Тексты
Вернуться к списку | редактировать | удалить | Создать новый | История изменений | Статистика | ? Помощь
Alina Gapejeva. Elaigu junan rattahien kolaitukses
Alina Gapejeva
Elaigu junan rattahien kolaitukses
карельский: ливвиковское наречие
Новописьменный ливвиковский
Elokuun
enzimäzenny pyhänpiän raududorogan ruadajat pietäh omua ammattipruazniekkua .Tänävuon se piädyy 7. päiväh elokuudu .
Raududorogan ruadajien ammattipruazniekkua rubieu pidämähgi jessoilču L’udmila Vasiljevna Vakal’uk .Inehmizeh niškoi se päivy on muite muis : hänen elaigu ihan lapsusaijas oli kiini siiriči ajanuzien junien rattahien kolaitukses .L’udmila Vasiljevna on roinnuhes kois , kudai seizoi Jessoilan raududorogustansien rinnal .Pieni lapsi uinoi da havačui rel’soin da vagonoin rattahien kilineheh .Muga rodih , ku inehmizen eländypaikku on miärännyhgi tulien ruavon .L’udmila Vakal’uk ruadoi Jessoilan raududorogustansien päivystäjänny läs 38 vuottu .Raududorogan johtokunnas häi äijän kerdua on suannuh kunnivo - da kiitändykirjastu omas vaigies ruavos .Nygöigi L’udmila Vasiljevnua ei unohteta – joga vuozipäiväkse tuvvah hänele lahjua Ven’an raududorogan veteruanoin nevvostospäi .
LUJATAHTOZENNU ON MUAMAHES
Paginan omah elokseh nähte L’udmila Vakal’uk algoi perehal’bouman ozutandas .Hänen muamah Aleksandra Ivanovna oli prostoi da ruadai inehmine .Häi kazvatti aino tytärdy yksinäh .Elettih köyhästi , kui äijät sen aijan tyttözet da brihačut .Tyttöine ei istunuh joute – midä sai , iče ruadoi kois .Häi sanoi , ku muamah enämbän 30 vuottu ruadoi raududorogal .– Oppikkua duumaija , mittuine häi oli kunnivohimotoi , sanozin , umbimielinegi , omien sanoin tovestuksekse L’udmila Vasiljevna ozuttau Aleksandra Ivanovnan tukun dokumentua da tovestustu Ižänmuallizel voinal olendas . – Kaččokkua , tämä on vuvven 1945 tovestus Germuanien voitandas -medalin annandas . A tuo on denguavun annandas .Minä net petties lövvin , jo täyzi-igäzenny olles , da en voinnuh ni smiettie , ku muamo oli voinal .Paginuahäi meijän kois hirvielöis voinuvuozis häi nikonzu ei pidänyh .Pidäy sanuo , ku lujatahtozennu da ruadajannu L’udmila on muamahes .
EI SUA DOROGAL HAIRUO
Školan loppiettuu tuli aigu vallita oma tulii ammatti .Školan opastundutovestuksen otettuu L’udmila lähti Petroskoih , tahtoi piästä opastumah Karjalan pedagouguinstituuttah liikundukul’tuuran tiedokunnale .Ulgoatletiekan , uidelemizen da gimnuastiekan tutkindolois piästyy vihjai , ku opastajan ruado ei ole hänen , sendäh iäre otti dokumentat da tuli järilleh kodih .– Muamo sanoi , ku minul pidäy lähtie ruadoh , hänen yhteh palkah jygei roih eliä , mustelou L’udmila Vasiljevna . – Parahite raududorogal ečittih Kutižman stansiele yhtevyksen azettai , minä lähtingi sinne ruadamah . Seiččietostuvuodizele neičykäle ruado ruadudorogal ozuttihes jygiekse , ga mielenkiinittäjäkse .Oman enzimäzen ruadopäivän inehmine ylen hyvin mustau .– Vahnin konehmuasteri sanoi minule , kui da midä pidäy ruadua , sanelou L’udmila Vasiljevna . – Minä varain , ku unohtan midätah , sendäh kirjutin kai tetrattih . Neičykky oli nerokkahannu opastujannu ,ruado hänel rubei käis lähtemäh .A omien ruadoloin jälles häi kiirehti Val’at’outalluo päivystyspertih , kus oli junien ohjavokeskus tämän stansien hantuzis .Se perti , kus oldih erilazet näppäimet , vibukytkin da pilkettäjät lampočkat , nuoreh L’udah niškoi oli kosmossulaivu rouno .Ližäkse tyttösty miellytti se , ku stansien päivystäjäl oli ainavol oigevus junien liikundan ohjuandas : niilöin vastahotandas , työnnändäs da laskendas .Moine komandiiru se oli .L’udmila kačoi Val’at’outan ruaduo da hil’l’akkazin iče harjavui sih , rubei tiedämäh kai terminät da ruavon eričykset .Tämä aigu ei mennyh sudre : neičykky lujah piätti , ku tahtou olla stansien päivystäjänny .Häi vuotti tulien opastusvuvven allandua da piäzi opastumah Petroskoin opistoh , kus valmistettih raududorogan ruadajii .Händy rakkahal otettih opastumah .Opastui viidozih ,ruadajes suavut tiijot da nerot avvutettih opastundas .– Minä jo äijän tiezin raududorogustansien ruavon eričyksis , muheloittajen sanou L’udmila Vakal’uk . – Silloi konzu minun kursudovarišat istuttih opastuskniigoinke , minä kačoin mittumuatahto kinuo linnan kinoteatras .
OLIGO VAIHTORUADAI VIÄRY ?
Opastusharjaittelun aigah L’udmila ehti ruadua vaihtoruadajannu .Tänäpäi jo et näe vaihtoruadajan pikkarazii ruadomökkizii .Ga sih aigah vaihtoruadajan ruado oli tarvittavu , ku junien ajanduraiživot oldih käzin ohjattavat .– Toinah juoksendelin opastusharjaittelun aigah Tomitsois ! jatkau paginua L’udmila Vasiljevna .– Ei se ruado olluh kebjei . Et muga helpoh vaihta strelkua .Toiči , ku suas junan työndiä oigiele raiživole , pidi kuuzi strelkua vaihtua .A konzu ajau se siiriči yhtel raiživolpäi toizele , pidi azettua kai endizeh tilah .Sanakse , tundiettu sanondu "vaihtoruadai on kaikes viäry ", endine raududorogan ruadai ellendäy sana sanah .Häi mustelou , kui vaihtoruadajan hairahtuttuu odva ei ähkähtettyhes vastakkai kaksi tavarjunua Papero-stansiel .Junanajajat aigoinaijal ehtittih azettua net ,junat azetuttih puolimetrii toine toizes .
STANSIEN PIÄLIMÄINE
Opastundan loppiettuu nuordu ruadajua jo vuotettih kodimual .Neičykky hyväl mielel ottihes ruadoh , pyöri ku hyvä härkin : otti vastah da työndi matkah junii , möi lippuloi kasas .
Ainos musti tuvva aigoinaijal hiildy da vetty stansien taloin lämmittämizekse .L’udmila Vasiljevnua puaksuh työttih ruadomatkoih .Raududorogal inehmine ehti ruadua kaikil stansieloil Petroskoi-Suojärvi -kohtas .– Kaikkie enämbäl varain jyryy , sanelou häi . – Oli toiči mostu , ku tuleniškus heitti ruandan ohjavuspul’tu päivystäjän pertis . Midä sit ruat ?Pidi kuččuo konehmuasteri .Kuni häi kohendau , junat oldih käzin ohjattavat instruktsien mugah (kirjutettih lippu junanajajale ).
HENGELE HOIVU
Jo seiččietostu vuottu L’udmila Vakal’uk on eläkkehel .Omua ruaduo unis vai jälgimäzinny vuozinnu ei näe .Pahakse mielekse 72-vuodizel inehmizel puaksuh on verenpaine – vikse tervehyöh ollah vaikutettu yöruadovuorot da vastuolližus joga dielos .L’udmila Vasiljevnal on poigu da tytär .Ylbeilöy inehmine omii tyttöbunukkoigi – Sofjua da Ol’gua .Yhtes tyttölöinke buabo muovailou plasteliinas , kävelöy pihal , pastau čupukkua , nieglou .Nämä tavallizet ruavot annetah hengele hoivan .
Vie inehmine suvaiččou ottua bunukkoi käzis da nenga hil’l’akkazin käzitysti astuo Jessoilan stansiele .Siiriči ajajien junien yksiluaduine liikundu tässäh huolevuttau endizen raududorogan ruadajan hengie .
Elaigu junan rattahien kolaitukses
карельский: ливвиковское наречие
Новописьменный ливвиковский