Тексты
Вернуться к списку | редактировать | удалить | Создать новый | Статистика | ? Помощь
Nadežda Mičurova. Anuksen vuozipäivänny kuului Iivan L’ovkinan pajoloi
Nadežda Mičurova
Anuksen vuozipäivänny kuului Iivan L’ovkinan pajoloi
карельский: ливвиковское наречие
Новописьменный ливвиковский
Mennyt
suovattan da pyhänpiän Anuksenlinnas oli suuri pruazniekku .Syvyskuun 29. päivänny linnu täytti kolme sadua seiččiekymmen viizi vuottu .Kahten päivän aigah Anukses oli kaikenmostu piduo .Suovattan huondeksel avattih uuzi nygyaigaine stadion Anuksen keskiškolan luo n :u kaksi da lapsien kižuandukohtu Komsomol’skoin pihal .Jälles pruazniekku jatkui Smolenskoin Jumaldoman obrazan kirikös , kus oli pietty jo perindöllizekse tulluh Pajatammo sinule -hengellizen pajon festivuali .Anuksenlinnan pruazniekkuprogrammas oldih kvest-kižat , ruadopajat , fil’moin ozutandat , Rahvahal mua kuuluu -tiedopraktiekalline konferensii paikallizes kinoteatras da Kazva , kaunis Karjala -konsertu Anuksen joudoaijan keskukses , kul’tuurutalois .Konsertas musteltih Karjalan muuzikkumiesty Ivan Ivanovič L’ovkinua da pajatettih hänen pajoloi .Tänä vuon täydyi jo 90 vuottu kui Iivan L’ovkin rubei sepittämäh pajoloi da ruadamah horienke .Kazva , kaunis Karjala -pruazniekkukonsertah tuldih pajattamah Anuksenlinnan Karjalan koivu-rahvahan hora da Koivikko-pajojoukko .Oldih Tuuksen Kiuruine - da Videlen Ihalmo -pajojoukot , Sämozerje-ansambli Jessoilaspäi , kandelehelsoittajien Ilomieli-ansambli Alavozespäi , S’urpriz-lapsien tansuansambli da Triumf-estruaduneroloin stuudii Anuksespäi .Tiettäväine , piälimäzenny konsertan gost’annu oli Petrovskoin rahvahan hora Mundärvenlahtespäi .Sen perustajannuhäi oli iče Iivan L’ovkin .L’ovkinan pajot kuulutah Karjalan mual – Myö Petrovskoin rahvahan horan johtajan Julija Jer’ominanke olemmo jo ammuizet tuttavat . Tulien vuon Petrovskoin da Anuksen rahvahan horat ruvetah pidämäh yheksäkymmenvuodistu merkipäiviä .Petrovskoin horan perusti Ivan Ivanovič , a Anuksen horanke häi ruadoi .Myö duumaičimmo da pagizimmo , gu olis hyvä luadie moine konsertu-vastavundu pajattajienke , kerdu Anukses Mundärvenlahten hora jo ammui ei olluh .Minä kävyin paikallizeh administratsieh da kyzyin lubua pidämäh konsertua Anuksenlinnan päivänny .Myö luvimmo , gu jo rodih yheksäkymmen vuottu , kui Iivan L’ovkin rubei ruadamah horienke , sanou Larisa Fofanova , Karjalan koivu -rahvahan horan johtai , konsertan järjestäi .Iivan L’ovkinan hyvyös vuozinnu tuhat yheksäsadua kolmekymmenil vuozil Mundärvenlahtes ymbäri olijois kylis – Törökäs , Nälmjärves da toizis kylis oldih luajittu horat .Häi järjesti Vieljärven da Petrovskoin rahvahan horat , ruadoi Anuksen čupun pajojoukkoloinke .Pajoloi Iivan L’ovkin rubei kirjuttamah vuvvennu tuhat yheksäsadua kolmekymmen nelli .Arhiivudokumentois on säilynyh enzimäine vuvvennu tuhat yheksäsadua kolmekymmen viizi hänen kirjutettu pajo .– Kazva , kaunis Karjala -konsertah kučuimmo pajojoukkoloi , kuduat pajatetah L’ovkinan pajoloi , sanoi Larisa Fofanova .
Häi pajottah ei nähnyh elaigua .Iivan L’ovkinua sanotah Suvi-Karjalan liirizen pajon alguhpanijakse .Häi on kirjutannuh piäle seiččemenkymmenen pajon , kudamii suvaijah da pajatetah tässähgi .Äijät nämmis pajolois roittih rahvahan pajoloikse ."Ongo kaunis Karjala " on parahimii Iivan L’ovkinan pajoloi , kuduadu pajatetah onnuako joga karjalazes pruazniekas . Kazva , kaunis Karjala -konsertasgi tämän pajon pajatti Petrovskoin rahvahan hora .Pajattajes tädä pajuo horaniekat ozutettih , kui Iivan L’ovkin libui kirjuttamah pajoloi .Kai net pajot ven’an da karjalan kielel ollah ruokos Karjalan kanzallizes arhiivas .Iivan L’ovkin oppi kiändiä karjalakse ven’alazii pajoloigi , ga ellendi , gu se on vaigiettavu dielo da rubei kirjuttamah iče ."Ruskei neičoi " kuuluu uudeh luaduh . Paiči pajoloin sepittämisty , Iivan L’ovkin keräi da kirjutti pajoloi rahvahaspäi .Erähil nämmis pajolois häi andoi uvven eloksen : kuda-midä kohendeli da pani muuzikale .Muga Ruskei neičoi -pajon Ivan Ivanovič kirjutti runonpajattajas Anastasija Nikiforovaspäi .Pajo rodih moizekse tundietukse , ga sidä kai ruvettih pajattamah ven’aksegi .Myö luajimmo Ruskei neičoipajon pienen istourien .Iivan L’ovkin oli enzimäine , kudai kirjutti sen Anastasija Nikiforovaspäi , da juuri hänen hyvyös tädä pajuo ruvettih pajattamah kaikkiel .Mennyt vuon meile kävyi Boboši - muuzikkuarteli Ven’alpäi kirjuttamah fol’klourumaterjualua da kyzyttih Tuuksen eläjiä El’vira Kondratjevua sanelta rahvahan perindölöis da pajattua Ruskei neičoi -pajuo .Muzikantat pandih sen muuzikale .Se pajo rubei jo toizeh luaduh kuulumah , sanou Larisa Fofanova ."Kuldazenke istuimmo ", "Ruispeldo ", "Gul’aičin minä " – nämmä ollah vai erähät pajot , kudamat kirjutti Iivan L’ovkin . Kai net pajot kuuluttih Anuksen joudoaijan keskuksen lavalpäi .Konsertan lopus kaikin yhtes pajatettih Petroskoi -pajon .Iivan L’ovkin kirjutti pajoloi prostoih rahvahah niškoi , sendäh nämmii pajoloi suvaijah da pajatetah tässähgi .Se on hyvä merki , gu rahvas mustetah da pietäh arvos oman rannan pajoseppiä .Konsertan jälles piettih illačču , kus rahvas juodih magiedu čuajuu šipainiekoinke , pajatettih da pläšittih .
Anuksen vuozipäivänny kuului Iivan L’ovkinan pajoloi
карельский: ливвиковское наречие
Новописьменный ливвиковский