Тексты
Вернуться к списку | редактировать | удалить | Создать новый | Статистика | ? Помощь
Filina Jelena. Äipäiv
Filina Jelena
Äipäiv
вепсский
Младописьменный вепсский
Tünän
sobatan mujutan munid .Rindal ištub Kuz’mič .Hän kacub , midä minä tegen , i zavodib johtutada vanhad .
Hänen küläs mujutadihe munid Suren sobatan , kanman Äipäiväd .Lugetihe , ku mujutada munid Strašnijan pätničan , ka praznikan simvol teravas traviše i ei kaičeškande kanzad pahaspäi .Akad sanuiba : "Mäneškanzi haju Äipäivän munaspäi – varasta bedad pertiš ".
Minun uk kacub tarkašti nügüdläižid mujuainehid i johtutab :
– Olen sündunu vodel 1938.Elim mö gol’l’as , lujas gol’l’as .Söim sidä , midä Jumal da londuz andoiba .Nalogoid maksoim maidol , voil , munil , kartohkal , a ičeleze jäiba vaiše muruid .Kaiken tal’ven mamoi kerazi munid .Kaik pertiš teziba , kus oli nece peitsija .Oleskeli , ištud näl’ghine , vacan krutib , meletad : "Oliži hüvä munan söda "!Ka ei , ei sand .Munad Äipäiväks – pühä azj om !Kac , kanman Äipäiväd aigvoččed čapoiba pajud vai raidkor’t da päčil kuivatiba .A jäl’ges necenke kuivatud heinänke keitiba munid .Niiden muju oli muzav , mugoinežo , konz keitäd munid lukkorenke , vaiše völ čomemb .Kaikuččes pertiš munid mujutadihe erazvuiččikš – ken kut mahtoi .A meiden pertiš necen azjan täht paksumba ottihe pajud .Äipäivän homendesel mamoi tervehtoiti da risti meid , viž last , i andoi kaikuččele mujutadud munan .Kogonaižen päivän mö kävelim muna kädes külädme .Kandoim sen muga , kuti nece oli kalliž kivi .
Parahiman azjan lapsil oli turutada Äipäivän muna Pagodamägel .Mö kaik kerazimoiš ühtes i turutim üksjaižen munan mägelpäi .Tarkašti turutim , sikš ku tezim – ei ole enamba .Meiden tat oli kommunistan .Hän kel’di mamad valatada meid , sikš ristimamoid da ristitatoid meil ei olend .Erasile lapsile mugoižen lahjan andoiba völ ristimamoi da ristitatoi , a meil oli üks’ muna , sikš kaičim sidä .I mugoine sur’ ihastuz oli neciš ilospäi , tähäsai muštan .
Ehtal , konz ištuim stolan taga jumalaižen al , kaikutte meišpäi söi ičeze munan .I se oli meiden täht mitte-se erilaine , čudokaz , kaikid magukahamb .
Mujutan munid ičhižile da sebranikoile .Mujutan , kuvitelen prihašt muna kädes i pakičen : "Prosti , meid , Jumal !Prosti meid ažlakudes , kitmatomudes , siš , miše mö em voigoi tedištada tot .Prosti i pästa meiden südäimihe ihastust Sinun eläbzoitusespäi , miše eläda hüviš meliš i ei kadotada hüväd mel’t päividen rigos .Kut mahtoiba eläda meiden tatad ".
Äipäiv
вепсский
Младописьменный вепсский
–