Тексты
Вернуться к списку | редактировать | удалить | Создать новый | Статистика | ? Помощь
Galina Baburova. Znamasine päivmär školiden täht
Galina Baburova
Znamasine päivmär školiden täht
вепсский
Младописьменный вепсский
Täl
vodel vepsläižile školile täudub 220 vot .Sikš necen voden aigan niiš tehtihe erzvuiččid jubilejile omištadud azjtegoid .Šoutjärven škol sirdi praznuičendan tulijan voden augotišhe , no jubilejan päazjtego mäni kül’mkun lopus .
Šoutjärven školan čomitadud sportzalaha kerazihe äi rahvast : openikad , opendajad , adivod susedkülišpäi da Petroskoišpäi , korktad mehed .Pidab sanuda , miše männudel vodel "Školiden iniciativoiden rahoituz " -projektan taguiči školas oli sätud "Teatrpaja ".Projektan rahoile osttihe lava , mitte necil päiväl azotadihe sportzalas scenan vuitte .Mugažo projektan rahoile osttihe tarbhaižid čomid sädoid da dekoracijoid erazvuiččiden teatrozutelusiden täht .Üks’ ozutelusišpäi – "Kut neglik ozad eci " – oli ozutadud necil päiväl .
– Nügüd’ meiden "Teatrpajas " om 20 openikad . Mö vasttamoiš harjoitelusil kaks’ kerdad nedališ ."Kut neglik ozad eci " -ozutelusen ližaks meil om "Taivaz lanksi " -tätüozuteluz . Völ mö vaumištam ut sarnad Udeks vodeks da voinozutelust Vägestusen päiväks , – starinoiči üks’ projektan ohjandajišpäi Ales’a Anušenkova .
– 2026. voden b’udžetas mugažo planuitas antta rahoid školiden openikoiden iniciativoile . Nece om hüvä azj , nece opendab lapsid vastusenpidändaha : konz heiden projektad toidenzoittas , hö nägeba , kut tärged om rata da panda väged ičeze idejaha , – sanui Zakonoiden tegendan kundan varapämez’ Ol’ga Nikolajevna Šmajenik .Ol’ga Nikolajevna iče om Šoutjärven školan pästnik , sikš surel tahtol tuleskeleb neche školha , i händast kaiken varastadas sigä .
Projektan prezentacijan jäl’ghe kaik sirdihe sportzalaspäi radhonusehe , kus mäni Šoutjärven školan jubilejale omištadud konferencii .Konferencijaha ühtni 5.–11. klassoiden openikad , kudambad vaumištiba melentartuižid dokladoid ičeze armhan školan enččes da nügüdläižes elos .Ezitused oliba ani erazvuiččed .Ken-se radoi školan arhivoidenke , ken-se pagištoiti školan polhe külän eläjid .Nene oma todesižed oppindradod , niiš om tarbhaižid tedoid tulijoiden sugupol’viden täht .Lapsed starinoičiba školan enččiš pämehiš , tetabiš pästnikoiš , opendajiš , kudambad oliba Suren voinan ühtnikoin .Ičeladuine ezituz oli videnden klassan openikoil .Hö pagištoitiba ičeze kazvatajid , pakičiba heid starinoita openduzvoziš .Lapsiden kazvatajiden johtutesed oli kuvatud kamerale i ozutadud konferencijal .
Konferencijan lopus žürijouk tegi ühthevedod da valiči vägestajid .Nece oli ani jüged azj .Kaik lapsed ičeze napernudes saiba pauklahjoid .
Znamasine päivmär školiden täht
вепсский
Младописьменный вепсский