Тексты
Вернуться к списку | редактировать | удалить | Создать новый | История изменений | Статистика | ? Помощь
Valentina Libertsova. Voinan kuva Vladimir Brendojevan “Kadajikos”
Valentina Libertsova
Voinan kuva Vladimir Brendojevan “Kadajikos”
карельский: ливвиковское наречие
Новописьменный ливвиковский
"Kadajikko
" on ainavo Vladimir Brendojevan runoelmu . Tavallizesti kirjuttajat kirjutetah da parandetah omua neruo keksijes pienii literatuuran lajii – kerdomuksii da runoloi , a romuanoi da runoelmoi otetahes luadimah jo ruavahat , nerokkahat , äijän maltajat da tiedäjät , konzu on midä sanuo ristittyzile .Sentäh suurih lajih on sijoitettu äijy tiemua , kyzymysty , kuvua , neruo .Tiettäväine , myö , Anuksen čupun eläjät , enzimäzikse näimmö "Kadajikos " meijän kuulužan lehtinaizen da tiijustelijan Anastasija Zvezdinan urhotevon .Vladimir Brendojev ozuttau , kui neidisty kazvatettih nevvostoškolas da perehes , kui jylgieh häi vedäy iččie vihaniekoinke , mittuzen voimakkahan kirjazen ehtii kirjuttua yöl surman iel .Runoilii ylistäy urhuo , ga yhteltiedy žiälöiččöy nuordu tyttösty , kudai puutui vihaniekoin kovih käzih .Minä jo tutkin , kui omaluaduine usko avvutti Nast’ale kestiä da arvokkahasti vastata surmu .(Folklourizet , valehjumalahuskondollizet da pravoslavnoit kuolendukuvien juuret Vladimir Brendojevan da Nikolai Zaitsevan kirjutuksis . – Kультура , язык : колыбель предков . Петрозаводск , "Periodika ", 2019, s . 50–55). Täs kirjutukses tahtozin sellittiä , mittuine runoelmas on kadajikon kuvan merkičys , gu se on otettu runoelman nimekse .
KADAJIKKO – SURMAN VAI VÄIN TILA ?
Kiistämättäh , kadajikko on otettu runoelman nimekse sentäh , gu sen reunal , suon rinnal , ammuttih jylgei tiijustelii Nast’a Zvezdina .Vihamiehet toven ammuttih meijän vangih puuttunuzii ristittyzii moizis pahois kohtis , kus sai lykätä rungu suoh libo haudah , vähäzel kattua mual , ei liijakse menettiä vägii :
Da , "heimovellet "
piettih huoli – ei tunnu tiä
ni ainau kalmu .
Kai kalmat
muanke tazoitettih .
Ni ristaštu ,
ni muudu merkii .
Vai hauttikozet tävvet
vetty… (s .126).
Vladimir Jegorovič runoelmas ei yhteh kerdah kuvailou sidä kohtua , toistajen erähii atribuuttoi :
Kadajikko .
Madal , kurju kadajikko ,
savihavvat ,
ruozmevezi . (Sivut 94, 98, 126).
Kaksi kerdua ielleh on pandu neidisty kuvailijat runorivit :
Haudah nuori tyttö kikkuou (kikkoi )…
Tyttö (seižou ) seižoi surmah ezin .
Nuori tyttö "laihas " kadajikos , ruozmevien piäl vuottai surmua – se on vastukohtu , kudai ozuttau , kulleh mieletöi on tila , nengostu ei pidäs olla ilmas nikui .
Vie enämbi merkičysty runorivien sydämes löydyy , konzu kačahtammokseh Grigorii Makarovan sanakniigah .Sie ezimerkilöin keskes voibi löydiä tovestus , gu kadai toven voibi kazvua suon rannal .Tärgei informatsii on , gu kadai on "kaikis kovin puu meijän mečis ", kadajas kai azutah lypsinrengizii , kadaivičois suksisavakkoloin rattahazet .A "kadajihine seiväs hätken ei happane ".Eigo ole moine kova da puhtas karjalaine taba Nastil ?!
Jälgimäzes , nelländes ozas , kuvailles sidä pahua kohtua , Vladimir Jegorovič virkau nenga :
Tablikkoloil ruskei savi
Pal’l’as –
ei ni heinien rikkua ,
sammal äijis kohtis hävii…
nylgietty ku nahku
turbeh ,
kova kadai –
se ei kuole . (s .126).
Muga ei ni kuole jylgien urhonaizen nimi , urhotego , kuva .Kadajan muarjat kypsetäh äski vai tulien vuvven sygyzyl , tovelline urhon hengi , mittuine oli Nastil , sežo kazvau da kovenou kodvan , vuozien aloh .Net muarjat ollah kargiet .Mustoitammo kuulužan karjalazen sananlaskun , sanakse , sen Grigorii Makarov kirjutti Mägrät-hierus , Nast’a Zvezdinan roindumual : "Oma čuppuine – mandžoimarjaine , vieras čura – kadajaine ".Ga kadajikos voijah kazvua da andua hyvän duuhun magiet muarjatgi .Vladimir Brendojevan kadajikon kuvas ongi nengoine tarkastus :
Sit-täs mätäkkölöin gurbih
Pettijes d’iännyh
Barbua buolan… (s .126).
Kargei oza tapahtui voinanaigazile neidizile !Nast’anke yhtes opastunnuot Belomorskan tiijustelijoin školas podružkat ketgo kuo ltih hänen jytyi , ketgo kestettih voinan aijan jygevykset da kai igä atkaloittih kuadunuzii voinal .
Makarovan sanakniigas vie on verbi "kadajoija " – savvuttua .Kadajan varboin savvuu varatah čakat , dai konzu ei olluh kus ostua gluadanua , meijän buabat kuajittih pertilöi da kalmoi kadajan varvoin da muarjoin vuoh , sil puhtastettih huonuksii , ozutettih kunnivo Jumalale da kuolluzile .Mugai Nastoidu kuoltuu urhon mugah , luondo kuajiu kadajan duuhul , sebiäy da ottau omah helmah .Kadajikko toven ei alenda runoelman piähengie , vai andau hengen vägie .
KADAJIKKO , MUSTOITTAI VOINUA
Pahakse mielekse , ni Nastin kalmua , ni tapandukohtua niken ei tiijä .Kodirannan histourien tiedäjän Petraš Valentinan mielen mugah , se voibi olla vangittuloin barakoin tagan libo pellon reunal , kinne oli nostettu enzimäine paikallizien peittollizien toimijoin mustopačas .Kui lienne Vladimir Jegorovič sen nenga tarkah kuvailluh , toven oli ylen nerokas kirjuttai , kuduas läbi iče luondo kerdou .
A minun silmien ies ainos enziluvendas algajen seizou oman kodoilan kadajikko , Kellyniemen da Keskoijärven kujoloin tiešuaral , ojan sillan tagan mägyččäzel haudoin keskes , kunne Paša-buabo kävyi ottamah kuajittavakse muarjoi .Meidy , lapsii , kieldi sinne menemäs , sanoi , net havvat ollah voinanaigazet okoupat , siepäi mužikat kannettih äijy raudupalua , net ollah oskolkat , sinne vie niidy jäi , vai katoi havul , voibi petties sattavuo , dai a gu vie miinat peityttih muah …Mennä sinne oli himo , sie kazvettih mandžoit da buolat , a voinan kuvat silloi meijän mielis elettih urholoin tavan mugah …
Voinan kuva Vladimir Brendojevan “Kadajikos”
карельский: ливвиковское наречие
Новописьменный ливвиковский