Тексты
Вернуться к списку | редактировать | удалить | Создать новый | История изменений | Статистика | ? Помощь
Jelena Filina. Kavaleristk
Jelena Filina
Kavaleristk
вепсский
Младописьменный вепсский
Minä
tulin Borha kül’betin päivän .Kuz’mič ihastui minun tulendaha i kucui mindai kül’betihe .
– Ei hödhüvin lämbitin kül’betin , ika minun-se läksiba adivoihe , – abidoičihe Vasilii Kuz’mič .
Mända kül’betihe pidab läbi kaikes küläs , kilometrad kaks’ .Te ukon täht om pit’k i jüged jäl’ges tal’ved .
– Minai kazvoi sur’ koht , – sanub Kuz’mič ičeze polhe . – Kacu , miččeks ristit radota tegese . Mugoine tažlak hagopä .
Minä vaitti kiglaidan , en sanu nimidä .Hot’ tedan , miše Kuz’mič tal’vel ei ištund azjata .Kaiken minutan midä-se da tegeb .Siriči ajoi vessel sai .Lidnas sai om jogapäiväine azj , nikelle azjad ei ole verhižiden ristituiden polhe .Sid’-žo kaik toižin om .Rahvaz kävub kacmaha norihe tähasai , kuti kinoho .Minä küzuin Kuz’mičal sajiden polhe küliš , kut ende oli , konz hän oli nor’ .Kuz’mič udes ihastoiti mindai udel starinal .
– Sanun muga , gol’l’as elim , a veslas . Nece ku armastusen mödhe mändihe mehele .No minä sinei toižen starinan starinoičen , ei sajas , a kozičendan polhe .Ku küläs anttas kelle-ni närituznimi , ka igäks ei päzu .Se tegese mehen toižeks nimeks , ei vanhembil anttud , a rahvahal .Erašti ristit sab sen ei taban taguiči , a miččes-se erižes azjas .
Eli meil Kat’a-tädi , kuctihe händast kavaleristkaks .Ei olend Kat’al azeged i nikonz hän ei vojuind , a närituznimen mugoižen sai .
Oli Kat’al nel’l’ tütärt , kaik mamhaze nahodiba .Heil oli lujas paha taba , no hö oliba lühüdtabaižed ristitud .Äned oliba , kuti jumalanjurun kojadused , komedad .En otaška grähkäd hengele , radonnavedijad oliba .
No jäl’ges voinad neiččid hätken ei ottud mehele .Katerina händikahal ulaidab , žal’ om hänele neiččid .Naku , kerdan tuliba hänennoks kozičijad .Edahaižes küläspäi priha oigenzi heid vanhemban tütrennoks , Tatjanannoks .Katerina ei teda , kut olda mel’he armhile kozicijale .Kerazi hän ühtes tütridenke stolale , midä oli pertiš .Adivoičetab adivoid , tütärt kitäb .Iče pertidme ei kävu , a lendab .Hil’l’ pagin mäneb .Äkkid nägeb Katerina , söm-se stolal lopiše , a azjad-se ei tehtud kaik .A kozičijad vaitti ištuba , kacuba toine toižhe .
Hüppähti Jekaterina stolan tagapäi i sanub : "Prostigat , kal’hed adivod , minei pidab lähtta minutaks tarbhašt azjad ".Joksi Jekaterina pertišpäi i teravaidešti tanhale .Kartas hänel oli peittud munad ."Munapirgan tegen völ ", – meletab Katerina . Tuli hän tanhale , a kündusenno venub hänen lehm Zor’ka pä ukshe .Katerina sidä kükseb , a se venub , ei ševel’de sijaspäi , kacub emägan pol’he .Katerina zavodi laidas lehmän päle .Lendi hän jaugan , tahtoi haškta sen päliči , a Zor’ka pöl’gästui , nacein , i libui muga teravaidešti ,miše Jekaterina ei varastand mugomad .Muga Jekaterina putui lehmän gurbale .Voikaškanzi živatan gurbal .Kut sanudas , mechapäi perskel , händhapäi rožal .Kidastaškanzi Jekaterina .A lehm zavodi jokseta čogaspäi toižhe , sinna-tänna .Hätken-ik Katerina raccil ajoi lehmäl , en teda .Tedan vaiše , pidihe hän Zor’kan bokiš vahvas .Jäl’gmäižiš vägišpäi pidelihe , miše ei langeta , luid ičeze ei katkaita ."Jumal kaiče , ika en elä , miše olda anopen ," – meleti hän . Jumal kulišti , tuli tütär tanhale .Hän vai rižoi pahad , vai kulišti maman än’t .Tabazi Zor’kad sarviš , abuti mamale lasktas lehmälpäi .Katerina iče starinoiči kozičijoile azjas .Kaik nagroiba surmhasai .
Veslas kozičend mäni , ilonke .Muga kozičiba-ki vanhembad tütärt nagrdes .
A sai vätihe sügüzel .Katerina sil kargaiži kut nor’ .Siš aigaspäi Katerinad muga kuctihe-ki – "kavaleristkaks ".A hän ei otand-ki abidoks .Mi hänele närituznimi-se , konz händast viž mužikad ei anopeks , a mamaks kucuba .
Kavaleristk
вепсский
Младописьменный вепсский