Тексты
Вернуться к списку | редактировать | удалить | Создать новый | История изменений | Статистика | ? Помощь
Galina Baburova. Mirus om äi melentartušt!
Galina Baburova
Mirus om äi melentartušt!
вепсский
Младописьменный вепсский
Galina Ivanovna Lokkina (norudes
– Petrakova ) om sündunu Värasjärves – Vologdan agjan Vitegran rajonan vepsläižes küläs , mittušt nügüd’ jo ei ole .Neciš küläspäi oliba molembad hänen vanhembad .Siš küläs Galina läksi školha .Hän johtutab :
"Oli mugoi čoma taho sigou .Meiden pert’ seižui , a pertin jäl’ges oli pit’käine mätaz .Muštan , lähted pertišpei – manzikašt söd .Päliči mäthas päzud – sigou jo babarmod , a vuu vähäižou päzud , ka om pen’ so .Kaiktä kävelim sigou , guleim , ei tariž olend varaita nikeda ".
Värasjärv’-külä saubatihe .Kanz tuli elämaha Piterin agjan Podporožjen rajonan Nemžkülähä .Siloi Galinale oli ühesa vot .Augotižškol oli Nemžas , a keskškolha pidi ajada Vidlaha kaikikš muupäivikš .
Galina om sündunu koumanden , kut hän sanub , ani keskmäižen lapsen kanzas .Hänel oli vanhembad Zoja-sizar da Kol’a-vel’l’ i norembad Ton’a-sizar da L’oša-vel’l’ .
"Olen vanhamb Ton’ad kaht vot , a L’ošad – nelläd vot . Minä vuu heid pestunoičin .Mändas tatam da mamam mecha , a minä hiideke olin ", – starinoičeb Galina Ivanovna , a sid’ ližadab : "Tatam miil mecas radoi , a mamam – kolhozas .Minun vanhambad oliba mugomad prostijad ristitud , radnikad oliba hüväd , ningomad hüväd tabad oliba molembil !
Tatan pol’he sanun !Ühten sil’manke (mecas puskei ) otiba händast voinale , sigoupei tuli vaiše vodel 1946.Andoiba hänele paukan , sikš ku hän üksnäze ühten sil’manke oti plenha kümne gitlerovcad !Neciš arhiveišpäi tedištimei ".
Školan jäl’ghe Galina tuli opendusele sauvondtehnikumha Petroskoihe .Küzündale siš , mikš hän valiči necen lidnan , Galina Ivanovna andab mugoižen vastusen : "Ken-se tägou oli miiden küläspei i saneli , miše Petroskoi om hüvä , minä i tulin .Navedin Petroskoid .Konz tulin tänna , ningomid surid pertid eilend .Kaiktä Petroskoiš oli puhtaz , kaiktä cvetuižed oli ištutadud , mugoi pen’ , hil’l’ , čoma gorod oli .Konz magazim öl , ka kulim , kut mašinad ajelesoi – puhtastadas irdad ".
Opendusen jäl’ghe Galina Ivanovna muga jäi-ki elämaha Petroskoiš .Äi vozid hän radoi tägä sauvojan .Hot’ oli hänel toine-ki uništuz – olda lapsiden kacujan : hän lujas navedib lapsid .
Vaiše seičemeks vodeks Galina Ivanovna ajoi kodikülähä , konz hänen mam ei olend voinu eläda pertiš üksnäze .Galina Ivanovna johtutab : "Tatam koli , konz hänele oli 62 vot , a mamuško minun eli 88 vot .Hänen jäl’gmeiččed voded elin hänenke .Minä sinne ajoin .Voib sanuda , elon seičeme vot ližazin hänele .Ku en ajaškandend , ka ei pit’kha hän eläiž .A Petroskoihe händast ei todud .Ked küläs hargneba eläda , ei mahtkoi eläda lidnas ".
Galina Ivanovnan vanhembiden pert’ Nemžas om kaičenus .Kaikuččel kevädel kogonaižeks kezaks hän lähtleb sinna .Iče kazvatab jur’kazvmusid linmal , nitäb heinäd vikatehel ümbri pertiš , erašti iče kohendab kojemidä pertiš .
Galina Ivanovnal om aktivine elo .Petroskoiš kaikuččen nedalin hän kävub "Paginkluban " vastusile , ühtneb äjihe azjtegoihe .Elädes Nemžas-ki hän ühtes Kul’turpertin radnikoidenke tegeb kodiküläs erazvuiččid praznikoid .Hö ajeleba koncertoidenke susedkülihe-ki .Galina Ivanovna lugeb runoid da pajatab pajoid venän i vepsän kelil .Ližaks , hän kaičeb kodiküläs zavetnijan praznikan , mitte praznuitihe sigä jo äi vozid völ edel Galina Ivanovnan sündundad .Necile praznikale erašti tuleskeleb Galina Ivanovnan Ton’a-sizar-ki .Tošt sizart da vellid ei ole jo hengiš .
Konz Galina Ivanovnan Alina-vunuk openzihe školas , ka kaik kezapästused hän oli babanke Nemžas .Ühtes hö kävuiba kalha , mecha – marjoihe da babukoihe .Nügüd’ Alina om üläopenik , opendase kändajaks .Täl vodel hän kirjutab diplomtöd .Baboi kaikiš azjoiš tugedab händast .
Äi vozid Galina Ivanovna valase vilul vedel , kül’bese joges kevädelpäi möhäze sügüzehesai .Tal’vel hän 15 kilometrad hihtäb suksil .Galina Ivanovna uskob , miše mugoine elonlad abutab vahvištoitta tervhutb – zellid hän job ani harvoin .Norele sugupol’vele Galina Ivanovna nevob : "Konz elädas kanzas , ei tariž vaiše erazvuiččid kodiradoid tehta .Pidab löuta aigad kävelta kuna-ni .Elos om äi melentartušt !Ei tariž vaiše kodiš ištta .Da völ pidab tervhut kaita !"
Mirus om äi melentartušt!
вепсский
Младописьменный вепсский
"