Тексты
Вернуться к списку | редактировать | удалить | Создать новый | Статистика | ? Помощь
Alina Gapejeva. Joga ruado käis lähtöy
Alina Gapejeva
Joga ruado käis lähtöy
карельский: ливвиковское наречие
Новописьменный ливвиковский
PARAS
ŠOUFERI
Naizet maltetah ruadua kaikkie libo läs kaikie .Yhtelaigua naine maltau luadie äijy ruaduo : valmistua syömisty , paista dovarišanke telefonas , pidiä huoldu voimatunnuzis lapsis dai tervehes ukos .
Erähien tiedoloin mugah naizet ajetah mašinal tarkembi miehii .Parahannu šouferinnu Kiškoinniemes pietäh Tatjana Hyresty .
Enne eläkkehele lähtendiä naine ruadoi opastajannu Petroskoin avtoškolas .Enämbän 20 vuottu Tatjana Jurjevna opasti ristittyzii ajamah suurel GAZ53-gruuzumašinal .Hyväs ruavos naine sai Ven’an avtotransportan kunnivoittu ruadai -rindumerkin .
Oli aigu , konzu Tatjana ruttoh ajeli suurel opastundumotosiklal linnan keskuččua myöte .Neidine ainos suvaičči ajua ylen ruttoh .Nuori ajai huaveili roita liäkärikse , ga piäzi opastumah avtotransportan opistoh .Kodvan aigua naine ruadoi miehien keskes da opasti rahvastu ajamah mašinal .Opastujil oli mieldy myö ruadua Tatjananke , naine ainos tiezi , mi pidäy ruadua vaigielois tilandehis tiel .
RUADUA MIEHIEN JYTTYÖH
Nerokkahat šouferit-opastajat hyvin otettih vastah Tatjana , kudai hyväh luaduh ajoi mašinal .Mužikat ruvettih kunnivoimah Tatjanua sitgi , ku häi iče pidi kunnos mašinua da opasti sih ruadoh opastujii .
Neidine pani piäle šouferile pädijät sovat – džinsat , lyhyön takin , kangasšuapkan da krossovkat .
– Miehet paistih minun kel ihan kui paistih keskenähgi . Minä opin olla lujatabazennu da vägevänny .Minun "n’ankakse " niken ei ruvennus .Ku tullet ruadoh – rua , on varmu Tatjana .
SANOTTU – RUATTU
Kerran erähäs mašinas mureni kytkin .Sen kohendamizeh pidi äijy aigua , remontu on vaigei .Abuh olis kučuttavu rauduseppy , ga on vaigei löydiä tolkus olii seppy aijoi huondeksel .
Sendäh tuli kohendua kytkin ičeväil .Naine otti mašinaspäi iäre jygien vauhtiloin korobkan , eroitti kytkimen kožuhat ...Pidi midälienne nostua , kolaittua dai yhtistiä .
Sit pidi azettua kai järilleh .Tatjanal pidi ruadua higi očas ...Konzu rauduseppy havačui , kai ruavot oli jo ruattu .
Tatjana Hyrenen on harjavunnuh ruadamah kaikkie iče .Nygöi naine on eläkkehel .Kyläs eläjes hänel on äijy ruaduo : suomiu lundu , lämmittäy kylyy , ajau vagoloi dai mašinal ajelou kalah .Yhtelläh vagevälgi naizel toiči pidäy huoldu .Abuh tullah ukko da poigu .
Joga ruado käis lähtöy
карельский: ливвиковское наречие
Новописьменный ливвиковский