Тексты
Вернуться к списку | редактировать | удалить | Создать новый | Статистика | ? Помощь
Irina Sotnikova. “Vepsläine”-taidehstudii avaitihe Petroskoiš
Irina Sotnikova
“Vepsläine”-taidehstudii avaitihe Petroskoiš
вепсский
Младописьменный вепсский
Voden
2025 tal’vkun lopus Petroskoiš avaitihe "Vepsläine "-taidehstudii , mitte tundištoitab Karjalan eläjid da adivoid vepsän rahvahan kul’turanke , veroidenke , tradicijoidenke da kelenke .Studijan sädajad om kaks’ vepsläšt neidišt Kalagespäi – Julia Aprodu da Darja Polina .
Vepsläižen studijan päidei om siš , miše interaktivižen programman da erazvuiččiden mastar’-klassoiden kal’t ristitud voiba sada tedoid vepsän rahvahan polhe , čukloutas sen kul’turaha da tundištadas tradicionaližiden radmahtoidenke , tedištada , kut vepsläižed eläba tämbei i kut hö popul’arizoitaba ičeze kul’turad da kel’t .Studijas kaikutte tahtnik voib opetas tehmaha vepsläižid tätüižid-kaičijoid , čomitesid savespäi , pletmaha tohespäi da rotangaspäi i toižihe azjoihe .
— Mö radam ühtes erazvuiččidenke mastaridenke , kudambad mahtaba kudoda , poimda , rata savenke . Mastar’-klassan aigan linneb besed i kaikutte tulii voib sada nevondoid mastarilpäi .Mö opendamoiš mastaril , a mugoižed vastused erazvuičetaba studijan radod .Mugažo kucuškam Karjalan taidehpirdajid , kudambad oleskeliba vepsän mal , i heile lujas tuli mel’he vepsän röunan čomuz’ da ičeladuine kul’tur .Hö oma vaumhed pirta vepsläižele temale , – starinoiči Julia Aprodu .
"Vepsläine "-studii om sija , kus voib hüvin mänetada aigad sebranikoidenke , lapsidenke , kanzanke , ühtesradnikoidenke . Sigä voib praznuita sündundpäivid , tehta praznikehtoid .Jo äjad sebranikad da tutabad ühtniba mastar’-klassoihe vilukun praznikoiden aigan i jagoihe meidenke ičeze tundmusil .
— Om hüvä mänetada aigad läheližidenke (minä olin mamanke ) i tehta midä-se ičemoi käzil . Mastar’-klass oli lujas melentartuine , mö openzimoi tehmaha bul’uižid savespäi , tedištim äi melentartuižid azjoid vepsläižes saves , Šoutjärven "Kaičei "-sebran rados .Mamoi čuklouzihe külän il’mištoho , necišpäi hänen hengel oli läm’ .Olim ihastusiš , miše läksim mastar’-klassalpäi ičemoi čomitesed käziš , – sanui Maria Košeleva .
Studijas om ičeladuine vepsläine il’mišt .Täs om kodikahašti i läm’ .Honusen čomenzoitaba kodi - da radkalud , miččed starinoičeba vepsläižiden enččes elos , sikš vastusiden aigan adivod voiba ei vaiše tedištada vepsän rahvahan tradicijoiš , no nägištada-ki erasid kaluid ičeze sil’mil .Sen ližaks kaikutte tahtnik voib ostta unikaližid käzil tehtud muštlahjoid .
— Čududelimoi , miše Petroskoiš eläb muga äi ristituid vepsläižiden juridenke . Tämbei aigvoččile da norile om melentartušt ezitatoiden kul’tur da tradicijoid .Nadeimoiš , miše meiden studijan rad abutab sündutada ristituiš taht oppida ičeze heimon istorijad , – sanui Julia .
Tundištoittes adivoid vepsän kul’turjäl’gestusenke eläbiden paginoiden abul studijan emägad tahtoiba ezitada vepsän rahvast tämbei i eglai .Hö ühtes tegeba nügüdläižid käzitehmusid ei unohtades tradicijoiden polhe .
“Vepsläine”-taidehstudii avaitihe Petroskoiš
вепсский
Младописьменный вепсский