Тексты
Вернуться к списку | редактировать | удалить | Создать новый | Статистика | ? Помощь
Darja Hil’. Kalages vastsihe vepsän kelen opendajad
Darja Hil’
Kalages vastsihe vepsän kelen opendajad
вепсский
Младописьменный вепсский
30. keväz’kud
Kalag’-küläs vastsihe vepsän kelen opendajad Änižröunan – Kalagen , Šokšun da Šoutjärven – školišpäi da lapsiden päivkodišpäi . Nece vastuz andoi čoman voimusen diskutiruida kehkeran stolan formatas kodikelen opendusen nügüdläižiš problemoiš da sen tulijas aigas .
Azjtegoho ühtniba vepsän kelen opendajad da tundijad Maria Mironova , Ol’ga Mironova , Ales’a Anušenkova , Anastasia Jevtušenko , Ol’ga Kokorina , Gleb Fomin da Jevgenia P’antukova .Vastusele tuliba školiden pämehed Svetlana Gotič i Svetlana Bikova , a mugažo Šoutjärven Kul’turpertin pämez’ Jevgenia Kokorina .
Kaikuččen školan ezitai starinoiči kollegoile kodikelen opendusen jügedusiš da erigoičusiš , a mugažo jagoihe ičeze idejoil i planoil .Ühtnikad homaičiba , miše heiden küliš om ühthižid problemoid da erigoičusid : openduzčasuiden lugumär školiš , kodikelen openduz lapsiden päivkodiš i m .e .Mugažo pagištihe siš , miše Änižröunan openikad paksus ühtneba erazvuiččihe konkursoihe , projektoihe da akcijoihe , miččed om sidotud rahvahan kul’turaha .
– Kacmata sihe , miše meiden školiš om vaiše üks’ kodikelen urok nedališ , openikad aktivižesti ühtneba vepsläižihe azjtegoihe , mi abutab oppida vepsän rahvahan kul’turad da kebnenzoitab vepsän kelen opendamišt , – sanui Šoutjärven školan opendai Ales’a Anušenkova .
Oficialižen palan ližaks vastusen programmaha mülüiba kul’turižed-ki azjtegod .Adivoiden täht vepsän kelen tundijad Maria da Ol’ga Mironovad vaumištiba "Heboine džutaspäi " -mastar’-klassan , sikš ku Päivnouzman kalendarin mödhe 2026. voden simvol om hebo .Mastar’-klassan aigan kaik pagižiba vepsän kelel da johtutiba , mitte znamoičend om hebol vepsläižes kul’turas .
Mugažo opendajad kävuiba ekskursijale Sovetskijan Sojuzan Gerojan Anna Mihailovna Lisicinan muzei-pert’he .Äjad opendajad oliba muzejas ezmäižen kerdan , heile oli ani melentartušt kundelta Kalagen školan pämest Svetlana Gotičad – hän starinoiči adivoile sen istorijas da eksponatoiš .Nece ozuti sidod vepsän rahvahan kul’turjäl’gestusen da kodikelen opendusen keskes .
– Specialistoiden da aktivistoiden ühtnend , tegijoiden da adivoiden ühthine rad – kaik nece tegi vastusen tulosekahaks . Om mugoihe virkeh : "Rahvaz eläb sihesai , kuni eläba sen kul’tur da kel’ ", se čomin ozutab vastusen pätegendan .Ühtnikoiden ühthine naprind tegeb suren panendan vepsän rahvahan unikaližuden kaičendaha , – sanui vastusen tegii Maria Mironova .
Vastusen tegijad spasiboičeba kaikid adivoid da toivoba , miše mugoižed azjtegod tehtas jogavoččikš .
Kalages vastsihe vepsän kelen opendajad
вепсский
Младописьменный вепсский