Тексты
Вернуться к списку | редактировать | удалить | Создать новый | История изменений | Статистика | ? Помощь
Nina Zaiceva. Sit' - sarnaline jogi
Nina Zaiceva
Sit' - sarnaline jogi
вепсский
Младописьменный вепсский
Homendesel
tuli käsk : Prokatovan brigadale ajada abuhu nelländehe brigadaha rugišt rahnmaha .Pahomov tuli sanumaha neciš , konz Prokatov i Vas’ka paniba radmaha kombainan .
– Nu ku tarbiž , ka lähtem nelländehe , – sanui Prokatov . – Ku sanuižid aigemba , ka mö kastedme oližim ajanuded .
Prokatov ei küzund-ki Vas’kal , lähteb-ik hän . A Vas’ka punoti päs , midä tehta . Ved’ hän ei voind ajada sinna , Tan’aine om tulnu .
– A midä sinä oled vaitii ? – küzui Pahomov Vas’kal .
– En teda . Kuverdaks päiväks pidab sinna ajada ?
– A ei-ik ole meile üks’kaik ? – küzui Prokatov . – Linnem sigä sihesai , kuni tarbiž . Voib olda , Sogrin-ki kohendab ičeze kombainan , siloi pigemba kaik radod lopim .
"Ei , ei voi ajada ! – lopuks päti Vas’ka . – Sinna om nel’l’toštkümne kilometrad , ed tule ehtal tänna . A Tan’aine tuli vaiše nedalikš kodihe ..."
Prokatov kuti tundišti Vas’kan melid i küzui :
– Ed-ik tahtoi mindai üksnäin jätta ?
– Prihale pidaiži lebaitas školan edes , – sanui brigadir . – Voib olda , keda-ni tošt löuta abunikaks , vai üsknäiž radaškad ?
– Ka minä voin ! – mahni kädel Prokatov . – Kacu , Vasilii , iče . Minä en tahtoi sindai pagištoitta .Miše sinä abutid minei , minä sada kerdad spasiboičin sindai .
Prokatov ezmäižen kerdan nimiti Vas’kad täudel nimel Vasilijaks .Hänen änes Vas’ka kulišti midä-se . Nece ei olend abid , a mitte-se kuti el’getomuz’ .I Vas’ka tezi , miše Prokatov tozi-ki voib jäda üksnäze i tehta kaik radod .
Vas’kale iški pähä : "Ka minä ved’ sanan andoin !Toivotin , miše školhasai linnen ..."
– Ka mikš mindai pagištoitta ? Minä sanuin , miše radaškanden školhasai , ka muga linneb-ki .
– Sinä , Vasilii , ed ole mitte-se orj . Ku om midä-se sinai tehmata , ka jä kodihe . A ku ei ka sanu kut saldat : lähten nelländehe brigadaha .Nelländes brigadas Prokatov tegi uden aigmäran .
– Aig ei mäne , se lendab . Radaškam homendesespäi ühtes , kastedme .Lebaita zavodim eriži .A möhemba söm longid eriži , miše kombain radaiži kaiken päivän .El'genzid-ik ?
– A ku minä en voi üksnäin ? – sanui Vas’ka . Hän toivoi radmaha üksnäze i varaiži sidä .
– Sinä holevašti . Ala rigehti .Miše ol’gid heitta , ka seižutade .
Ezmäine radpäiv oli ani hüvä .Zavodiba rata pol’tošt časud aigemba , lopiba – koume časud möhemba .Hö tegiba kaks’ polenke normad .Prokatov oli ihastusiš , hot’ väzunu oli i habi seižui jaugoil .
– Näged , kut čomin radoim ! – sanui hän , konz astuiba pöudospäi . – A sinä tahtoid neiččen tagut jätta radon . Mugoižes azjas pidab mahtta pidäda ičtaze ...Sinä vaiše eläda zavodid !
Vas’kal vil’skahti päs : "Jose tedab Tan’aižes ?Ei voi olda mugomad !".I sanui :
– Mitte neižne ?
– Nu minuspäi ed voi nimidä peitta ! Minä en voi sanuda Tan’kas nimidä hondod .Vaiše žal’ om , miše lidnha ajoi .Ka ved’ ken nügüd’ ei kacu lidnaha ?Mugoižid , kut minä da sinä , da völ Pahomovad , keda ma vedäb ičezennoks , ei ole äi .A man vald om ani vahv !Sinä völ ed teda necidä lophusai .
Prokatov astui levedoil haškuil , oli mugoine tundmuz , miše hän kuti kazvab maspäi .I sidä ei voind kulda uskmata , miše hän armastab mad kaikel hengel .
Prokatov jatksi :
– Ku mö sinunke em kazvataška villäd , da em rahnoška sidä , ka sinun Tan’aižele ei mindä linneb söda lidnas .Neciš mušta !Kaik vägi om maspäi !Ku ma ei anda villäd , ka zavodad-ki ei radaškakoi , raketad ei lendaškakoi .Kaik elo lopiše ...
Prokatov pagiži sidä , miš Vas’ka tezi i kuli äi kerdoid .No sid’ , pöudos , nene sanad ristitulpäi , kudamb om vahvas sidotud manke , nene sanad oliba kuti völ-ki todesižembad i oiktembad .Vas’kale oli mel’he kulda , miše Prokatov händast-ki pani sille-žo pordhaižele , pagiži ei vaiše ičezes , no Vas’kas-ki .A Prokatov kaik pagiži :
– Kacu , mikš Pahomov tuli tagaze lidnaspäi ?Miše dengoid ei täudund , ka nece kelastuz om !Kaks’ poigad hänel , sured jo oma .Edel-se eli , a nügüd’ , konz poigad sured , ka eläškanzižiba völ-ki paremba .Ei ! Hän pördihe , sikš ku ma tagaze vedi .I nägištad – völ äjid tob tagaze , ken ajoi lidnoihe !A ku ed navedi mad , ka küläs ei midä tehta .Kacu Aks’onovaha , enččehe brigadiraha .Ei vedänd händast ma – i ristit kadoi !Varaidan , miše Tol’ka-ki mugoižen kazvoi .Kacu , lidn vedäb , asfal’t , laukad , lidnlämbituz ...Polespäi kaik om kuti rustvauvalaz .Ka mikš sinei pagižen ?Sinä iče tedad . Sinä jo tedad , mille leib haižub , higod-ki äi valoid .Sindai ma vedäb ! Sinä mad nikonz ed unohta jo .Sinä mahtad rata mal , voib olda , vahvemba mindai mal seižuškanded .Mugoižil pidäse-ki külä , a ku eläb külä , ka lidn-ki voib eläda .Naku mitte azj !Sinä oled elos kuti päheng , päazj , kut mitte-se palaine kombainas .Ku se om , ka kaik mašin radab ...
Prokatov pagiži äjan .Erašti hänen päle kuti tuleskeli mugoine mel’ – kehitoitta ičeze mel’pidoid , sanuda ičeze sijas elos .No mugoižid südäimeližid sanoid Vas’ka kulišti hänelpäi ezmäižen kerdan .Hän tahtol kundli aigvoččen sebranikan i opendajan sanoid , riži neniš sanoiš süvid tundmusid , miččed koskiba hänen-ki , Vas’ka Gusevan henged , löuziba siš süvid jurid , käskiba meletada ičeze elon polhe , miččes hän zavodi tehta völ ezmäižid haškusid
Sit' - sarnaline jogi
вепсский
Младописьменный вепсский
–
–
–
–
Анатолии Петухов
Сить - таинственная река
русский
—
—
—
—