Тексты
Вернуться к списку | редактировать | удалить | Создать новый | История изменений | Статистика | ? Помощь
Natalja Antonova. Vahnan kylän uvvet päivät
Natalja Antonova
Vahnan kylän uvvet päivät
карельский: ливвиковское наречие
Новописьменный ливвиковский
Vahnat
päivät -nimine festivuali piettih Suvi-Karjalan vahnimis kyläzis – Kinnermäl kuun ezmäzenny pruazniekkupäivänny .Pošti viijen vuozisuan vahnan kylän keväthengähtys oli syvä da tulluzele mierole kuului .
Festivualis sai olla programman ozanottajannu , kaččuo da kuunnella perindöllizii ruandutaboi , yhtyö lavakonsertah , oppie karzie , kuvota , kartata , niegluo , soittua kandelehtu , kylbiekseh mustas kylys , ostua käziluajilmuksii .
Pido stuaniihes nuorižon väil .Kinnermäh kazvanuh , Petroskoin kul’tuurukolledžan loppii Kalmikovan Johor luadi festivualin oman diplomuruavon puittehis .
Vahnat päivät -festivualin piähommuajan Kalmikovan Johoran sanoin mugah , opastuksen loppiettuu häi tulou järilleh omah roindukohtah Kinnermäle jatkamah vahnembien ruaduo da kehittämäh sidä eländäkse pädijäkse da turizmudielon jatkandakse .
– Suavun professien mugah minus rodieu suurien pidoloin ohjuaju . Riähky on olla tänne tulemata , tännehäi olen kazvanuh da auttanuh vahnembii lapsusvuvvet kai .Pidäy vai maltua jatkua edehpäi .Ajatustu piäs on kaikenmostu , himoittau syvendiä ruaduo , levittiä tiedoloi karjalazih da meijän kul’tuurah nähte , kehitellä tädä päiviä jälgiperätuvel , sanelou omis pluanois Johor .
Yhtes omien opastuskamuloinke Kalmikovan Johor on täyttänyh festupäivän vahnoil dai uuzil dieloloil .Kylä oli juattu kaheksah kohtah , kunne sai kävvä tuttavumah karjalazien ruandoih da olendoih , kaččuo käziruadoloi , ostua erähii .Kinnermän eläi Jeršovan L’udmila natrovi kačottavakse omat nieglomizet da kudomizet , myös taričči talven aijan ruokos olijat marjat .Tatjana Andrejeva Palalahtelpäi ozutti vahnanaigaizii dai jo uvvembii kartoi , Sergei Volov Rautalahtelpäi pidi tuohes punonduruadopajan .Hänel sain ostua kaikenmoizii komšazii , vakkazii , laudazii .Jeršovien da Gavrilovien kodiloin sarualoin piäl avattih vahnoin ruadobrujien da vehkehien muzeit – net ollah hyvät valmehet kohtat turistoin käymizikse .Gavrilovien koin sarual Petroskoilpäi tulluh kodimuantutkii , Karjalan kirpiččy -muzein luadii Andrejevan Julija ozutti da saneli , kui enne Karjalas luajittih kirpiččiä .Täsgi sai nähtä , mit net ollah tahkojallat da oppie punuo tahkuo .
Miehet enämbäl pyörittihes kirvesmiehien kohtas .Täs ozutettih vahnoi dai uuzii terii , kirvehii , saneltih salvoksih nähte .
Kinnermän kylä on hyvin tuttu Karjalan dai ulgomuan rahvahan keskes turizman vuoh .Se on harvinazii kohtii , kus monii dieloloi suau nähtä elävälleh , da kus eläy karjalaine hengi .
Vahnan kylän uvvet päivät
карельский: ливвиковское наречие
Новописьменный ливвиковский