Тексты
Вернуться к списку | редактировать | удалить | Создать новый | История изменений | Статистика | ? Помощь
Valentina Libertsova. Voinu da vihaniekat Brendojevan “Kadajikos”
Valentina Libertsova
Voinu da vihaniekat Brendojevan “Kadajikos”
карельский: ливвиковское наречие
Новописьменный ливвиковский
Vladimir Brendojevan Kadajikko-runokogomus nägi
päivänvalgien 1986 vuvvel , vikse se oli enzimäine Kadajikko-runoelman painandu da kirjutandugi .Silloi oli moine aigu , konzu kaikes mieros vie mustettih Toizen muailman voinan hädii da tävvel väil opittih pyzyö rauhas elaijas .Kaikis tärgevin , tiettäväine , se oli meijän kaikis enimäl kärzinyöl mual .Sit kuvailtes da ylendäjes Anastasija Zvezdinan urhoteguo , runoilii žiälöiččöy nuoren neidizen sudre menetettyy elaigua da viärittäy voinua .Enzimäzes ozas kirjuttai kiändyy voinah päi paginanke , gu eläväh , hiilavien palajien kyzymyksienke :
Mikse sillo pidi ,
täydymätöi voinu ,
tytön hengi ?
Mistöin hälle tazuat ?(…)
Viego sinä , voinu , olet vajai ?
Viego vähä –
sirottua da leskiä ?
Roihgo sinun ryöstölöilles
raja ?
Konzu , sinä , kadehiine ,
tyystyt ,
petišöile kegälehii tuamas ?
Ielleh Brendojev zavodiu vastuamattomat kyzelendät tyttöh niškoi , nimittäy voinua kaunehil livvin sanoil : täydymätöi , kadehiine , tazuat , olet vajai .A sit jo nouzou viäritykseh tyhjis hierulois da "joga muaman käzis rippujien hädienke ".Ielleh sanat jatkutah : "kuččumatoi ", "vuottamatoi vieras ižändöimäh tuli meijän kodih ".Moizii sanoi minul puutui kuulta omas buabas dai toizis naizis meijän Anuksen čupun valloitettulois hierulois .Vladimir Jegorovič , smietin , sežo kuuli , dai iččeh voinanaiguzen lapsusaijan mielikuvat oldih mostu tabua , kui rahvahal .Runoilii käytti ihan toven ilmekkähii livvin sanoi dai ielleh omat kovat viäritändät jatkau vihaniekkoih päi , kudamil "pidäs Suomi suuri , rajois uuzis , varakas da vägey ", da vie gu net "kai kiändäs vastumuuri muat dai manderehet polgis paganjallal ".Ilgivaldaine vihaniekoin da voinan koiruamine , kuduat yhtytäh kuvas , läimähtähes sanois :
Näitgo , hälle pidäy –
hälle pidäy !
Sinä vältäi ,
myvvistäi da myöstäi …
Vaigu moine , mittuine oli Nast’a Zvezdina , kazvatettu elämäh välläs da armastandas ,
kelle kallis ollou
puhtas nimi ,
vähän myvvistäh
da iččiä polgie andau .
Kolmandes ozas , jälles pitkiä kerrondua Nast’an kazvatandas , runoilii myös kovah arvostau voinan pahuttu : jälles verbii "karahtih ", kudai merkiččöy kiirehty da tolkuttomuttu , on käytetty nelli verdavustu ilmivölöinke , kuduat tuvvah ristittyzen elaigah vahinguo : "ku kuival tulipalo ", "ku hallu peldoh kesken… keziä ", "ku vuottamatoi hädä… taloih ", "ku vuotoroppu sordai linnun pezii ".A kaikis tirpamatoi vahingo
on se , ku
voinu kučui miehet
surmankižoih ,
ruadoväikse jätti
lapset , akat …
Pahan mielenke runoilii ajattelou , kui "meil pidi jättiä oma Anusrandu ", kudai "lahtariloil… kobrih puutui ".A net vie "liekastellen " havistah :
"Emmo surmuajat myö ole .
Olemmo myö
sinun heimovellet ."
Brendojev kuvailou , mittumakse jätettih vihaniekat jälles "ižändöičendiä " Anuksen mua , kui viettih parahat mečät , syödih lihannu "yhtehine karju ", "kuobailtih " "dvorat , hevot , brujat ", kui
Politsii , ku koiru
hierus nel’l’ai ,
kedä rozgitti ,
a kedä butkah talui .
Ironiziiruijen runoilii kuvailou , kui tuodih Nast’ua Anuslinnan tyrmäh :
Rohkiet miehet ,
otitto sit vallan ?
Voititto sit , gor’at ,
kahtu tyttyö ?
Yhtelläh tyttö "ehtii… kodih kirjuttua jälgisanat ", "Niin sanoin vuoh häi ammuttu ei kuole "… nuori tyttö sai olla raviembannu da jylgiembänny , migu "vihažniekat ".Nastin kirjazeh niškoi maksau pidiä erilline pagin .A Kadajikko-runoelman Vladimir Brendojev loppi lyhyöl nelländel ozal , kuduas myös žiälöiččöy nuordu urhoneidisty , ga uskou :
A musto –
rahvahas ei kadua ,
hos kannella ei
risturihmas .
Sentäh , gu piästetty Anus "nuorištuu " da "korgenou ", kahten sobuh juoksijan joven rannoil .Rauhas lugie dai eliä , tiettäväine , on kebjiembi .Ga Vladimir Brendojevan runorivit kovien voinan kironduksienke vie ollah pättävät tänäpäigi .Pahakse mielekse .
Voinu da vihaniekat Brendojevan “Kadajikos”
карельский: ливвиковское наречие
Новописьменный ливвиковский
"
Либерцова Валентина
Война и враги в «Можжевельнике» Владимира Брендоева
русский
"