nähte Keski - da Päivännouzu-Jevroupas ";
Runetan palkindon voittai vuozinnu 2016 da 2019 Mobiilisovitus -nominacies , palkindon laureattu vuvvennu 2020 nominacielois "Rahavarat da biznessu " da "Brendan sovitus ";
Vuvvennu 2019 palvelus puutui Ven'an viijen vuajittaviman sovituksen joukkoh da rodih sežo ainavokse finansusovituksekse Ven'an top-10 , kudai puutui App Annie -laitoksen reitingah ;
Vuvvennu 2020 Go Bankingan versien mugah "Sberbank Online " tunnustettih parahakse mobiilibankakse — sovitukses oli enin vuitti azetuksii — 31,1 miljonua ;
Vuvvennu 2020 sovitus sai kanzoinvälizen Red Dot -palkindon opastusalguhpanoloin joukos ;
Vuvvennu 2021 "Sberbank Online " voitti Kuldaine sovitus -kilvas (B2C )".
Sberbank Online
карельский: ливвиковское наречие
Новописьменный ливвиковский