Ошибка:
Недостаточно прав на выполнение этой операции
Тексты
Вернуться к списку | редактировать | удалить | Создать новый | История изменений | Статистика | ? Помощь
Veikkolainen Ilona . Videoprojektu ozuttau Karjalan nähtävyksii
Veikkolainen Ilona
Videoprojektu ozuttau Karjalan nähtävyksii
карельский: ливвиковское наречие
Новописьменный ливвиковский
Projektujoukko kävyi
tazavallan eri linnoih da kylih kuvuamah 20 nähtävysty , niilöin luvus kiriköt da histouriellizet rakendukset .
Karjalan nähtävyksih nähte kerrotah videolois , kuduat on luajittu vuitinnu Ven’an nuorižoazieloin Rosmolod’ož-toimiston projektua .
– Projektu algavui mennyt elokuus da loppehes oraskuus . Nygöi myö ozutammo videoloi , sanoi projektan piälikkö Valerii Vid’akin .
Projektujoukko kävyi yheksäh linnah da kyläh , matkoin aigah on kuvattu kaksikymmen videodu .
– Valličimmo nähtävykset , kudamih nähte tahtozimmo kerduo . Myö tahtoimmo kävvä tazavallan eri piirilöih da kuvata erilastu nähtävysty .Videot luajimmo Petroskois , Sordavalas , Puudogas , Belomorskan alovehel da Karhumäin piiris , kerdou projekan piälikkö .
Nähtävyksien valliččemine ei olluh kebjei .Karjalan kul’tuuruperindökohtien vardoičuskeskuksen mugah tazavallas on pandu kirjoile enämbi 500 arhitektuuristu mustomerkii , kuduat kuulutah tazavallan kul’tuuruperindökohtien luvetteluh .
– Nähtävyksien joukos on kirikkyö , puu - da kivirakendustu . Kuvaimmo histouriellizii nähtävyksii , sanommo Sordavalan tyttöškolua da tulipaloazeman rakendustu , sežo kauppumiehes Aleksandr Bazegskin kodii , kudai oli enzimäine kivirakendus Puudogas , sanou Vid’akin .
Hänen mugah jogahizel vallitul rakenduksel on mieldykiinnittäi histourii .
Videolois suau nähtä Petroskoin muuzikkuteatran rakendustu , kudai on hyvin tuttu nähtävys .Kuvuajat kerrotah rakenduksen pitkiä histouriedu , kuduah nähte harvat tietäh .
Videoloi voibi kaččuo VKontakte-sivul .Jogahine video kestäy ei enämbiä kolmie minuuttua .
Projektah yhtynyöt ollah varmat , ku lyhyzii videoloi on kebjei kaččuo da net ollah mieldykiinittäjät .
Sotsiualuverkoloih sijoitetut tiedottehet , kudamis on video , kerätäh enämbän huomivuo , migu "pal’l’ahat " tekstat .
Vid’akinan mugah projektas oldih ruavos nerokkahat kaamerumiehet .Karjalan kul’tuuruperindökohtien vardoičuskeskuksen ruadajat autettih ainehiston valličendas .
Projektah yhtyi sežo karjalan arhitektuurah da histourieh mieldynyttyy yliopastujua .
– Tahtoimmo kerduo karjalan kul’tuurizen da histouriellizen perindön tutkimizes da säilyttämizes . Projektan tavoittehennu oli kiinnittiä nuorien mieldy paikallizeh histourieh .Olemmo varmat , ku videot autetah meile kerduo nuorile nähtävyksih nähte .
Videot kiinnitetäh kui Karjalan eläjien , mugai turistoin mieldy .
– Kačoin sentämän kuun tagaperin videon Sordavalan endizes bankurakendukses . Olen käynnyh Sordavalah äijän kerdua da nähnyh tämän rakenduksen .En tiedänyh nimidä sen histourieh nähte .Tahton suaja tieduo toizisgi Sordavalan histouriellizis rakenduksis , sanoi petroskoilaine Marina Melehova .
Videot suajah äijän ozutuskerdua da mielihyvämerkii .
– Suammo alalleh myödehizii vastavuksii rahvahis , kuduat kačottih meijän videot . Äijät sanotah , ku net miellytetäh , kerdou Valerii Vid’akin .
Videot ollah suadu täh aigua lähes 50 000 da 77 000 ozutuskerdua .
– Suurin vuitti arvostustu tulou niilöin kohtien eläjis , kudamii ozutimmo videolois . Karhumäin raudutieazemah nähte kerdoi video on täl aigua enimite kačottavin , sanoi häi .
Karhumäin raudutieazemu on rakendettu vuvvennu 1916.Vuvvennu 2022 raudutien rakendus ližättih tazavallan kul’tuuruperindökohtien luvetteluh .
Videoprojektu ozuttau Karjalan nähtävyksii
карельский: ливвиковское наречие
Новописьменный ливвиковский