Тексты
Вернуться к списку | редактировать | удалить | Создать новый | История изменений | Статистика | ? Помощь
Sem’onov P’otr . Viinu kižuau
Sem’onov P’otr
Viinu kižuau
карельский: ливвиковское наречие
Новописьменный ливвиковский
Rodi jo
ennepäi hyvin tiedäy , äijängo viinua juou tuattah ezimerkikse tänäpäi , kui da mida rubieu sanomah muamah .Häi tiedäy , konzu "ižändäkse " roih viinu , sit tuattah rubieu kirgumah mattii , a sen jälles rubieu lyömäh mamua ,kudai pagieu rinnaleläjien luo libo , mi tapahtuu vie teriämbi , meččäh .Rinnaleläjät ei rakkahal laskieta händy , gu varatah tuattua .Sit kai roih muurimukkelilleh .Tuattah juoksou saruaspäi kirvehenke , rubieu pergamah joga sijua , mi vai kädeh puuttuu : lauččoi , stuulii , stolii kaikkii omil käzil luajittuloi .Suurien pruazniekoin aigah kirvehen uale puututah ikkunpielizetgi , sit škuapaspäi lennetäh "ruadopreimielöis " muamale lahjoitetut matieripalat , dai iče škuappu sih voibi loppie ijän .
Kylypäivänny ei sua juvva enämbiä puoliškuo , sendäh ikkunoin perrandassah tänäpäi ei mene se on varmu dielo .A muut kui ozittau .Toiči menöy kai ihan rauhalleh .Sit äijy on kiini muamas .Enzimäzekse , hänel ei pidäs mainita Stepanua .Kui Rodi on primiettinyh , sit alletah kai riijat heijän talois .
Se tundematoi Stepan eläy kus ollou ylen loitton , ga hänen nimie mustellah yhtes Veran nimen kel .Sidä Rodi ei vie voi nikui ellendiä .Muamah puaksuh kiittäy sidä Stepanua da panou händy parembakse tuattua , a sidä tuattah nikui ei voi tirpua .Tiettäväine , tuattah on oigei .Kenbo hänen jyttyöh maltau soittua soitol , pläššie čiganoin da ven’an pläššilöi , pidiäkseh hevos .Da vähängo midä vie maltau tuattah !Toinah se Stepan ongi kuda kui mužikku , ga tuattassah hänel on loitton .
Hos kaiken sen Rodi tiedäy ennepäi , ga kui ainos , tänäpäi häi sijoitui čuppuh suurele sundugale .Toizien lomuloin keskes se sundugu , voibi sanuo , on igäine .
Vaiku täh sundugah - muaman myödäzehei vie koskenuhes tuatan kirves .Sundugalpäi on parembi kaččuo vahnembien telmendiä .
Tuatto istuu valgielois pruazniekkupaijois puhtahal pyhkimel katetun stolan piäs .Rinnal čomis pluat'ois lyhyzien hiemualoinke istuu muamah .Tuatan ies on kaksisadagrammahine stokan , a muamal -sadagrammahine kuppi .R'umkat ei pätä .Tuatan mieles r'umkil juvvah vai linnas i sendäh sie terväh muututah viinanjuomarikse da senpiäl gu sie valgien viinan sijas juvvah ruskiedu viinua .Muamuadah pietäh juomattomannu .Häi muga vai valau ičelleh , anna tuatalleh puuttus vähembi ei muga äijäl humaldus .
Nygöi , suovattan , kuni kylynjälgehine ildaine on vie ihan allus , tuttua da muamua voibi kai ihastella .Kui ainos , Rodi toivou - täl kerdua kai menöy hyvin .Muamah nagrau da pajattau pajuo , kudai Rodil on ylen mielehine :"Tol'ko u ljubimoi mogut bit' takije neobiknovennije glaza ..." Tuatal se pajo sežo on mieldy myö , hos häi sidä nikui ei ozuta .Rodi ovvostau tuattah mielen vai hänen erikoizen tarkoin da hyväntahtojien silmien lipistysty myö .Tiettäväine , häi soittajannu voibi andua hinnan pajole .Pajon loppiettuu muamah algau azettumata tarattua , sanelou kui händy mečänkuadajien piälismies vedi omal hevol - kačo mittumat myö olemmo !Tuattah silmis jo säristäh vihazet kyvenet .Niidy myö Rodi kerras arbuau - ildaine hyväzilleh ei loppei , a muamah sidä ei vie huomua da jatkau :- Sanou , istoi , Anna Jegorovna , vien kodissah .
- Nu ! hörkistih tuattah , lujah kobristi tävven viinustokanan .
- Minä olen mieletöi teih näh , minä vastuan hänele , meil kyläläzil on loitokse teih opastunnuloissah , muamah lohkottau nagrua ihastuksis kui maltoi hyvin vastata da painaldau sellän stuulah .Tuattah ei vastua nimidä .Häi ruttoh kumuau viinustokanan , kargiesti mučkistah , hätken n'uustau leibypalua da kaččomata ähkiy vilkua riehtiläh .
-Ga midä sinä , Anna Jegorovna !muamah vie ei huomua tuatan läpettäjis silmis kypsenytty räjähtysty , jatkau ylbiesti :- Sinule ei sua andua ni kahtukymmendy vuottu ! Hos jo on kaksi lastu !häi ližiäy ičespäi da vessellisti nagrau :
- Sinähäi olet kirjuniekku inehmine , menizit ruadoh hos meijän bibliotiekkah kniigoi andamah . Hyvin pahoi , sinä olet loppenuh seiččei kluassua !häi lohottau nagruo ihastuksis .
Tuattah ehtii loppie vai kuuzi kluassua i se abevuttau händy .Häi buuristuksis valau ičelleh toizen stokanan viinua .Hänen päivitynnyöt rožat hiestyttih , paijan rindu on avvoi , mustat silmät terävästi kačotah muamahpäi , kudai vesselästi keimoileh ielleh sen kačahtuksen ies , gu linduine orožan ies .
Vahnembat ollah silleh otettuhes toine toizeh , ga ei olla ni huolessah poigua .Sen huomattuu , Rodi hil'l'akkazeh lähenöy stolan luo da tembuau zuaharničaspäi suuren palan zuaharii .Sen ottajes hänel pidi oijendua käzi muaman da hänehpäi ponnistuksis kumardunnuon tuatan keskeh .Häi tundou iččiedäh nägymättömäkse ,uvvessah sijoittuu sundugale , sie azettuu mugavembah , ainos vie kaikel sydä - mel tahtou toivuo , gu vahnembien pagin loppizih sobuh .
- A midäbo , heittelemätä tarattau muamah , minule vie nygöigi annetah vai seiččietostu vuottu . Konzu minä yhtyin Stepanan kel ...
Ei sua ellendiä , tahtougo häi ihastuttua tuattua vai nagraugo hänen piäl .Onnuako häi ni iče putilleh ei ellendä omua syväindy da himoituksii .
Silaigua tuattah juou toizen stokanan viinua .Hänen rožat enzimäi vallotah , sit ruttoh hiilutah , gu sähkölampaine halgiendua vaste .
- A äijygo vuottu sinule annettih , konzu Stepanan kel yhtyit ?! kyzyi tuattah da ylen äijäl iški kobral stolua vaste , kai juvvat da stokanat hypästettihes , a yksi vilku pystävyi lattien lahkoh .
-Midä sinä , midä sinä , avua silmät da pane malittuu !Midäbo minä mostu sanoin ?!muamah tovelleh hämmästyi , ga kaččou varuamata tuattahpäi ,hos vessel on jo muuttumas hämmästykseh .
-A sidä ! mängyy tuattah .Enne minuu sinä jo mene tiijä kenen kel vedeliittös !
Minägo ?algau kiehuo muamah .- Oh sinä , regänenä , Vologdu sogeibul'u . Muamah lekahutti kibien kohtan - tuattua suututtau , konzu muamo mustoittau sen , gu häi on vuottu nuorembi da viegi lähälnägöine .
- Parembi musta vai iččes vologdalastu mielespiettäviä ! Viizitostuvuodizennu segavuit kolmekymmenvuodizeh akkah - kolhozan piälikköh .Vahnu paimoi-died'oi tulou pertih , a työ päčil .Died'oi ei hämmästynnyh , kirgai : "Jumal abuh herroile !Piälikkö kirjanpidäjän kel ähkitähes !"Ha-ha-ha !Midäbo , saitgo vellat ?muamo nagrau da kaččou vihazil silmil .
Tabavunnuh tuattah hyppiäy da tabuau händy tukis , ribaittau latettu myö , vedäy koispäi iäre .
- Abuu ! Tapetah !pahal iänel kirguu muamah , tarteleh veriän pielizih .Tuattah ruttoh lykkiäy hänen pihale , kuulutah juhkahtukset .Joga juhkahtuksen aigah muamah čiihuou , rounu lugou niilöi iškuloi julgien hyvän mielenke :
- Stepan oli parembi ! Parembi !Parembi !
Rodi ei voi tirpua tädä ainastu torua , hyppiäy pihale da sambujal iänel kirguu :- Tata ! Älä tapa mamua !
On jo pimei , iändy myö häi ovvostau — muamah piäzi pagoh da juoksou peldozii myö meččäh .Tuattah lykkiäy kirvehen jälgeh , ga enimyölleh muga vai nareko , da matinke kiändyy kodih .
-Sinä midäbo et magua ?häi diivihes poijan nähtyy .- Da-a , kyyčittäy Rodi , varuau itkie täytty vägie ,
mamua mečäs hukat syvväh .
- Häi iče hos kenen syöy , sylgi tuattah , - matkua iäre muate ! Syöndypertis häi ottau peitetyn čekuškan da valau tävven stokanan :voi tädä Rodi tiedäy huondeksel tervehel piäl da yön aigah rounu laihtunuh tuattah lähtöy toizii taloloi myö muamua eččimäh .Onnuako löydäy Fisenkovis .Vai yksi se feršali ei varua tuattua .Sie händy ruvetah hätken čakkuamah da huiguamah .Muamah rubieu itkemäh da soimuamah tuattua sudre menetetyn elaijan periä .Sit tuattah heittyy polvilleh :
- Annine , prosti Hristua ruadi , sanou , en se minä , a viinu on viäry ... Sie brihaččuhäi vie on syömätä ga ...
Kodvazen peräs Fisenkova hengästäh da vagavazeh sanou : - Anni , perehhäi on .I muamah prostiu da , kui ennegi , kiändyy kodih .
Viinu kižuau
карельский: ливвиковское наречие
Новописьменный ливвиковский