Тексты
Вернуться к списку | редактировать | удалить | Создать новый | История изменений | Статистика | ? Помощь
Тикканен Ульяна. Karjalazet ”pyöryrengahat”
Тикканен Ульяна
Karjalazet ”pyöryrengahat”
карельский: ливвиковское наречие
Новописьменный ливвиковский
Kai
minun tuttavat pyörälajajat suvaijah ajella "rengahalleh ".Se tarkoittau sidä , ku hyö reknaillah matkua muga , ku lähtie ajamah yhtes kohtas , tulla järilleh tostu dorogua myöte : ajelta yksii samazii dorogoi myöte ei ole vessel .
Minun da Mašan kollektsies on enämbi viitty mostu rengastu : Siämärves ymbäri , järvirengas Salmenniškaspäi Heččulan da Nuožarven kauti , Petroskoi-Muašjärvi-Orzega-Petroskoi , Zaozerje-Jallahti-Pin´guba-Petroskoi da "Priäžän kuldaine rengas ", kuduadu myöte ajajes päiväs voibi nähtä äijy mustomerkii .Nämmil matkoil on eri piduhus , ga kaikkii myöte voibi ajua päiväs moizii dorogoi myöte , kudamil ei ole äijiä mašinua .
Erikseh sanelen täs "Priäžän kuldazeh rengahah " nähte .Moizen nimen annoimmo myö tälle matkale , ku ajajes näit äijän mieldykiinittäjiä kaunistu karjalastu kyliä .
Jessoilan kylä , viizi čuassuu huondestu , lähtökohtu .Pyörät ajetah ruttozeh , termosois läikkyy hormučuaju , kuduah on ližätty marjua da metty .Myö olemmo rakkahat matkah lähtemäh , sada kilometrii ajamah da čomuttu nägemäh .Ga matkas olettelou kaikkie .Ajoimmo puolen čuassuu da kiänyimmö meččydorogale , a sie – lundu .Myö piätimmö ajua kilometrin da ku lundu ei vähene , kiändyö järilleh .Kilometrin kivoksii myöte pyörii ribaittuu , lumet loppiettihes , dorogu matkai harvazes "läbinägyjäs " pedäimečäs .
Meččydorogua ajua on mieleh , tiä vastah ei tulla pöllättäjät meččiä vedäjät suuret mašinat , eigo "furat ", etgo täs vastua kallehil korgieloil mašinoil ajelijoi havizijoi , kuduat vai pölyy nostetah .Ga pidäy tostu varata – mečän eläjii .
Täl kerdua tuaste lykysti , emäkondii poigazien kel astui tiä aijemba meidy , vai dorogal höyryi kondien jälgi .Hirvei on , ga emmo kiänny .Myöhäi olemmo Kindahan kyläh puolel matkua .Dostalin palan ajammo da ravieh pagizemmo , toinah meijän paginat pietäh mečän eläjii loitomba meis .
Enzimäine azetus Karjalan kaikis vesselimäs kyläs da kuvat , kudamis ollah Kindahan zuakkunoin piäurhoit .Niilöin nähtyy piäh kerras tullah kerdomukset tulkuttomis kindahalazis .
Jälles dorogu menöy juamale da matkuau Mangan kylässäh , sie pidäy puuttuo Pyhän Jumaldoman časounah .Äijän kerdua ajoimmo siiriči da näimmö sidä kaunistu časounua mašinan ikkunas , ga nikerdua emmo nossuh mäile da seizonuh rinnal .
Časounan veräi oli salvas , ga nouzimmo kellojalloile .Časounaine on mäil da kellojalloispäi Mangan kylä on ku kämmenel .
Setämä kilometri da olemmo Nuožarves ,siepäi Jessoilah Rubčoin kauti , kus vältämättäh azetummo nouzemalluo da Korzan kyläs läbi , kus sanelen Mašale "kyläuuličas " da puuarhitektuuran mustomerkilöis .
Karjalazet ”pyöryrengahat”
карельский: ливвиковское наречие
Новописьменный ливвиковский