Тексты
Вернуться к списку | редактировать | удалить | Создать новый | Статистика | ? Помощь
Сидоркин Валерий. Pienen kanzan suuri runoilii
Сидоркин Валерий
Pienen kanzan suuri runoilii
карельский: ливвиковское наречие
Новописьменный ливвиковский
Pakkaskuun
lopus Karjalan kanzallizel kirjuttajal , tazavallan kul’tuurualan arvostetul ruadajal Nikolai Abramoval olis täydynyh 65 vuottu .Pahakse mielekse , häi jo kymmene vuottu on toizel ilmal .Kymmene vuottu tagaperin se tapahtui päiviä enne hänen roindupäiviä .
Runoilijan , lehtimiehen lapsus - da nuorusaigu mendih Piiterin alovehen Ladvan kyläs .Ruavastuhuu Nikolai oli äijis leivis , oli kai fotokuvuajannu .Yhtelläh häi nikonzu ei kuskustannuh runoilendua , hänen runuo painettih Svirskije ogni -lehteh , kuduas Nikolai myöhembä ruadoi toimittajannu .Sit häi muutti Petroskoih , ruadoi Prionežje-lehtes .Yhtes kielentutkijan Nina Zaitsevan kel hyö oldih vepsänkielisty Kodima-lehtie alguh panemas .
Kodima-lehten toimittajannu da myöhembä piätoimittajannu olles Nikolai äijän ajeli vepsäläzih kylih , pagizutti vepsäläzii , kirjutti heijän elaijas .Da ielleh kirjutti runuo .Vuozi vuottu hänen runohus rodih syvembäkse , kaikis parahimite häi kirjutti liiriekkua .
Nikolai oli kiändäjännygi .Vepsäkse häi kiändi Šekspiran , Haijaman , Tagoran , Puškinan , Jeseninan , Kl’ujevan , Rubtsovan , Visotskoin , Jevtušenkon runuo .Nikolai kiändi vepsäkse sentämän kuulužan ulgomualazen pajon tekstat , sanommo , Queen-rokjoukon "Myö voittajat " da The Beatles -joukon "Čoma eht ".Petroskoilazet runoilijat kiännettih Abramovan runuo , muuzikkumiehet kirjutettih niilöih sävelmii .Nikolai Abramovan runuo painettih Sever - da Carelia -žurnualoih .Hänen runoloi painettih kogomuksinnu Petroskois , Suomes , Eestis , Norveegies , Vengries da Frantsies .
Nikolais rodih karjalan kirjuttajien liittoh kuului , sit händy autoi da kannatti runoilii Marat Tarasov .Erähiči , konzu Petroskoih tuli Tarasovan hyvä tuttavu Jevgenii Jevtušenko , hyö vastavuttih Abramovan kel .Nikolai lugi Jevtušenkole omii ven’ankielizii runoloi , sit rohkeni da lugi Jevtušenkon So mnoju vot čto proishodit -runon kiännöksen vepsäkse .Jevtušenko korgiesti arvosti kiännöksen da sanoi , ku "on säilytetty runon sävelmys ".
Nikolai Abramovan runuo sai kuulta hänen lugietunnu suomelas-ugrilazien kirjuttajien kerähmölöis , literatuurufestivualilois .Eräs jälgimäzis moizis pidolois Abramovah nähte oli Anukses piettävy Brendovan nimelline festivuali .Sit livvinkielizien runoloin kel yhtes sai kuulta vepsänkielistygi .
Omien piiteriläzien ystävien kehoitukses P’otr Vasiljevan da Dmitrii Gridinan kehoitukses Abramov puutui akt’ourakse .Erähäs fil’mas Nikolai Abramov oi Nikolai Kl’ujevan roulis .Abramovua tundiettih kuvuajannugi , hänen kuvien ozutteluloi piettih Petroskois da runoilijan kodimual .
Nikolai jälgimäzet vuvvet ruadoi Kanzallizes kirjastos .Sendäh kirjasto rubei pidämäh mustoillaččuloi hänen kunnivokse .Podporožjan piirin kirjasto joga vuottu pidäy literatuurukonferensieloi da festivualiloi .Tänä vuon , konzu täydys 65 vuottu Abramovan roindas , niidy rodieu enämbi .
Mennyön nedälin lopus Podporožjas jo kymmenetty kerdua Abramovan mustokse piettyh konferensieh kerdyi Nikolain tuttavua da omamualastu , tulolastu Lodienois , Petroskois da Piiterispäi .Net , ket hyvin tundiettih da mustettih Abramovua , saneltih hänen elaijas da tuotandos .Sen jälles oli ruado ozastolois , kudamis šeikuittih vepsänkielizen runoilun erinomažuksii , Jeseninan vaikutustu Abramovan runoloih , Nikolain ruaduo "artistannu " erilazis fil’mois .Ilmoitettih konferensien hantuzis Abramovan runoloi myöte pietyn fotokilvan tulokset .Kirjaston foijees oldih kačottavakse azetettu Abramovan parahat fotokuvat da runoilijan runokogomukset .
Pienen kanzan suuri runoilii
карельский: ливвиковское наречие
Новописьменный ливвиковский