Тексты
Вернуться к списку | редактировать | удалить | Создать новый | Статистика | ? Помощь
Ol’ga Dubitskaja. Kogo Ven’a yhtes zualas
Ol’ga Dubitskaja
Kogo Ven’a yhtes zualas
карельский: ливвиковское наречие
Новописьменный ливвиковский
Tiijättögo työ
, gu kogo Ven’ua voibi kaččuo kahtes čuasus yhtes kohtas da sih niškoi ei pie ajua nikunne ?Da se on tottu !
Kogo Ven’ua voibi kaččuo Kanzallizes šou-muzeis "Grand Maket Rossija ", kudai on Piiteris , Tsvetočnaja pihal , 16.
"Grand Maket Rossija " on suuri interaktiivine muzei , kuduas on ezitetty kogo Ven’a . Sie kai objektat , linnat da alovehet on kerätty yhteh .Täs makietas on viizitostu alovehtu : Kaliningruadan aloveh , Piiteri , Luodehine , Moskovan , Kaspian , Urualan lähäzet alovehet , Urualan mägiharjandeh , Urualan tagaine aloveh , Siberi , Pohjazen da Taigan alovehet da Loittoine Päivännouzupuoli .
Muzein enzimäzes kerrokses on mustolahjoin laukku , kassat , audioviettelijöin da binokliloin vuogruamine , koufei da ruadopertit .Sie voibi kaččuo fil’mu makiettah nähte da silmäillä , kui muasterit luajitah modeliloi da testiirujah niidy .
Iče makiettu on toizes kerrokses .Makietan pinduala on 800 nellikkömetrii , se on kymmenen kolmepertihizen fatieran pinduala .Sen verdailumiäry on 1:87.Se on Ven’an suurin makiettu da toizekse suurin muailmas .
Makiettu "eläy omua elaigua ", sie päivy vaihtau yön da huondes , tiettäväine , enzimäi tulou Päivännouzupuoleh .Se rodieu joga 18 minuuttua .Vaihtellahesgi vuvvenaijat .Sanakse , Ven’an talvie "luajittih " kogo vuvven .Sie ajellah mašinat , poujezdat , avtoubusat , on laivua , lendokonehtu , vertol’uottua .
Täl makietal elos "kiehuu " – srojitah taloloi , kuatah meččiä , kazvatetah kazvoksii , sammutetah tulipaloloi , snimaijah fil’moi , kävelläh , pietäh svuad’boi , erotah , pietäh iluo , kuoltah .Kai on kui tovellizes elajas .
Makietas ollah kohtat da huonukset , kudamii voibi kerras tunnustua – Kiži-suaren Spuasan kirkastuksen kirikkö ,
Moskovan kremli , Piiterin rostrallizet kolonnat , Roza-huutoru , Sočin meriportu da Kal’azinan uponnuot kellojallat .
On sie tundemattomua kohtua – kenenlienne kezämökki teplitsoinke da ogrodanke , erähän garažan luondal , kuduas miehet kižatah kartiloih .Sie voibi nykistiä tyrmäspäi pagenemistu .
Yhtes kerras ei sua kaččuo tarkah kaikkii pienii tilandehii .Niidy on ylen äijy , sendäh täs muzeis olles ainos kummua näet , mittuine suuri ruado oli luajittu .Ihailet päiväzenkukkien pelduo , kuduas on yhten santimetrin korgiedu 39260 päiväzenkukkua .Makietan pienin "eläi " on šlöpöi , kuduan suurus on kaksi millimetrii .Voi olla , ku työ lövvättö vie muudu tämänmostu kumman kohtua makietas .
"Elävyttäy " makiettua se , ku sidä voibi näppäillä – ruvetah ruadamah mečänkuadajat , kirvesmiehet , kombainat , kanat ruvetah n’okkimah jyviä , hevot – hyppimäh . Kustahto sytytäh tuluot , fontuanat ruvetah ruadamah .Mostu kohtua on äijy .Täs kaikes pietäh huoldu äijät rahvas , hyö kaikin kačotah monitorois , kui ruadau makiettu .A net , ket pietäh silmäl raududorogua , šuutkahes sanotah iččiedäh Liikehyhtevyksien ministerstvakse .
Gu piävyttö olemah Piiterih , vältämättäh käygiä täh muzeih , se maksau sidä .
Kogo Ven’a yhtes zualas
карельский: ливвиковское наречие
Новописьменный ливвиковский