Тексты
Вернуться к просмотру | Вернуться к списку
Piäruavot karjalan kielen da kanzallizen kul’tuuran valdivollizes kannatusruavos vuvvekse 2020
История изменений
30 октября 2025 в 13:00 Александра Родионова
- создал(а) текст
- создал(а) текст: Vuvvennu 2020 Karjalan tazavaldu pidäy omua 100-vuozipäiviä. Tänäpäi Luodehpuolen federuallizel alovehel Karjalan tazavaldu on enzimäzenny karjalan kielen, etnožurnalistiekan, etnogruafien, literatuuran, kniiganpainandan kannatandas, karjalan kielen da karjalazen kul’tuuran säilytändäs da kehitändäs, kanzallizien yhtistyksien luomisruavon kannatandas. Vuvvennu 2020 ruvetah vie enämbäl ruadamah karjalan kielen säilyttämizekse da kehittämizekse, karjalan kielen käyttöalan suurendamizekse da muan etnokul’tuurupotensiualan kehittämizekse. Enämbi varua roih annettu intellektuallizien da ainehellizien resursoin yhtistämizekse karjalazien kieli- da kul’tuuruidentitietan lujoitandas, karjalan kielen sähköopastusohjelman kehittämizekse da sen käyttöh ottamizekse. Nenga Karjalan tazavallan halličus on suurendannuh Periodika-julguamon rahoittamizen 26 000 tuhandes rubl’as vuvvennu 2019 – 43 621 tuhandessah vuvvennu 2020, iellehpäi rubieu jatkumah Karjalan tazavallan karjalazien, vepsäläzien da suomelazien resursukielikeskuksen ruavon kannattamine da sen ainehellis-tehniellizen perustehen parandamine. Karjalan tazavallan halličus Kandurahvahien perindöllizien eländykohtien etnosotsialine- da etnokul’tuurine kehitys -ohjelman hantuzis on pannuh alguh 6 miljonan suuruon abudengoin juanduruavon kanzallizien Priäžän, Anuksen, Kalevalan piirilöile, Onieganrannikon, Belomorskan, Karhumäin piirilöin kilburuadoloih, niilöin joukos: • tiijoitus- da nimilavvoin luadimine karjalan da vepsän kielel, • karjalan kielen kursiloin pidämine täyzi-igäzien keskes da opastuslaitoksien ulgopuoline karjalan kielen opastandu päivykodiloin da školaopastujien keskes, • kanzallizien pruazniekoin kannattamine, • kul’tuuruperindön paikallizien objektoin säilytändyruavot. Karjalan tazavallan valdivovallan laitoksien, piirilöin da linnukundien paikallizien ičehallindoloin da karjalazien yhteiskunnallizien yhtistyksien kiindei da tolkukas yhteisruado avvuttau kul’tuuran säilytändäs da kehitändäs, karjalan kielen käyttömahtoloin leviendäs nygymuailmas, tazavallan popul’arizatsies hyvänny eländäh da investitsieloin sijoitandah niškoi alovehennu, kanzoin oigevuksii etnokul’tuurizeh kehitykseh niškoi turvuajannu da sen imidžan lujitandas. Karjalan tazavallan valdivollizen Kandurahvahien perindöllizien eländykohtien etnosotsialine- da etnokul’tuurine kehitys -ohjelman hantuzis annetah varua iellizihgi ruadoloih: Karjalan tazavallan 100-vuozipäiväle da Voiton 75-vuozipäiväle omistetun Karjalan tazavallan karjalan-, vepsän- da suomenkielizien TV:n da lehtitoimittajien ruadoloin kilvan valmistamine da pidämine, Karjalan tazavallan piämiehen tyves ruadajan Tazavallan sanastokomissien ruavon hommuandu, Karjalan tazavallan karjalazien, vepsäläzien da suomelazien resursukielikeskuksen ruavon kehittämine, Karjalan tazavallan karjalazien ozanotandan kannattamine kanzoinvälizis, alovehienvälizis, tazavallan da paikallizis pidolois (seminuarois, konferensielois, kongresois, festivualilois, ozuttelulois, ”pyöryžis stolis” da toizis etnokul’tuurualan pidolois), Oma Mua -lehten 30-vuozipäivän pidoloin valmistandan da piendän kannatandu, Karjalan tazavallan Karjalazien IX kerähmön vallittuloin nevvoston da rahvahan vastavuksien hommuandu, Karjalan da vepsänkielizen sanelun valmistandu da piendy Karjalan da vepsän kirjukielen päivän hantuzis, Karjalankielizen videon luajindu Karjalan kandurahvahis da sen ozutandu Karjalan TV:s, Karjalan kielen tiedäjien verkokilvan piendän hommuandu, Karjalaine kruuga -flešmoban piendy Kanzoinvälizen kandurahvahien päivän hantuzis, Karjalazen rahvahan Oma Pajo -horan video- da audioantolougien luajindu horan 30-vuozipäiväkse, Kalevalan paikallizen yhteiskunnallizen karjalan kielen da kul’tuuran kannattamizekse ruadajan Uhut-seuran da Karjalan alovehellizen yhteiskunnallizen karjalazien etnokul’tuuruperindölöin kannattajan Oma tulehmo -yhtistyksen vuozipäivän pidoloin kannatandu, Karjalan kielen nedälin piendy.
- создал(а) перевод текста