Тексты
Вернуться к списку | редактировать | удалить | Создать новый | Статистика | ? Помощь
Ol’ga Dubitskaja. Karjalan kieli. Lapsih vai aiguzih niškoi?
Ol’ga Dubitskaja
Karjalan kieli. Lapsih vai aiguzih niškoi?
карельский: ливвиковское наречие
Новописьменный ливвиковский
Jo
seminuaran allus L’udmila R’appijeva , Opastuksen kehityksen instituutan karjalan kielen metodistu , sanoi , ku tänäpäi ei sua paista ven’akse , vaiku karjalakse .Ku ken ruvennou pagizemah ven’akse , Karjalan Kielen Kodi "suuttuu " da tulou maksua šruafu .
Nina Barmina , Karjalan Kielen Koin emändy , saneli vähäzen koin histouries da pidi ekskursien .
Tämä seminuaru enämbäl oli praktiekalline – karjalan kielen opastajat ozutettih toine toizele , kui hyö pietäh urokkoi školis da kui ruatah lapsienke päivykodilois .
Suomelas-ugrilazen školan opastai Ol’ga Alontseva ozutti palazen omua urokkua .Sen aihiennu oli Kumalikko-kniigu .Häi kerdoi , kui pidäy opastuo runozii mustoh , kui sanella lapsile karjalazis kirjuttajis .
Tamara Ščerbakova saneli praktiekallizih urokkoih nähte da vie ozutti master-kluassu .Häi nevvoi , kui pidäy kirjuttua runoloi lapsih niškoi – se on ylen kebjei ,naizen sanoin mugah kirjuttua runo voibi viijes minuutas .Sinä piän Karjalan Kielen Koin seinis rodih äijy uuttu runuo .
Nina Barmina äijän vuottu ruadoi Nuožarven školan karjalan kielen opastajannu .Inehmine ozutti kaksi omua urokkua – "Naizien da miehien ruavot .Verbit " da "Karjalan perindölline syömine ".Opastajilegi täs urokas oli uuttu – kaikin duumaittih , ku ennevahnas karjalazien piäsyömine oli kala , ga tozidielol se oli nagris !Paiči sidä opastajat mietittih , mittuzet erot ollah hapoin , čupukan , kyrzyn da letun välis .
Vieljärven školan suomen da karjalan kielen nuori opastai Julija Ponomar’ova ozutti oman Kalat-teeman urokan toizeh kluassah niškoi .Omas urokas häi käytti čomazii , arbaituksii , prezentatsiedu da Vas’ka-tyttii , kuduadu häi pidäy omannu talismuanannu .
Tatjana Ignat’kova , Suomelas-ugrilazen školan karjalan kielen opastai , kudai ruadau enzimästy vuottu , sanoi , ku tämä seminuaru rodih ylen hyvä .Tatjanan sanoin mugah moizet seminuarat ollah hyövyllizet , enne kaikkie nuorile opastajile , kudualoil vie on vähä ruadon’eruo .Häi tahtou , ku moizii seminuaroi piettäs puaksumbah .
– Kai , mi on karjalan kielel , on hyvä , sanou inehmine .
Pidäy sanuo , ku Tatjana käyttäy uuzii tiedoloi omis urokois ."Oman Muan " seminuarah käydyy da uuttu tieduo suaduu , häi jo andoi opastujile kodiruaduo ruattavakse . Opastujil pidäy kiändiä karjalakse viizi virkehty Tatjana Berdaševan internet-kirjutuksis .
Vieljärven seminuarah yhtynyöt opastajat lähtiettih kodih lahjoinke .Jogahine sai lahjakse uvven karjalan kielen kirjaimikon da Poezija rodnogo kraja -runokogomuksen .Täh kniigah on kerätty runoloi karjalan , vepsän da suomen kielel , a taidoilijoinnu ollah lapset .
Äijät seminuarah käynnyöt karjalan kielen opastajat tiijusteltih , kus suau lugie täh pidoh nähte da nähtä kuvua .Sellitin heile , ku sidä kaikkie suau nähtä da lugie "Omas Muas ".Hyvät školien da päivykodiloin karjalan kielen opastajat , tilakkua Oma Mua -lehtie !Sie on äijy mieldykiinnittäjiä materjualua , kuduau suau käyttiä urokoil , on omat sivut lapsih niškoi .
Da pidäygo liigu kerdu mainita , ku karjalazennu olles da karjalan kielen opastandal leibiä lunnastajes , pidäy tilata da lugie omal kielel "Omua Muadu ".Hos kielen livuttamizekse .
Karjalan kieli. Lapsih vai aiguzih niškoi?
карельский: ливвиковское наречие
Новописьменный ливвиковский