Тексты
Вернуться к списку | редактировать | удалить | Создать новый | Статистика | ? Помощь
Irina Sotnikova. Anna Lisicinan nimi ühtenzoitab sugupol’vid
Irina Sotnikova
Anna Lisicinan nimi ühtenzoitab sugupol’vid
вепсский
Младописьменный вепсский
Joga
voden uhokus Kalagen školas tehtas sur’ sportpraznik – pidetas suks’voibud , miččed om omištadud Sovetskijan Sojuzan Gerojale Anna Mihailovna Lisicinale .Nece praznik tob hüväd mel’t , čomid tundmusid , andab energijad da väged .Täl vodel ühtnemaha suks’voibuihe tuliba pened da aigvoččed sportmehed erazvuiččiš külišpäi : Šoutjärvespäi , Šokšuspäi , Derev’ankaspäi i Ladva-Vetkaspäi .
Necil čomal tradicijal om pit’k te eskai vodelpäi 1972, konz radoi Onežskii rudoupravlenii .Voibuiden sädajan oli radnik Aleksandr Ivanovič Makejev , hän iče äi vot ühtni suks’voibuihe .Tuleskeli äi hihtäjiden joukuid kaikes Änižröunaspäi .Siloi päazjas suks’voibuihe ühtniba vaiše aigvoččed .Veteranoiden sanoiden mödhe , pämez’ eskai andoi lebupäivid radnikoile , miše tehta suks’ladun da vaumištadas suks’voibuikš .
Siš aigaspäi suks’voibud vedetas joga voden .Küläs eläba Onežskijan rudoupravlenijan veteranad , kudambad muštaba ezmäižid suks’voibuid .Nügüd’ hö oma praznikan arvokahad adivod , no heiden vunukad jatktaba necidä tradicijad .
– Eläjad muštaba , miše ende suks’voubuile Anna Lisicinan muštoks anttihe sur’ znamoičend , tuli äi rahvast Änižröunaspäi . Nece oli sur’ patriotine praznikazjtego .Ende minä-ki ühtnin suks’voibuihe ühtes toižiden opendajidenke .Nügüd’-ki meiden školad ezitab aigvoččiden jouk , miččehe mülüba vanhembad , kudambad navediba suks’sportad .Veteranoišpäi suks’voibuihe ühtneb Vladimir Andrejevič Vegelin , kaikuččen voden hän abutab tehta suks’ladun , – starinoiči Kalagen školan pämez’ Svetlana Gotič .
Tradicijan mödhe praznikazjtegon avaiduz oli školas .Rahvast kerazihe äi .Oli sanutud äi lämid sanoid Anna Lisicinan polhe , hänen urohontegos ."Pihläine "-pajogrupp pajati čoman pajon Anna Lisicinan polhe . Jäl’ges ken-se läksi Anna Lisicinan muštpachannoks , a toižed – suks’ladule .Hihtäjiden täht oli vaumištadud kaks’ suks’ladud .
– Augotižškolan openikoiden täht suks’lad oli tehtud järvenno , a vanhembiden openikoiden da ristituiden täht se tehtihe mecas mägenno , "Purtkil ", sijas , kus mäniba ezmäižed suks’voibud Anna Lisicinan muštoks . Sur’ spasib Konstantin Saveljevale , Vladimir Vegelinale da Sergei Perfiljevale , kudambad abutiba tehta suks’ladud , – sanui likundurokan opendai Jelena Kirilina .
Suks’voibuiden sädajad homaičeba , miše kaikuččen vodenke ühtnikoiden lugu kazvab , om enamba vanhembid ristituid , kudambad surel tahtol ühtneba suks’voibuihe .
– Necil kerdal oliži enamba školiden joukuid , no erazvuiččiden süiden taguiči äjad ei voinugoi tulda – äi rippub ajamišpäi . Kaikuččes igäkategorijas parahimad sportmehed saiba medalid , kaik toižed – muštlahjoid .Naižiden keskes parahiman aigan ozuti meiden školan pästnik Alina Ščerbakova , mužikoišpäi – Maksim Kon’uškov , lapsiden keskes – Šokšun školan openik Oleg Jegorov , – ližazi Jelena Mihailovna .
Mäni enamba 50 vot tradicijan sündundaspäi , no se eläb i ühtenzoitab eläjid , sportan navedijoid , sugupol’vid .
– Om tärged , miše äi vot mö kaičem muštod meiden vepsläižes gerojas Anna Lisicinas , nece om meiden ülenduz . Spasib külän da Änižröunan administracijoile rahatuges , kaikuččen kerdan azjtego vaumištadas ani čomin , – sanui Svetlana Nikolajevna .
Anna Lisicinan suks’voibud jatktase , a nece znamoičeb , miše külän istorii eläb i ühtes senke eläb mušt sures gerojas .
Anna Lisicinan nimi ühtenzoitab sugupol’vid
вепсский
Младописьменный вепсский