Тексты
Вернуться к списку | редактировать | удалить | Создать новый | Статистика | ? Помощь
Nadežda Vasiljeva. Perehen 55 izumrudie
Nadežda Vasiljeva
Perehen 55 izumrudie
карельский: собственно карельское наречие
Новописьменный севернокарельский
Izumrudi on
kaunis vihrie minerali .Še on harvinaini ta kallisarvoni , šamoin kuin niin pitälti yheššä elänyöt pariskunnat .Kivi simvolisoiččou uškollisutta , avomielisyttä ta ikuhista rakkahutta , kumpani ei hävie , a vain lujenou ajan mittah .Lujošta še šai kakši viitoista .
Šemmoista rakkahutta elämäštä läpi kannettih Tatjana Valentinovna ta Sergei Aleksandrovič Lipkinit .
Kaikki alko vuotena 1969.Opaššukšen jälkeh Tatjana miäräykšen mukah tuli Kalevalah ruatamah päiväkojin musiikkiruatajana .Hiän ruttoh tottu vierahah paikkah , löysi potruškoja .Erähänä šuovatan kešäpäivänä neiččyöt pistäyvyttih tanššiloih .Konša pitkäkašvoni ta šolakka priha kučču tytön valšših , Tatjana ei kieltäytyn .Šiitä Sergei mäni šuattamah neičyttä : hyö paistih eri aseista , ihual’tih Kuittijärven hil’l’aista ta rauhallista pintua .
Šeuruavana päivänä Tatjana läksi lomalla Petroskoih muamon luokše .
– Pedagogisilla ruatajilla on pitkä loma ta šen aikana mie kerkisin unohtua lyhytaikasen tuttavuon , nakrau Tatjana .
Sergeillä oli päinvaštoin .Tuttavuštumini miellyttävän ta hyväččäisen tytön kera aina oli prihan mieleššä .Hiän innolla vuotti hänen myöštymistä .Tietyšti Tatjana tuli .Vuuvven piäštä , 31. talvikuuta nuoret juhlittih häitä .
Sergeillä ta Tatjanalla alko elämän uuši perehvaihe .Sergei ruato korjauš - ta rakennušošašša .Šiinä hiän alko omua työtoimintua vielä ennein armeijah kučuntua , a palvelukšen jälkeh myöšty omah kollektiivih .
Sergei ruato šamašša yritykšeššä 40 vuotta – oli šohverina , rakentajana ta kirvešmiehenä .Hiän paremmin kuin kaikki pos’olkašša taito leikata lasin ikkunaruamie varoin .
Tatjana opašti esikoululaisie laulamah , tanššimah , valmisti heijän kera pruasniekkoja ta onnitteluja .Šiitä hiän pitälti johti päiväkotie , oli opaštunuona ta oikeuvenmukasena johtajana .
– Perehtaipalen alušša ei kaikki männyn moitittomašti . Šilloin apuh tultih Sergein vanhemmat .Molommat nähtih Šuuri Isänmuallini šota ta elettih šovušša kymmenie vuosie .Hyö monta kertua autettih neuvolla ta ruavolla , muistelou Tatjana .
Lipkinit muissetah ta arvoššetah šitä apuo vieläki .Vanhempien esimerkin mukah hyö aina staraijah olla tukena omilla lapšilla .Tatjana Valentinovnalla ta Sergei Aleksandrovičilla on kolme tytärtä .Hyö on jo perehytty ta lahjotettu vanhemmilla kuuši punukkua ta i pravopunukkoja .
– Työ višših konšana että riijellyn , mie arvauttelin .
– Onko še mahollista , vaštasi emäntä nakruan . – Eri pikkuasiet šatuttih . Eläinratamerkiltä Sergei on Leijona , ta šiinä on kaikki .Olemma aina löytän kompromissija , myöntyn toini toiseh , yheššä ratkaissun proplemoja .A ilman šitä ei šua männä etehpäin , ei tule onnie eikä varmutta tulovaisuoh .
Vuotena 2021 Lipkinien pereh voitti yleisvenäläisen Vuuvven pereh -kilpailun erähäššä nominatijošša .Šamoin heijän kotiarhiivašša šäilyy metali Rakkahuošta ta luotettavuošta .Lipkinit ašnittih šemmoni palkinto , vet šuuren lujan perehen peruštamini ta šen šäilyttämini vuatiu šuurta ta vaikieta ruatuo .
Lipkinien talošša on aina lämmin , puhaš ta kojikaš ilmapiiri .Aina tuokšuu piirailla , kumpasie Tatjana paistau šielulla ta rakkahuolla .Šamoin šiinä on aina melusua .Šuovattana armahat punukat pešeyvytäh kylyššä ämmön ta ukon luona .Še on pakkoasie .A kešällä ta uuvvenvuuvven pruasniekkoina tullah tytöt .Šemmosina päivinä Lipkinien šuureh vierahanvaraseh stolah keräytyy noin 20 henkie .Kaikilla riittäy tilua , huomijuo ta šielunlämpyö vanhempien talošša , kumpani lahjotti omahisilla rakkahutta ta missä šäilytetäh perehonnen hyvie perintehie .
Perehen 55 izumrudie
карельский: собственно карельское наречие
Новописьменный севернокарельский