Тексты
Вернуться к списку | редактировать | удалить | Создать новый | История изменений | Статистика | ? Помощь
Nina Zaiceva. Sit' - sarnaline jogi
Nina Zaiceva
Sit' - sarnaline jogi
вепсский
Младописьменный вепсский
Kahtes
päiväs kül’mkun augotišespäi satoi lunt .Se veri jo kül’mnudehe maha , sikš kut-se heredas kaik vaugištui : mec , nitud , pertiden katused .Eskai ted tegihe ani vauktoikš .Nenidme vauktoid tedme lapsed internatoišpäi tuliba kodihe sügüz’lebule .Vit’ka , Sergei i Vas’ka kožuihe , miše lähteba mecha , Sitin üläladvale , i nügüd’ seižuiba Sergejan pertinno pagištes , ken midä otab kerdale mecha .
– Minä otan oružjan , kirvhen , virid , solad , – sanui Vas’ka . – Otan völ katl’aižen kartohkanke .
– Meil kodiš om hoik brezent . Sil hüvä om kattas mecas , mö tatanke kaiken sidä otlem kerdale , – sanui Vit’ka .– Kirvhuden mugažo otan . Öd nügüd’ pit’käd oma , tarbiž enamban haugoid .
– Ala unohta kompasad , – johtuti Vas’ka . - I patronoid . Minai ved' ei ole .
- Hüvä . Kruškad völ pidab otta čajud joda ...
Konz kaikes oli pagištud , prihad läksiba kodidme .Gusevoiden pertinno venui sur’ kogo parzid .Niid todihe , voib olda , eglai .Jäl’g traktoraspäi völ nägui .Čogaižes aidan i parz’kogon keskes venui penikaine koditoi Tobka-koiraine .Kulištades haškuid se pani korvad püštti i zavodi pudištada händal .
– Ei-ik sinei , Tobka , vilu ole ? – küzui Vas’ka . – Lähtkam meidennoks . Koiraine jokseškanzi Vas’kan taga .Se oli mugoine kuti taksan vuitte koiraine , ei olend čoma , sikš ku siš oli segoitadud äi erazvuiččid koiriden semnid .
– Oled sinä , prihač , iloisine ! – Lähted-ik minunke mecha , – sanui koirale Vas’ka .
Koiraine maihahti händal .
– Lähted , vaiše sinuspäi ei ole sigä tolkud .Äjak kerdoid otin sindai kerdale - nikeda ei löudand .
Vas’ka sai sumkaspäi leibpalan :
– Sö , raukaine !
Tobka tembaiži leibpalaižen i läksi sille-žo sijale , kus magazi , a Vas’ka tuli kodihe .
– Mamoi , midä meile mugoižid haugoid todihe ? – küzui hän , tactes čogaha sumkan kirjoidenke .
– Miččid haugoid ? – Darja pühki käded ezipaikaha . – Ivan Prokatov kirjuti meiš kolhozan pämehele , miše pert’ tarbiž koheta .
– Kenen pert’ ?
– Ka meiden ! Minä olen kuti invalid , a sinä völ oled openik .A pert’ kuluine habi seižub , voib langeta .
– Ka i midä ?
– No kaik tugeziba meid . Naku parzid-ki todihe .Sanutihe , miše kohetas pertin maksuta .
– Oliži hüvä .
– Ka . Nece brigadir ku sanan andoi , ka kaiken tegeb .A tö midä täs tegid ?Ik möst mecha lähted ...
– Ka !
– Hätkeks-ik ?
– Koumeks päiväks . Seičemenden päivän tulem .Kaiken Sitin tahtoim mända .
– Tuleb-ik Tan’aine sügüz’lebule ?
– Ei . Sergei sanui , miše heid Moskvaha ekskursijale vedas .
– Kacu-ške ! Moskvaha ! Nu olgha . Konz lähted mecha , ka siloi minä en paštaškande .
Vas’kale johtui mel’he , miše jäl’gmäižen kerdan miččen-se praznikan aigan , konz hän oli mecas i tuli kodihe , ka löuzi maman irdal .Hän oli humalaz .
– Lähted-ik adivoihe ?
– Lähten , mikš kodiš üksnäin ištta .
– Ala mäne , ika linneb , kut jäl’gmäžen kerdan .
Darja kacuhti tarkas poigaha .
– Jose laitoi minun päle ? Tegitoi aigvoččeks .
– Minä en laide . Pakičen vaiše , miše ed joiži sinä .Jäl’ghe ved’ ičeleiž-ki huiged om rahvahan edes .
– Meletad-ik , miše minei üksnäiž kebn om ühten-se kädenke ? Muupäivin kuti kebnemba , a praznikan en teda , midä tehta da kuna mända .Vas’aine , ved’ ei olend minai ozad-se !
Vas’ka kulišti maman sanoiš midä-se kuti ut , hot’ tezi neciš , kut mušti ičesaze .Muštho tuliba Prokatovan sanad : "Enamba mušta läheližid , meleta , kut heile om rindal ".I hän el'genzi , miše ei voi jätta mamad praznikal .
– Kule-ške , mama ! Tegem muga .Mäne laukaha , osta midä-ni magukast .Da minei-ki suhrižid kerdale osta .Konz minä tulen , ka tegem praznikaižen .Paštam kalakurnikan , maimlent keitäm ...I minä kucun prihaižid , Sergejan , Vit’kan .Naku ühtes ištum-ki .
– Kacu iče , kut paremba . En tahtoi-ki adivoihe .Toižed praznuičeba , a minä pidän meles , kut minä sinuta jän .Ala aja lidnaha !
– Nikuna minä en lähte . A ku lähten-ki , ka ved’ sinunke .En jäta sindai üksnäiž .
– Voi , kut muga oliži-ki . Vaiše , konz kazvad , ka unohtad nene sanad ...A minun toivod kaik om pandud vaiše sinuhu !
Sit' - sarnaline jogi
вепсский
Младописьменный вепсский