Тексты
Вернуться к списку | редактировать | удалить | Создать новый | Статистика | ? Помощь
Ol’ga Dubitskaja. Karjalan kieli Nurmijärvel
Ol’ga Dubitskaja
Karjalan kieli Nurmijärvel
карельский: ливвиковское наречие
Новописьменный ливвиковский
Karjalan
liitto -organizatsii da Karjalan tazavallan Kul’tuuruministerstvu järjestetäh karjalan kielen da kul’tuuran kursiloi jo mondu vuottu .Joga toine vuozi kursit vuorotellen järjestetäh Ven’al da Suomes .
Tänävuon kursit oldih čomas kohtas Helsinkin lähäl – Nurmijärvel .Sinne opastumah karjalan kieldy da kul’tuurua kerävyi äijy rahvastu Suomen da Ven’an puolelpäi .
Nurmijärvele tulduu kursilazet nähtih čoman paikan – pienen opastujien linnazen , kuduas on suuri eländykohtu , äijy opastuskluassua , on huogavopertii kaminoinke , sauna da kai oma uinduallikko .Pihas on äijy kukkua da suuret sadavuodehizet tammit .Tämä opastujien linnaine sijaiččou čoman da puhtahan Sääksjärven rannal .
Kursilois , kui ainos , oli kaksi joukkuo – net , kuduat vaste vai alettih opastuo karjalan kieleh da kielen opastundua jatkajat .Opastujinnu oldih Ol’ga Žarinova da Nadežda Mičurova .
Kursilois opastujat tuttavuttih karjalan kielen iäni - da kielioppih , karjalan kielen eričuksih da karjalan kul’tuurah .Paiči kielioppii kursiloil oli äijy paginharjaitteluu .Jogahine kursuniekku kerdoi omas ruavos libo indolois .Mugai toizile kursuniekoile puutui kuulta Karjalan kanzallizen teatran ruavos , Anuksen kirjastos , Karjalan kielen kois da kiruttajan Valentina Kondratjevan luomisruadoh näh .Kai kerdomukset oldih ylen mieldykiinnittäjät da oldih sanottu hyväl karjalan kielel .
Yhtenny ehtän Satu Hallenberg , Karjalan Liiton toimindujohtai , kučui kursilazii gostih .Gost’at tervehtettih koin emändiä erähän karjalazen pajon sanoil "Pertih tulduu karjalazet terveh teile sanotah… ".Sit kai istavuttih stolan tuakse da murginoittih , kui tovvelline suuri karjalaine pereh .Pidäy mainita , ku kai syömizet stolal oldih varustettu karjalan retseptoin mugah .Jälles murginua kai "pereh " kerävyi pihah .Sie soitettih gitaral da pajatettih karjalazii pajoloi .Oli ylen mielužu olla nämmien ristikanzoin joukos .Ylen hyvä da mieldykiinnittäi oli se ehty .
Paiči sidä kursuniekoile puutui kaččuo Aleksis Kiven roindukohtua Taaborinvuorel da Elias Lönnrotan roindukohtua da kalmua Sammatis .Vie oli ekskursii Lohjan keskiaigazeh kivikirikköh , ortodoksizeh kundah da puuhizeh časounah , kudai on nostettu rahvahan dengoil .
Onnuako monet lugiettih Valentina Kondratjevan kerdomuk sen "Poluudittu syväin ", kuduas on kirjutettu Hilku-nimizes tytös .Sie on kirjutettu , kui vangičukses
olles Hilku käi papilluo Lohjan kirikköh .Kursilazil puutui kävvä sih samah kirikköh , kuduah äijän vuottu tagaperin oli käynnyh Hilku .Oli kummu jouduo sih kohtah toizes muas , kuduah nähte olet lugenuh kerdomukses , da kaččuo omin silmin tämän kirikön da kohtan čomevuttu .
Karjalan kielen kursiloil oldih salbajazetgi da kai kursuniekat suadih tovestukset .Jälgimäzenny ehtän kai kursuniekat da opastajat kerävyttih Sääksjärven rannale pagizemah karjalakse , pajattamah pajoloi , lahjoittamah lahjoi toine toizele .Moizes ystävällizes joukos aigu meni ylen ruttoh .
Ainos on hyvä olla uuzis kohtis da tuttavuo uuzih mieldykiinnittäjih ristikanzoih , kuduat hyvin maltetah paista karjalakse .Ga , pahakse mielekse , moizis pidolois libo ei ole nuordu ristikanzua , libo niidy on ylen vähä .Tiettäväine , vahnembi sugupolvi parembi maltau karjalakse da kieli heil on puhtahembi da elävy .Olis hyvä , ku nuorembi polvi enämbäl käyttäs karjalan kieldy .Anna kaikin paistas karjalakse !
Karjalan kieli Nurmijärvel
карельский: ливвиковское наречие
Новописьменный ливвиковский