Тексты
Вернуться к списку | редактировать | удалить | Создать новый | Статистика | ? Помощь
Popova Irina . Lämäd vastused Paginklubas
Popova Irina
Lämäd vastused Paginklubas
вепсский
Младописьменный вепсский
Vepsläine
Paginklub oli tehtud Petroskoiš voden 2011 keväz’kus Rahvahaližes kul’turkeskuses .Vodelpäi 2011 vodehesai 2023 Paginkluban ohjandajan oli Larisa Čirkova , "Vepsän kul’tursebran " pämez’ .Minä tulin Paginklubha vodel 2020, a necil vodelpäi olen sen ohjandai da vedäi .
Paginkluban ühtnikad oma eri-igäižed ristitud , kudambil om erazvuitte vepsän kelen maht , ičeze pagin .Kaikid ühtenzoitaba armastuz ičeze rahvahaze , taht kaita mamankel’t .Vepsän kel’t jogapäiväižes elos kävutadas harvoin , a Paginklubas voib pagišta toine toiženke ičeze kelel .
Paginkluban radon aigan oli tehtud äi erazvuiččid azjtegoid .Nene oma vastused melentar-tuižiden ristituidenke : kirjutajidenke , runoilijoidenke , tedomehidenke , opendajidenke .Paginkluban ühtnikad ozutiba sarnoid vepsän kelel , tegiba kel’vändoid , kucuiba mastarid vedämaha mastar’-klassoid .
Nügüd’ Paginklubas om 14 ühtnikad , oma "veteranad ", kudambad tuleba klubha ezmäižes päiväspäi .No kaikuččen voden tuleba uded-ki ristitud .
Mö jatktam augotadud tradicijoid , miše kaita vepsän kul’turad da pagišta ičemoi kelel .Tegem erazvuiččid tematižid vastusid , kacum fil’moid vepsläižiden polhe , kucum adivoid vastusile , lugem taidehliteraturad vepsän kelel , "Kodima "-lehtest , "Verez tullei " -al’manahad .
Vepsläižiden kirjutajiden , runoilijoiden , kul’turradnikoiden muštpäivikš vedäm klubas vastusid , miččed om omištadud heiden elole da sädandradole .Tegem mugoižid vastusid ei vaiše kluban ühtnikoiden keskes – mö levinzoitam auditorijad .Muga täl vodel Karjalan rahvahiden sebruden kodiš oli tehtud vepsläižen runoilijan Nikolai Abramovan mušteht .A elokus praznuičim meiden Paginkluban da "Vepsän kul’tursebran " vanhemban ühtnikan Jurii Mihailovič Mugačevan jubilejan .
Tegem mastar’-klassoid .Kaikuččen voden ühtnem akcijoihe , miše kirjutada etnodiktantoid da diktantoid vepsän kelel .Mö tahtoim tedištada toižiden-ki Karjalan rahvahiden kul’turan polhe , kävum muzejoihe , ozutelusile .
Mö tegem kut kul’tur - da lebutöid , muga openduzčasuid-ki .Nügüd’ Paginkluban ühtnikoil om erazvuitte vepsän kelen maht .Ken-se lujas hüvin pagižeb laps’aigaspäi .Oma mugoižed , ked el’gendaba kel’t , no heile om jüged pagišta .Oma mugoižed , ked opendaba vepsän kel’t ani augotišespäi .Oma mugoižed-ki , ked voiba vaiše lugeda vepsäks .Sikš minä tegen kaikuččen ühtnikan täht personaližid tegendoid , miše hö ei varaidaižigoi pagišta .Andan mugoižid tegendoid , miččid hö kebnašti voiba tehta .
Päazj om siš , miše rahvahal oliži taht tulda meiden klubha , miše hö ei varaidaižigoi opeta kel’t , pagišta sil , opendaižihe kirjutamha da lugemaha vepsäks , miše vepsän pagin kuluiži .
Om lujas hüvä , miše Paginklubha kävuba pohjoižvepsläižed da keskvepsläižed .Muga voib kulištada da rindatada erazvuiččid eroid paginoiš .Erašti meil om mel’vajehtelusid siš , kut oikti sanuda .No kaikse meid kaikid ühtenzoitaba armastuz vepsän kul’turaha , mušt ičeze juriš , taht pagišta vepsän kelel .
Mugažo mö pidäm valdkundaližid da rahvahaližid praznikoid , starinoičem veroiš , miččed oliba meiden kanzoiš .Edel Maman päiväd , Paginklubas mäni läm’ vastuz , mitte oli omištadud necile praznikale .Mö starinoičim ičemoi armhiš mamoiš , kus hö sünduiba da eliba , kus radoiba , ozutim fotoid .Paginkluban ühtnikan kaikuččes starinas tundui sur’ armastuz mamaha , ned oliba lujas lämäd , südäintkoskijad johtutesed .
Tervhen tuldes Paginklubha !
Lämäd vastused Paginklubas
вепсский
Младописьменный вепсский