Тексты
Вернуться к списку | редактировать | удалить | Создать новый | История изменений | Статистика | ? Помощь
Sem’onov P’otr . Kolmas nouzemu
Sem’onov P’otr
Kolmas nouzemu
карельский: ливвиковское наречие
Новописьменный ливвиковский
Rotkozen da
nouzemat , kudamat enne oldih täs , löyttih kerras .
Enzimäzen kuivanuon luhtazen da endizen ojaizelluo tuattah ei ni azetelluhes .Vai hillendi askelet , tarkah silmäili ymbäri da matkai ielleh .Rodi painui , tabai hiilavan valgien kivyön da juoksi tuatale jälgeh .
Toizen sezo kuivanuon nouzemalluo tulduu hyö seizatuttih .Tuattah hil'l'azeh selgämel pyyhkii märrän očan , opitellen löydi lačun kiven , istuihes sen piäle .Kynäbrykset viruttih polvenpiälöil .Häi hätken gu sogei kačoi nouzeman pohjah , kus päivypastol läpetti valgei čuuru linduloin jälgien kel .Onnuako linnut vahnah mustoh sežo sit ečittih vetty .Tuattah huolellizesti murčii Belomor-papiroskan , kodvazen vuotteli da viritti sen päivypastos nägymättömäl tulel .Häi syvästi hengästih , vieldi sydämeh da piästi yläh tabakkusavun .Muga häi istui da kurii gu mustettih , kai laihtuttih i häi rubei pagizemah himota , voibi sanuo laškattavah :
- Usko libo älä , a täs pučakkozes myö brihačunnu kazvatimmo havvin . Järves tabaimmo kämmenen piduhuon havviččuzen .Jo ammui enne siiriči nouzemas kävelles nagroimmo : vot gu täs olis suaja kalua !Piästimmö havviččuzen , a iče keskenäh taratammo - hätkengo elänöy ?Ga kačo eli .Kazvoi kai nengomakse havvičukse , tuattah käzivarrel miäräi havvičun piduhuon-kynäbryksessäh .- Kuibo muga ? Sil eihäi täs olluh nimidä syvvä , diivihes Rodi .
Dai myö emmo uskonuh .A se , näitgo , löpsölöi lainoili .Net ei tänne himos hypitty , a enimyölleh petties - vuozi oli ylen vilu .Sit se haugi oli "dijetal ".- A midäbo ielleh tapahtui ? Roittihesgo sit pienet havviččuzet ? kyzyi Rodi .- Mittumat havviččuzet ! Se ollus liijan mielevy dielo .Sygyzyl sen myö veimmö järilleh järveh .Talves poikki ei piässys - tupehtunnus .A nygöi kačo pohjua myö linnut kävelläh , saneli tuattah .
Häi murčii papiroskan , jygiesti nouzi seizoi .Muhahtih uskomattomil nygyzien koin ižändien sanoile da varmah lähti ielleh .Vai muheloitus vähitellen hävii - sil kohtal , kus nouzemal pidi olla , sidä ei olluh .Tuatto azetui .Kuundeli , tahtoi šolinehtu myö tunnustua sen kohtan vet kustahto rinnalhäi on !Smietindän vuoh häi toizen kerran meni sen matkan da piättiliijan äijäl otti oigieh čurah da , onnuako , nygöi meni jo loitombakse migu pideli .Punaldih järilleh , astui kiirehetä , puaksuh kaččelih .Häi tirpajen punoi silmii yhtes tuhjos toizeh da kannos toizeh .Rodi kualoi heinikös tuattah rinnal .Kiänyttih järilleh rotkon luo .- Gu liennemmö astunuh hyvin , rubei vagavah pagizemah tuattah , - sit nähnyzimmö hos kuivanuon nouzeman pohjan . Häi kačahtih päiväzehpäi , smietii midälienne i sanoi :- Vot midä , Rodi , sinä jo väzyit , istu täs tuhjon ual pilvežäs . - Ga minä en väzynyh , minägi tahton eččie , vastai Rodi . Sinä , velli , istu gu minä sanon , a vie parembi nojevu pilvežäh .Zvierilöi täs ei ole , a minä roimmos lähäl .Älä varua .Lövvän nouzeman dai kučun , sinä älä vai sijois lekahtai ,tuattah rubei tabavumah , kiistiä ei suannuh .— Sinä älä tuskevu , sinä välttämätä löydäzit , sinun silmät ollah nuoret , tarkat . Ga minul ičel se pidäy löydiä , älä varua , häi sanoi toizen kerran .
- Minä en varua . Rodi istuihes pajutuhjon uale da punaldih gu abevuksis .Tuattah vie kerran käveli sinne tänne .Nouzemaine oli gu tiedovoittu .Onnuako yhtelaigua hänel tuli piäh - a oligo nouzemua kolme ?Kačoi sen kaiken kohtan , kudaman tagan nouzemu nikui ei voinuh olla .Häi rubei sidä myö kävelemäh , kui enne pluugan taga .Häi vedeli nägymättömii vagoloi da kyndi oman muston pelduo , tahtoi tarkah mustoittua , kui häi enne meni rotkospäi nouzeman luo .
Löydiä gu muan uale uponnuh nouzemaine rodih kaikis vältämätöi ruado .I tuattah ruadoi .Häi kualoi omal nägymättömäl vavol hevos dai kyndäjäs tuači .Kyläs kazvanuh ristikanzu , mečäs häi hyvin maltoi puuttuo joga sijah .Häi nygöi kerras sanos , kudamas čuras n'okkohostu da dorogua seizou , kudamas čuras ollah pellot da kylä .Häi vois sanuo äijygo askeldu on niissäh .Net keskučat oldih hänen sydämes .Mugai enne oli nouzeman kel .Kusbo nygöi se on ?
Nouzemu hävii omal mual , kui hävii hänen tuattah voinale ."Hävii viestitä ". Vuottamata tuattah nägi : ihan pajutuhjon ual Rodi seizou polvilleh da kahmalol juou vetty , kudai valuu hänen sormis gu kagluniitti .
-Rod'ka !ravieh kirgai tuattah .Sinä tiijätgo midä juot ?!
-Midäbo ?Rodi nostaldi pöllästynyöt silmät .
-Midä !Midä !ihastuksis kirgai tuattah .- Sehäi on nouzemu , kudamua minä ečin . Kuibo sinä sen huomait ?
-Ylen äijäl himoitti juvva , a liikkuo sinä et käskenyh .Rubein kävelemäh pajus ymbäri : kačon ga tämä kivi viruu ,Rodi ozutti lačun juvvan tobjuon "blina-kiven ".
-Nostaldin sen , a sie puhtas vezi läpähteleh .Minä en tiedänyh , ongo se nouzemu .
-Muga , muga , tuattah silmil miäräi rotkon , - muga ongi !Kevätvezi uutti sen , rodih pitkembi , a minä sidä miäräilin reunaspäi da vie nengoine korgei paju on kazvanuh .
Onnuako hänel oli vähäzel abiehko , gu ei häi , a poigu löydi nouzeman , ga oli sit ihastustugi .Häi ei žiälöinnyh hyviä kost'umua , nojevui muale , hätken hil'l'azeh lainoili viluu vetty , istuihes da kuivakse pyhkii huulet .Vaste nygöi häi loppussah nägi , kui nämil vuozil kuivi da hävii täyzivezine nouzemu !Heikkoh tykki sen pehmei suoni , ga vezi oli endizenmoine .
- Rodi , sinä älä kačo nouzeman pienyöh , kuuletgo ? tuattah rubei pagizemah muheloittajen .Se on vie parembi gu on pieni .Kivel täppäit i sie sil on hyvä , viluine .Jogahizele käzih ei andai - segi on hyvä !A kel gu ylen äijäl himoitannou juvva , se löydäy .Löydäy , häi jatkoi uskottavasti .
Nygöi tuattah rodih ihan toizenmoine : pagizii da vessel .
A gu en minä löydänyh - se sežo on hyvä .Minun poigu se on yksikai gu minä , ga kai vie parembi .Sinähäi iče olet sežo nouzemu , vai olet kogonah minun ! Yhtes , vardoijen , hyö katettih nouzemu kivel .
-Tiijät , Rodi , minul on yksi mielyt , ga en tiijä kui sih dieloh sinun muamas kaččou .Minä sidä kai sinule en ruohti sanuo ...Eh , minä näin kolmeriädyizen soiton emändäl !häi muutti jyrkäh paginan .- Läkkä ..!
Rodi tabai tuatan käis da ihastuksis lähti astumah rinnal .Häi ei ruvennuh kyzelemäh tuattua sydämellizeh toivomukseh näh .Häi ičegi tiezi sen dai iče muga duumaičči .
Iespäi , tuatan mual , heidy vuotti vahnu ga luja kodi , a taganpäi jäi puhtas elävy nouzemu .
Kolmas nouzemu
карельский: ливвиковское наречие
Новописьменный ливвиковский