Тексты
Вернуться к списку | редактировать | удалить | Создать новый | История изменений | Статистика | ? Помощь
Uljana Tikkanen. Puhtahašta meriveještä tulou makieta šuolua
Uljana Tikkanen
Puhtahašta meriveještä tulou makieta šuolua
карельский: собственно карельское наречие
Новописьменный севернокарельский
Valkien
meren rannalla Čuuppa-pos’olkašša on ainut Karjalašša šuolakeittämö .Valkien meren šuolua valmissetah 300–350 kiluo kuukauvešša .Kešällä vähempi , talvella enämpi .
MUINAISAJOISTA MERIŠUOLA ON OLLUN KALLIS
Venäjä on monien luonnonvaruštehien rikkahin mua ta niise šuolalajija meijän muašša on enämpi , kuin toisissa maissa .Šuola on muinasista ajoista tärkie aineh , vain šuolasena šai šäilyttyä kalua , lihua , šienie ta šillä tavoin valmistua varuštehie talvekši .
Ennein vanhah šuolua valmissettih kešällä päivän paissošša rantakallivoilla , a talvella haihutettih pakkasella .Enšimmäisinä šemmoista šuolua šuatih saamelaiset .Šiitä meren rannoilla ruvettih elämäh novgorodilaiset , kumpaset tultih pomoriloiksi ta hyö ruvettih rakentamah keittämöjä .Niijen omistajina oltih manasterit .XVI –XVII -vuosišuašša Valkien meren šuolua tuotettih 700 tuhatta puutua vuuvvešša .XX-vuosišuan alukši ruvettih käyttämäh halvempua Astrahanin ta Permin šuolua ta vanha elinkeino unohtu .
Nyt Valkien meren rannoilla on vain eryäš šuolakeittämö , yksi niistä on loittosešša pohjoispos’olkašša Čuupašša .
VALKIEN MEREN ŠUOLAN MAKUJA
Valkiešša mereššä on oikein puhaš merivesi , šentäh tänne ni tuli Ol’ga Jagodina oman perehen kera ihan alušta järještämäh vanhua ruatuo – šuolan keittämistä .Nyt keittämöššä ruatau kahekšan henkie , niijen luvušša Čuupan eläjie .Ol’galla oli mukava tutkie šuolan valmistamisen prosessie ta elvyttyä šitä niillä istorijallisilla paikoilla , missä šuolakeittämöjä ennein oli šatoja , a nykyjäh vain harvat .
Merivettä otetah Čuupan lahen alušta , missä viereššä ei ole kylie ta vesi on puhtahin .Pitäy ottua vettä noušuvejellä , kun tulou šuolasemmat vejet .Šiitä vettä tuuvvah Čuuppah , missä alkau pitkä prosessi – merišuolan šyntymini .
– Täššä on meijän keittämön šyväin – šuuri kattila , missä šuolua haihutetah . Merivettä lämmitetäh , jotta šuolatoin vesi haihtuis ta jäis väkövä šuolavesi .Kattilašša on kakši ošua : šiämiošašša on merivettä , a šen ympäri on tila , kumpani on täytetty notkiella glyseriinillä .Kattila lämmittäy glyseriinie , še rupieu kiehumah vain 280–290 aštehella , šentäh myö lämmitämmä glyseriinie ta katkuamma kattilan šähköštä , a glyseriini lämmittäy patua , missä on šuolavettä , niin myö šiäššämmä šähkyö .Šiitä alkau kristallisoitumini ta myö panemma kattilah puhašta kankašta , kertou Ol’ga Jagodina .
Kristallisoitumini keštäy muutoman päivän .Kun še piättyy , kankašta , missä on jo šuolua noššetah kattilašta ta pannah toiseh huoneheh kuivumah .Kristallisoitumisen jälkeh jiäy magnesiumista vettä , šitä paikalliset eläjät otetah ta lisätäh veteh , kun kylvetäh vannašša .Še on oikein tervehellistä ta luonnonpuhašta .
Kešällä šuola on vähäsen keltasempi , erityisešti vihmojen jälkeh , a talvella puhtahan valkie .Ka joka kerta šuola tulou entistä toistumattomakši .Še on elävä tuoteh .
– Valmista šuolua pitäy puhistua hiekašta , še on jo käsityö . Keittämöššä šitä ruatau paikallisie naisie , a šiitä myö ševottamma šuolah erilaisie luonnollisie makuja : hilluo , mussikkua , puolukkua , pihlajua , katajua , muštamarjapihlajua , karpaluo , česnokkua , pippurie , viinie ta äijä muuta toisie .Myö valmissamma lisäykšistä huttuo , ševotamma šuolah ta uuvveštah kuivatamma .Še on vaikie ta kallis ruato , ka vain šillä tavalla voipi šuaha niin tuokšukašta ta makieta šuolua .Konša ihmini šyöy hiän enšin henkittäy tuokšuja , a šiitä vain tuntou makuo , šentäh niin äijä huomijuo tuokšujen šäilyttämiseh , šelitti Ol’ga .
Merišuolua on hyvä maissella munien tahi tomattien kera ta voipi lisätä kahvih , maitoruokih , eryähät lisätäh hetelmihki .Šuolakeittämöh jokahini voipi tulla opašretkellä tahi tilata maissantua .
Šuunnitelmissa on järještyä musejo , missä on esillä šuolalajija muan eri paikoista ta missä niitä voipi maissella šekä avata restorani nuapurirakennukšešša , missä šuau maissella Valkien meren šuolalla mavuššettuja ruokie .
Puhtahašta meriveještä tulou makieta šuolua
карельский: собственно карельское наречие
Новописьменный севернокарельский