Ошибка:
Недостаточно прав на выполнение этой операции
Тексты
Вернуться к списку | редактировать | удалить | Создать новый | История изменений | Статистика | ? Помощь
Olʾga Smotrova. Inga Gurilova: “Meil jo ei tävvy vaiku mustolaudua”
Olʾga Smotrova
Inga Gurilova: “Meil jo ei tävvy vaiku mustolaudua”
карельский: ливвиковское наречие
Новописьменный ливвиковский
Jo
25 vuottu peräkkäi Anuksen kanzallizen kirjaston perustehel pietäh festivualii karjalazen kirjuttajan Vladimir Brendojevan mustokse .
Festivuali jatkuu läs kogo vuvven aloh , sih kuuluu eri pidoloi da kilboi , festivualin jälgimästy päiviä , kaikis suurimua piduo , tavan mugah pietäh Vladimir Brendojevan roindupäivänny , 6. syvyskuudu , libo sidä vaste .
Tänä vuon perindöllizesti festivuali algavui avajazil Anuksenlinnan Polevaja-pihas , koin n :u 39 luo , kus jälgivuozinnu eli Vladimir Jegorovič .Sit rahvas käydih kirjuttajan kalman piäle Kuunilan hieruh .
Programmah kuuluttih literatuuručuassu da Marina Babalikan kniigan "Letopis’ Läkköli .Kristall volšebnoi storoni " prezentatsii da pyöryžy stola Anuksen kirjastos "Kirjuttai Vladimir Brendojev minun elokses ".
Pyöryžän stolan aigah rahvas musteltih , mittumannu ristikanzannu oli kirjuttai .Kaikin , ket tiettih Vladimir Brendojevua , sanotah , ku häi oli ylen syväsydämellizenny , ainos tahtoi paista oman rahvahanke karjalakse , kiisti kieleh nähte , tozikarjalazennu olles oli omanenäine .Sih nähte mainiččigi kirjuttajan rodn’u Galina Terentjeva , häi lämmil sanoil musteli Vladimir Jegorovičua : kui pagizi omas muamankieles , kui suvaičči sanelta meres merimiehenny olles .Galina Mihailovna kehoitti aktivistoi da vallasolijoi panemah kundohj kirjuttajan kalmua , kerdu ku sinne joga vuottu kerävyy rahvastu .Kalmu olis hyvä luadie dizainuprojektan mugah , omahizetgi pannah sih ruadoh den’guvuitin .
Festivualis ilmoitettih , ku samannu piän , 5. syvyskuudu , Anuksen piiris vuozi 2026 ilmoitettih Vladimir Brendojevan vuvvekse .Lähiaigua roih luajittu orgkomitiettu vuvven pidämizeh niškoi , kunne kučutah eri laitoksien ruadajii , kielialan spetsialistoi .
Kanzallizen poliitiekan ministerstvan ruadai Jelena Migunova saneli pluanois tuliekse vuottu , konzu kuulužan karjalazen kirjuttajan roindupäiväs täyttäy 95 vuottu .Ezimerkikse , vuvven aloh piettävis kilvois rodieu kyzymyksii Brendojevah da hänen tuotandoh nähte .
Karjalazien X kerähmön vallittuloin nevvoston piälikkö Inga Gurilova nosti vie yhten tärgien kyzymyksen :
– Meil jo ei tävvy vaiku mustolaudua , kudaman luo seizommo 25 vuottu .Rubiemmo kirjuttamah Kul’tuuruministerstvah , ku ilmoitettas kilvan vestäjile Vladimir Brendojevan mustopaččahan luadimizekse .Virrallizesti miärätty kohtu sih niškoi meil on , pidäy luadie mustopačas Vladimir Jegorovičan 95-vuozipäiväkse .Omas puoles avvutammo , olemmo valmehet yhtymäh kaikkih talgohruadoloih .Häi oli ristikanzu , kudai oli lekahutannuh meijän omaničentunnon .Kaikin nähtih , ku kirjuttua voibi , ku niken ei ole tiel , ozuta vai omua iččie , omii tundoloi .Brendojev oli luadinuh suuren panoksen karjalazien omaničentundoh .
Anuksen karjalazet -liiton piälikkö Vladimir Lukin pagizi sih nähte , ku Anukseh olis hyvä luadie etnokestus , kudai kandas Vladimir Brendojevan nimie .
Pruazniekas äijän huomivuo oli omistettu kirjuttajan Kadajikko-runoelmale .Sen rakendamizes , nimes da toizis eričyksis tarkah saneli alavozelaine Valentina Libertsova .
Inga Gurilova: “Meil jo ei tävvy vaiku mustolaudua”
карельский: ливвиковское наречие
Новописьменный ливвиковский
–