Ошибка:
Недостаточно прав на выполнение этой операции
Тексты
Вернуться к списку | редактировать | удалить | Создать новый | Статистика | ? Помощь
Nadežda Mičurova. Hänen karjalaine syväin pajosiivil lendi
Nadežda Mičurova
Hänen karjalaine syväin pajosiivil lendi
карельский: ливвиковское наречие
Новописьменный ливвиковский
Nämmil
päivil myö mustelemmo muuzikkumiesty , soittajua da pajoloin kirjuttajua Nikolai Dmitrijevič Dubalovua .Elokuun 6. päivänny hänel olis täydynyh jo 95 vuottu .Nikolai Dubalov jätti hyvän jällen da muston omas ičes .Nellikymmen kuuzi vuottu häi oli ruadanuh karjalazen kul’tuuran nostamizen hyväkse , opasti vahnembii da lapsii suvaiččemah omua kieldy da pajoloi .
Rodivui Nikolai Dubalov vuvvennu 1930 karjalazes perehes .Hänen tuattah Dmitrii Andrejevič soitti soitol , a muamo Jevdokija Vasiljevna pajatti kirikön horas .Vikse se pajon da muuzikan suvaičus siirdyi heijän lapsilegi .Nikolai Dubalovas kazvoi hyvä da nerokas soittai , muuzikan da pajosanoin sepittäi , a hänen sizär Zoja Autio (Dubalova ) mondu vuottu johti Anuksen rahvahan horua .Sih pidäy ližätä , gu Nikolai Dmitrijevič soitti Anuksen rahvahan horale vie Iivan L’ovkinan aigua 1950-vuozien allus .
– Anuksen rahvahan horah minä tulin nuorikkaine vuvvennu 1953. Silloi horua johti Iivan L’ovkin , a soitti horale Nikolai Dubalov .Nikolai Dmitrijevič ainos nosti karjalazii pajoloi .I konzu L’ovkin lähti horaspäi , Dubalov ainos potakoičči rahvastu pajattamah karjalakse .Häi iče kirjutti pajoloi da muuzikkua , sanoi endine Anuksen rahvahan horan pajattai Anna Jermolina .
LEVITTÄMÄS KARJALASTU PAJUO
Vuvvennu 1970 Anuksen horan johtajakse rodih Nikolai Dubalovan sizär Zoja Autio .Kahtei ruadua oli kebjiembi da parembi .Kunne vai anukselazet pajattajat ei käydy ozuttamah konsertoi .Oldih hyö Leningruadas , Moskovas , Murmanskas , kai Suomeh da Ruoččih puutui ajella .Yhtes oman sizären kel Nikolai Dubalov luadi äijän pajojoukkuo hierulois da ruadopaikoil , opasti rahvastu pajattamah .
– Minä nuorennu enzimäzet vuvvet ruavoin Kotkatjärves . Nikolai Dubalov yhtes oman sizären Zoja Autionke käydih motosiklal hieruloih opastamah rahvastu pajattamah .Myö nuoret kerävyimmö kaikin Kotkatjärven kluubah .Sie hyö meijänke harjoiteltih .Vas’s’oin hieruh , Videleh , Kuittizeh — äijih kylih hyö käydih .Sit myö eri hieruloin pajattajat yhtesgi pajatimmo .On olemas fotokartočkuagi , kus myö olemmo kaikin nuoret da čomat , pitkät kasat ryndähäl .Opastettih hyö pajattamah lapsiigi , musteli Anuksen horan endine pajattai Klavdija Kukko .
SOITANDUNERO TULI IČE
Nikolai Dubaloval ei puuttunuh loppie korgieloi muuzikkuškolii , ga häi iče hyvin harjavui soittamah da kirjuttamah pajoloi .Sen ližäkse händy avvutettih da nevvottih Moskovan da Piiterin konservatourieloin opastajat Barahtenko da Vaizberg , kuduat kodvazen ruattih Anukses .Nikolai Dmitrijevič kirjutti pajoloi karjalan , suomen da ven’an kielel .Kui jälles musteli muuzikkumiehen mučoi Galina , kai hänen pajot oldih allekirjutettu peittonimil libo pandu rahvahan pajoloikse .Silloi ei suannuh , gu pajot oldas yhten kirjuttajan .
ARMAS ANUSRANDAINE PAJOLOIS
Vuvvennu 1995 ilmoile piäzi Anusrandaine-pajokogomus .Samanmoine nimi oligi pajojoukol , kuduadu kaksitostu vuottu johti Nikolai Dubalov .Sit aijas Nikolai Dmitrijevič ehti kirjuttua ynnällizen tukun pajuo .Anna Sem’onovna Jermolina pajatti "Anusrandazes " da kai oli sie solistannu .
– Minä gu "Anusrandazeh " tulin vuvvennu 1985, Nikolai Dmitrijevič andoi minule pajon Karjalas . Ezmäzikse minä sen pajatin .Häi ainos sanoi : "Tuletto lavale , kai unohtakkua da pajatakkua iändämättäh .Pidäy , gu pajo lähtis syväimespäi , gu rahvas ellendettäs sidä da kuultas ".Dubalov toiči čakkai , toiči šuutti meijänke da kiitti , konzu pidäy .Häi rahvahanke maltoi paista , dai rahvas suvaittih händy .Ainos sanoi : "Myö olemmo karjalazet , i karjalazii pajoloi pidäy pajattua ", mustelou Anna Sem’onovna .
Nikolai Dmitrijevič Dubalov kirjutti pajoloi prostoih rahvahah , karjalazih niškoi , otti niilöi omas syväimespäi .Eihäi sudre anukselaine runoilii Anatolii Jeroškin sanoi Nikolai Dmitrijevičas : "Hänen karjalaine syväin pajosiivil lendi ".
Penzielegi mendyy Nikolai Dubalov ei istunuh dielottah – opasti Anuksen školainternuatan lapsii pajattamah karjalakse .Nikolai Dubalovas mustonnu jiädih runot , pajot , nouttual’bomat da vahnat kasietat .Niilöil pajoloil , smietin , on pitky igä .
Hänen karjalaine syväin pajosiivil lendi
карельский: ливвиковское наречие
Новописьменный ливвиковский