Тексты
Вернуться к списку | редактировать | удалить | Создать новый | История изменений | Статистика | ? Помощь
Nadežda Vasiljeva. Jyškyjärvi täytti 440 vuotta
Nadežda Vasiljeva
Jyškyjärvi täytti 440 vuotta
карельский: собственно карельское наречие
Новописьменный севернокарельский
Heinäkuun
viime netälinloppuna Jyškyjärven kylä vietti 440-vuotisjuhlan .
Heinäkuun viime netälinloppuna Jyškyjärveššä piettih perintehellini kešäpruasniekka – Kylän päivä .Tänä vuotena še oli erikoini : jyškyjärviläiset ta luonnonkaunehen karjalaisen kylän vierahat juhlittih 440 vuotta Jyškyjärven aikasimmašta kirjallisešta maininnašta .Onnakko rahvaš elettih šillä šeuvulla ennein šitä : muinaisihmisen elinpaikat šielä ajottuu 600–400 -luvulla ennein meijän ajanlašun alkuo .Šielä eli mečäštäjä - ta kalaštajaheimoja , kumpaset vajellettih porokarjojen peräh .
Pitkien vuosien aikana Jyškyjärvi kešti äijän istorijallisie tapahtumie ta järkytykšie .Šen elämäššä on ušeitä onnellisie ta tragisie päivie .Niijen piäytimenä aina oltih rohkiet , ahkerat , kunnolliset , ruatajat ihmiset .Juuri lujan luonnon anšijošta Jyškyjärven kylä vielä eläy ta rupieu elämäh .
Aikaseh huomenekšella Jyškyjärveššä alko luaja kylän jarmankka .Še keräsi monie paikallisie muasterija .Hyö tultih näyttämäh omie luajokšie ta keittotevokšie ta myömäh niitä oštajilla , kumpasie oli riittäväšti .
Šamah aikah kylän stadionilla Hete-folklorikollektiivi ta Tuulitar-tanššijoukko kučuttih kaččojie šuureh karjalaiseh kruukah .
Pruasniekan juhlallisen ohjelman avasi Kalevalan piirin hallinnon piämiehen virkua toimittaja Aleksandr Gladii .Hiän onnitteli jyškyjärviläisie kylän vuosijuhlalla , toivotti šen eläjillä onnie ta hyvintoimehtuluo !Hiän myönti Karjalan halličukšen kunnivokirjan Šuurešta panokšešta karjalan kielen ta kulttuurin šäilyttämiseh ta kulttuurih kylän aktiivisella eläjällä Raisa Ribakovalla .
Šamoin hyvie toivomukšie jyškyjärviläisillä Koštamukšešta toi karjalaisen kulttuurin Viena-šeuran etuštaja Ol’ga Lehtinen .Karjalaisien X kerähmön valtuutettujen neuvošton piällikkö Inga Gurilova enši kertua tuli Jyškyjärveh .Hiän onnitteli jyškyjärviläisie , ihual’i kylän ainutluatuista kaunehutta , šen eläjien vierahanvaraisutta , toivotti kaikilla hyvyä ta onnie .
Konserttiesitykšet vaihuttih – kaččojat lämpimäšti otettih vaštah lauluja karjalan ta venäjän kielellä , tanššittih kanšanmusiikin tahissa .
Kaikin oltih hyvällä tuulella , ta šiä autto šitä – vierahat iloššuttih lämmöštä ta kirkkahašta päiväseštä .
Pruasniekan piätapahtumana oli jyškyjärviläini Laukkurit-regatta .Tavallisešti šiih ošallistuu perehjoukkoja , kumpaset valmistauvutah kilpailuih äijyä ennein ta tarkašti .Kilpailuih ošallissutah paikallisien muasterien luatimat venehet – ne on valmissettu näin , jotta helpošti ta hyvällä vauhilla voitetah pitkie vesimatkoja .
Tällä kertua regattah ošallistu nellä joukkuo .Ne kaikki meinattih voittua .Regatan piäpalkinto , pruasniekan sponsorien antama nykyaikani venehmouttori , yllytti heitä .Kaččojat lämpimäšti kannatettih regatan ošallistujie .
Jyškyjärven regatan piäpalkinto šuatih Mihail ta Maksim Rekinit .
Kuni arvoštelijat miärättih venehkilpailun voittajua , Čirkkakemijoven rannalla kaikki halukkahat šuatih maistua uuhhua Jyškyjärven kalašta , juuvva marjavettä ta čäijyö karjalaisien sriäpnöjen kera .
Jyškyjärven pruasniekka kešti myöhäseh iltah šuaten .Lauluja ta musiikkie kuulu tunnettujen kylän rippujien šiltojen ta Čirkkakemijoven pinnan piällä .
Jyškyjärvi täytti 440 vuotta
карельский: собственно карельское наречие
Новописьменный севернокарельский