Тексты
Вернуться к списку | редактировать | удалить | Создать новый | Статистика | ? Помощь
Irina Zaitseva. KirjaMelliččä: Periodika julkaisi kahekšan kirjua
Irina Zaitseva
KirjaMelliččä: Periodika julkaisi kahekšan kirjua
карельский: собственно карельское наречие
Новописьменный севернокарельский
Tuiskukuun 26. päivänä
Petroskoin Periodikakuštantamo esitteli vuotena 2025 painettuja kirjoja jokavuotisešša KirjaMelliččätilaisuošša .
Viime vuotena Periodika-kuštantamo julkaisi kahekšan kirjua .Ne ollah musiikilla omissettuja painokšie , lapšien kirjoja , runoja ta prousua .
– Kirjojen miärä ei ole tärkein asie . Tärkein on niijen luatu , a luatu "Periodikašša " on aina korkiella tašolla , korošti Karjalan tašavallan kanšallisen ta alovehellisen politiikan ministerijön ošašton johtaja Jelena Migunova .
Omista tevokšista kerrottih iče luatijat .Näin , Sergei Semakov esitteli oman ta Irina Semakovan valmistamie Onego-kanšanšoitinorkesterin vuosijuhlailotulituš-šekä Dombran ta pianon tevokšien antologija -kirjoja .
Nina Zaitseva kerto omašta Minun vepsläine oza-nimiseštä kertomukšešta .
– Kirja on omissettu vepšäläisellä rahvahalla ta kylällä , missä olen kašvan . Neuvoštoaikana kylä oli täynnä elämyä .Vepšäläiset ušottih , jotta mečäššä joka puu kuulou ta näköy kaiken , a joka heinäsellä on oma elämä .Mie halusin näyttyä šitä Vera-tytön kohtalon kautti .Šamoin kirjašša on toini piähenkilö – vepšän kieli .Olen ylpie šiitä , jotta nykyjäh šuau ta pitäy kirjuttua omalla kielellä , šaneli Nina Grigorjevna .
– Kirja šai Minun vepsläine oza -nimen , šentäh kun vepšän kieleštä tuli ošani ta kohtaloni , kumpaseh on šivottu miun elämä , lisäsi luatija .
Sergei Jakovlevin Kuččuu milma Kotimua -runokokomuš näki päivänvalon Karjalan Rahvahan Liiton alotukšen anšijošta Karjalan tašavallan piämiehen granttišiätijön kannatukšella .Šitä esitteli Marija Remšujeva .
Marija Anatoljevna kerto Sergei Jakovlevin personallisuošta ta luovašta taipalešta .
– Vuotena 2020 aikuhisena miehenä Sergei Toivovič alko kirjuttua runoja vienankarjalakši . Kolmešša vuuvvešša ilmešty noin 100 runuo , kumpasissa runoilija kuvuau oman kotimuan ta luonnon kaunehutta , kertou kylän elämäštä ta karjalaisešta rahvahašta .Runoilija kerto , jotta enšin mieleh tuli aihe , šiitä šynty kakši-kolme šäjehtä , a muut šäkehet šynnyttih helpošti ičeštäh , kerto Marija Remšujeva .
Sergei Jakovlev huaveili omašta runokokumukšešta , ka vuotena 2023 hiän šiirty tuonilmasih .
– Konša ilmešty rahua kokomukšen valmistamiseh , mie keräsin kaikki runot yhteh käsikirjutukšeh , valičin 88 runuo ta jakasin kuuteh temaattiseh ošah , šelitti Marija Remšujeva .
Šen jälkeh huomijo kiinitettih lapšien kirjallisuoh .Tatajana Dudinova kerto Uuvvet arvautukšet Ten-Ten-kiššalla -kirjašta .Painoš jatkau Arvautukšet ruškiella Ten-Ten -kiššalla -kirjua .Ten-Ten lähtöy eri matkoih ta löytäy uušie yštävie – Avaruškiššua ta Kisa-robottie .
Ol’ga Hramtsova esitteli Viisi starinua Karjalašta -kirjan ta vietti tilaisuon vierahilla starinamaisen ekskursijon Karjalan eri paikkoih .
Karjalan kanšojen ystävyštalon virkua toimittaja johtaja Aleksandra Kuznetsova kerto Periodika-kuštantamon valmistamista stolapelilöistä .Ne ollah "Terveh tulla Karjalah !", "Karjalan kanšojen monivärisyš ", "Šammon myöššyttämini " ta "Venäläini šana on tuttu jokahisella ".Vaikka ne pelit ilmeššyttih aikasemmin , joka vuosi "Periodika " julkaisou lisäkappalehie .
KirjaMelličäššä esitetyt kirjat ošallissutah Vuuvven kirja -kilpailun kuuteh nominatijoh .
KirjaMelliččä: Periodika julkaisi kahekšan kirjua
карельский: собственно карельское наречие
Новописьменный севернокарельский