Тексты

Вернуться к просмотру | Вернуться к списку

Šilta on valmis!

История изменений

22 сентября 2025 в 11:05 Нина Шибанова

• создал(а) текст
• создал(а) текст: Jyškyjärveššä šijoutujan 102-metrisen šillan peruškorjauš Čirkkakemijoven yli on šuatu loppuh ennein miäräaikua. Korjauštyöt šuoritti petroskoilaini SP5-yrityš, min piätoimialana on šiltojen ta tunnelien rakentamini. Muissutamma, jotta šilta oli pantu kiini pakkaiskuušta alkuan. Kyläläiset kerrottih šen vuarallisešta kunnošta sosialimediašša. Eläjien mukah Jyškyjärven puušilta, mi yhistäy kylän piirikeškukšeh, jo pitälti on ollun pahašša kunnošša, eikä šen lumešta ta jiäštä puhissušta luajittu. Pakkaiskuušša paikallisen eläjän auto liuškahtu šillalla ta vähältä ei kirpon jokeh. Šen jälkeh Venäjän tutkintakomitietan piämieš Aleksandr Bastrikin miäräsi alottua prosessualisen tarkaššukšen, ta šilta pantih kiini. Jotta peruškorjauš olisi mahollini, Karjalan parlamentti tuki tašavallan piämiehen Artur Parfenčikovin ehottamie muutokšie tašavallan b’utžettih. Šen anšijošta tiešiätijöllä miärättih lisävaroja – yli 100 miljonie rupl’ua, kumpasista oša käytettih Jyškyjärven šillan korjaukšeh. Korjauštyöt startattih heinäkuušša. Vuotetun objektin vaštahotto tapahtu ennein miäräaikua – 2.^ šyyškuuta šajekuun 31.^ päivän ieštä, melkein kakši kuukautta aikasemmin! Jyškyjärven kylähallinnon johtaja Marina Sobolevskaja tovisti, jotta yritykšen ruatajat šuhtauvuttih tehtäväh erittäin vaštuullisešti. – Hyö ruattih kuin mehiläiset, oltih paikalla jo huomenekšešta alkuan. Ei rokulija, ei vapuapäivie, vihmašša ta suarušša. Moločat! Miehien ieššä šeiso šuuri proplema: šillan vanhašša rakentehešša ei ollun kivie. Heijän piti löytyä aikua ta voimie kivien eččimiseh ta kulettamiseh. Olemma hyvin ilosie, jotta juuri SP5-yrityš voitti kilpailun. Šillä oli kuuši kilpailijua, ta mieli voittua nuijamyönnän johtajan piti laškie urakan hinnan 16 miljonih, kerto Marina Vladimirovna. Kivie käytetäh šillan rakentehešša keštävien tukien, pitkäikäsen peruštan šekä vejen ta pakkasen vahinkollista vaikutušta vaštah šuojuamisekši. Kiviperušta keštäy šuuremman painon ta palvelou pitempi kuin puurakentehet. Nyt jyškyjärviläiset kirjutetah ilosie kommenttija sosialimediašša: – Hurraa! Hurraa! Passipo kaikilla, ket ošallissuttih täh tapahtumah. Meijän unelma toteutu. Toivottavašti kaikkien toivot käyväh toteh. Pitäy uškuo parempah. Onnie ta mäneššyštä kaikilla, kirjuttau Valentina. – Ta täššä še on, meijän šilta, valmis – ta myö olemma onnellisie! Nyt kaikki riippuu meistä, šuaren eläjistä, ta tietyšti niise hallinnošta, jotta šilta ruvetah pitämäh kunnošša ta jotta še aina tulou valmis kaimuamah šuaren eläjie kotiloih šekä heijän vierahie kostih kauneheh Jyškyjärven kyläh! kommentoi L’udmila.