Тексты
Вернуться к списку | редактировать | удалить | Создать новый | История изменений | Статистика | ? Помощь
Sit' - sarnaline jogi
Sit' - sarnaline jogi
вепсский
Младописьменный вепсский
Ünaižed
päiväd Hanh’ venui sarajas vai käveli külädme .Hän ei pagižend ni kenenke , kaik verduti händast .Necen aigan hänen henges enamba kaiked eli taht pageta küläspäi , kus kaik verduti händast , kus ei olend sebranikoid .Tuskas hän meleti siš , miše pidab tirpta i eläda völ kogonaižen voden , mugoine pit’k voz’ !
Kut-se kerdan , konz Hanh’ oli vanhan pajanno , händast heikahti kombainanradai Ivan Prokatov .
– Midä tarbiž ? küzui Hanh’ .
– Ka , Hanh’ , lenda tänna ! – maihahti hän kädel . – Da hotkemba !
No Hanh’ ei rigehtoitand haškuid .Laškas hän läheni Prokatovannoks , kacuhti kaikihe nenihe "raudazjoihe ", miččed venuiba brezental , i küzui :
– Midä sinei ?
Prokatov , hibjakaz i pen’ kazvol , levedan modonke , kacuhti Hanheze , i sanui :
– Kacu , mitte oled kaznu , a käveled käded kormanoiš !
Hanh’ tozi-ki oli poleks päks korktemb Prokatovad .
– Nu ka midä ? – sanui hän .
– Ka nimidä ! Abuta-ške minei vähäšt !– i andoi hänele kombainavadimen . – Minä jo tahtoin kävuda sinun mamannoks , kut hän ühtel kädel kaik azjad tegeb . Minei ei täudu kaht-ki !Erasen kerdan hot’ jaugal avadim pida .
– Nu anda , abutan , kingiti ougil Hanh’ .
– Na , pidä nece gaik , – sanui Prokatov . – Ika se kärautelese , – i päzui kombainan südäimehe .
Ezmäižen gaikan jäl’ghe oli toine , koumanz’ ...
– Näged , kut kebnemb om kahtele ! – sanui Prokatov . – Nügüd’ sid’ kingita ... Ala kaikel vägel .Kebnemba !Näged , mi väged keradanu oled !
Hanh’ hengahtaškanzi .
– Tedan , sihesai om žal’ hädikahut !
– A kutak sinä meletad ? Žal’ om !
– Ka , žal’ om ! – sanui Prokatov . – Oli mugoine laskav živataine ! Kaks’ kerdad om žallemb , sikš ku mugomas sitmehespäi surman sai .
Prokatovan sanad kosketiba Hanhed , i hän sanui :
– Kacu , naku sinä tedad , miše hän om sitmez’ , Pahomov tedab , a tö et tehkoi nimidä ,– Hanh’ hengahti . – A tö ved’ kommunistad olet ...
Prokatov ozutihe kombainaspäi i sanui :
– Sinä , prihač , mugomil sanoil ala tacte .Pen’ völ oled .
– A mi sid’ ei ole tozi ? Aks’onov om jomar’ , vargaz .Tö kaik necen tedat , a hän kut oli brigadiran , muga om-ki .Teiden sil’miš om humalas joga päivän .
Prokatov hüppähti maha , pühki käded ruzul , pipkutaškanzi .
– Pigai Aks’onovad sudiškatas , – sanui hän .
– Jose , – muhahti Hanh’ . – Ik sikš , miše minun mamoi kaiken vazan polhe tedištanzi ?
Prokatov kingiti kulmad , taci pipkan maha .
– Sinun mamaiž om hüvä naine . Tozi sanuda , konz hän zootehnikale starinoiči lihas , ka kolhozan pämez’ jo tezi kaiken .No azj ei ole vaiše siš .Aks’nov edel-ki tegi erasid mahinacijoid , miš voiži händast eskai sudida .
– No mikš ei suditud ?
– Mikš ? Ka om ved’ toižid-ki mahtoid udes kazvatada ristitud .
– Ka , se hüvin nägub , kut tö Aks’onovad udes kazvatit .
– A sinä ala nagra . Kaiken , mi voi , mö tegim , no Aks’onovad ei sand paremboita .Vaiše siloi , konz mö nägištim necen , ka sirdim azjan sudha ...Ka täudub neciš .Pagižehtam sinun polhe .
– A midä minus pagišta ?
– Jose ei ole midä ? Näged , mitte hond azj om – priha oled sur’ , väged om , a azjaha ed tartu .
– Minä olen kezalebul . Min tahtoin , sen tegen-ki .
– Pahomovan Vit’ka mugažo om kezalebul , a kaikuččen päivän heinäntegol om .
Ku Prokatov ei johtutaiži Vit’kad , Hanh’ voiži jatkata paginad .No nece ozutez kosketi kibedas Hanhen henged .
– Sül’kta tahtoin hänen päle ! Ku tuli külähä , ka rakaha !A minä sihe en jä !
– Ah muga ! A kuna sinä lähted ?
– Nece om minun azj .
– Ala kelel tapa !
– Ala meleta , en kado nikuna !
– Avoi , oled nor’ ! Ičeižpäi , priha , nikuna ed pagene .Meleta-ške vähäine .Kaide ičeiž henges .
No Hanh’ ei tahtoind kulda .Pandes käded kormanoihe , hän läksi külähä .– Linneb tusk , ka tule , – heikahti hänen jäl’ghe Prokatov . – Pagižem , ka i abutad vähäšt .
Hanh’ oli vaitti .
Sit' - sarnaline jogi
вепсский
Младописьменный вепсский
–
–
–
Анатолии Петухов
Сить - таинственная река
русский
—
—
—