Тексты
Вернуться к списку | редактировать | удалить | Создать новый | Статистика | ? Помощь
N’uman Оl’ga . Meiden kund om-ki päsatuz
N’uman Оl’ga
Meiden kund om-ki päsatuz
вепсский
Младописьменный вепсский
Olen
Piterin agjan Vepsän kundan ohjandai i voin sanuda , miše minun täht om tärged teta , midä meiden projektad andaba ristituile , vepsläižile , abutaba-ik ned tehta meiden päazjad – kaita vepsän rahvahan kul’turad , tradicijoid da kel’t , vahvištoitta ičetundmust .Edel ku tehta uzid projektoid , mö kaikuččen kerdan tegem ičelemoi mugoižid küzundoid .Neciš azjas abutab meiden riža : mö el’gendam , midä tariž tehta , miše kul’tur ei vaiše kaičižihe , no mugažo kehitoižihe da tegižihe nügüdläižeks .
Üks’ päsabustusišpäi om Vepsän tanhan tegemine .Nece om äipoline kompleks , kus om XIX voz’sadan ičeladuižiden kaluiden ekspozicii , töpajad , openduzsijad , tradicionaližed sauvotused .Ristitud toskeleba muzejaha kanzrelikvijoid , jagasoiš ičeze heimon istorijal , andaba meile sen , midä heiden täht om tärged kaita .
Mö udessündutam endevanhoid radonmahtoid , tegem vepsläižid čibuid , kurgesišt aidad , lendam časoun’ad da mel’nicad , vedäm mastar’-klassoid , vaumištam vepsän kelen kursid , painam kirjoid , tegem praznikoid da erazvuiččid azjtegoid .
Kaik nened radod om sidotud ühten tärktanke idejanke : kel’t ei voi kaita eriži kul’turaspäi .Kadob üks’ radonmaht – kadoba senke sidotud sanad , virkehed .
Necil vodel mö pätim oigeta pakičusen "Rahvazkundan ülenduz – 2025" -premijan samižele .Nece om üks’ kaikiš surembišpäi pauklahjoišpäi neciš kundaližiden tomotusiden raderištos .Meiden täht nece oli hašk , mitte pakiči rohktut .Meiden radod korktas arvostadihe : Vepsän kund tegihe III stepenin laureataks .Nece vägestuz todištab , miše meiden radoho om sur’ ühthižrahvahaline melentartuz’ .
Necen pauklahjan mö saim meiden suren kundan abul .Nene oma ristitud , kudambad opendaba vepsän kel’t , ombleba sädoid , vedäba ekskursijoid , vaumištaba tradicionaližid sömižid , ezineba praznikoil , vedäba mastar’-klassoid lapsiden täht .Vepsän kund tegihe sijaks , kus kul’tur eläbzub erazvuiččihe azjohe ühtnendan kal’t .
Tämbei mö nägem , kut openikad tegesoiš tradicijoiden kandajikš : ken-se tegeb tehmusid endevanhoiden mahtoiden mödhe , ken-se tegeb oppindradoid , ken-se tegeb čibud i abutab udessündutada mel’nicad .Nece kaik om-ki todesine kul’turan udessündutand .
"Vepsän tanaz : eläb kel’ " -projekt , mitte vägesti konkursas , om vaiše suren radon pala . Edel oliba toižed projektad : "Udessündutades tradicijoid ", "Kel’pajad vepsän kelen opendamižen täht ", "Vepsläižiden tradicionaline sädo : sugupol’viden sidonit’ ", "Vepsän tanhan starinad " -kirjan painand , "Maman keitändlad " i toižed .Ühtes ned abutaba kehitoitta kul’turad .
Meiden päsatuz om kund .Se ühtenzoitab sugupol’vid da ristituid , kudambad puhuba ühthe hil’he .Nece kund kazvab , tegese vahvembaks , sab rohktut , i siš mö nägem tulijad aigad .
Vägestuz premijan samižes völ kerdan vahvištoitab , miše mö sirdämoiš oiktaha polehe .Se libutab henged , andab väged i avaidab uzid voimusid kehitoitusen täht .Se ozutab , miše meiden kul’tur om tärged ei vaiše meile – se om kaiken man kul’turjäl’gestusen pala .
Nece pauklahj om kaikuččen ristitun , ken toi kalun muzejaha , ühtni tauguhu , astui vepsläšt tehutme , openzi kel’t , tegi muštlahjoid , starinoiči kanzan istorijoid da muite uskoi meiden radho .
Mö olem Vepsän kund .Meiden kul’tur om eläb , sikš ku sil eläba ristitud .
Meiden kund om-ki päsatuz
вепсский
Младописьменный вепсский