Тексты
Вернуться к списку | редактировать | удалить | Создать новый | Статистика | ? Помощь
Ol’ga Dubitskaja. Ruadua vepsäläzien hyväkse
Ol’ga Dubitskaja
Ruadua vepsäläzien hyväkse
карельский: ливвиковское наречие
Новописьменный ливвиковский
Mennyön
vuvven lopus oldih sanottu vuvven 2016 Karjalan tazavallan palkindon suannuot rahvas .Vuvven laureatoikse oli sanottu 49 hengie .Niilöin joukos ollah ruadajat ristikanzat , vojennoit , eriluaduzien organizatsieloin johtajat , sportumiehet , liäkärit , opastajat .Nämmien ristikanzoin joukos on Nadežda Anatoljevna Petrova , Petroskoin Suomelas-ugrilazen Lönnrotan nimizen školan vepsän kielen opastai , kudamasgi rodieu pagin .
Opastuo vepsän kieleh Karjalas
Nadežda Anatoljevna Petrova on rodivunnuh Leningruadan alovehen Kurba-kyläh , umbivepsäläzien pereheh .Nadeždan vahnembat ainos paistih toine toizenke vepsäkse , ga omii lapsii ei opastettu pagizemah vepsän kielel .
– Konzu vahnembil pidi sanuo mitahto peitoči , ku myö emmo ellendäs , hyö paistih vepsäkse , mustelou inehmine .
Lapsusaijas Nadežda kävyi kerhoh , kuduas pajatettih da saneltih runuo vepsäkse .
– En malta sanuo , konzu rubein ellendämäh vepsäkse , ga rubeinhäi , sanou Nadežda . – Školas opastujes tahtoin olla nemčoin kielen opastajannu . Jälgimäzes kluasas opastujes kuulin , ku Petroskois on moine tiedokundu Pedagougizes instituutas , kuduas opastetah vepsän kieleh .Sinne minä piäzingi opastumah .Meijän enzimäzenny vepsän kielen opastajannu varustamiskursal oli Jelizaveta Haritonova .
Školas ruadajes
Nadežda Petrova ruadau vepsän kielen opastajannu Lönnrotan nimizen Suomelas-ugrilazes školas jo kaheksattutostu vuottu .
– Nygöi školas vepsän kieldy opastuu kaikkiedah 32 opastujua enzimäzes yhtehtostu kluassassah , enne oli enämbi opastujua , pahelziu naine . – Tänävuon 11. kluasas on vaiku nelli hengie , kuduat opastutah vepsän kieleh , ga se on suuri joukko . On mostugi kluassua , kudualois vepsäh opastuu yksin hengin .
Paiči opastandukniigua , kudualoi , sanakse , Nadežda Petrova iče kirjuttau , omas ruavos häi käyttäygi Kodima-lehtie da Kipinä-žurnualua , hyvin autetah ruavos Nina Zaitsevan vahnat opastandukniigat .
Opastandukniigoin kirjuttai
Nadežda Anatoljevna iče kirjuttau opastandukniigua yhtes Marina Geniatullinan kel .Nygöi on kirjutettu kogonazet komplektat alguškolah niškoi – opastandukniigu , ruadotetratti da audiodisku .Pidäy sanuo , ku audiodiskua iänitettih vepsäläzet aktivistat Galina Lokkina , Galina Baburova da Sergei Minvalejev .Vie on valmis viijenden kluasan komplektu .Inehmizien pluanois on kirjuttua opastandukniigat 11. kluassah suate .
– On tarveh kirjuttua uvvet opastandukniigat . Tiettäväine , Nina Grigorjevna Zaitsevangi kirjutetut opastandukniigat ollah hyvät , sie ollah mieldykiinnittäjät tekstat , ga net yksikai vahnetah .Opastandukniigat pidäy olla aijankohtazet , ku niilöis oldas nygyaigazet aihiet da lapsil himoittas lugie niidy , sanou Nadežda .
– Nämmä opastandukniigat on minun opastujien arvoruado . Niilöin , kuduat opastuttih enne da niilöin , kuduat opastutah nygöigi , tunnustau inehmine .
Aktiivine ristikanzu
Jo mondu vuottu Nadežda Petrova kävyy pajattamah Oma pajo -horah .
– Enzimäi L’ubov’ Nikitina kävyi meile školah , kus myö – viizi-seiččie hengie – pajatimmo , a sit häi kučui meidy horah pajattamah , sanou Nadežda .
– Nygöi myö kahtei Jelena Jurjevna Bukašovanke kävymmö horah pajattamah . Hyvin pajattamah karjalakse avvuttau se , ku minä ruan moizes školas , kuduas maltetah suomekse , vienakse dai livvikse .Minä nygöi hyvin ellendän livvikse , tunnustau Nadežda .
Nadežda Anatoljevnan sanoin mugah , nygöi häi omahizienke pagizou vepsäkse da Vkontakte-saital kirjuttau vepsäkse omile opastujile da vepsän kielen maltajile .
Paiči horua , Nadežda kävyy vie "Paginklubah " tarattamah vepsäkse .Vie inehmine kuuluu "Vepsän kul’tuursebran " halličukseh , sanastokomiissieh da vie pidäy yhtehisty ruaduo Opastuksen kehityksen instituutanke .
Inehmine pahelziu , ku hänel ei tävvy aigua kävvä kaikkih kohtih , kudualoih himoittas .
Vuvven 2016 laureattu
– Tämä korgei arvonimi rodih minule suuri vuottamattomus .Minule soitettih Aleksandr Hudilazen vastahottopertispäi 21. talvikuudu , juuri minun roindupäiviä vaste da sanottih , ku pidäy tulla suamah palkinduo .Enne sidä minul ei olluh mostu suurdu palkinduo , hos ainos yhtyin eriluaduzih kilboih .Joga vuottu libo vuvven peräs työnnän omii ruadoloi Paras karjalan , vepsän da suomen kielen metoudilline nevvo -kilbah .Voitin kilvas "Ven’an Federatsien paras opastai ".Paiči sidä yhtyin eriluaduzih seminuaroih , "pyöryžih stolih ", kerdou Nadežda Anatoljevna .
– En malta sanuo , ken kehoitti minuu laureatakse , ga meijän johtai Natalja Valerjevna Barkalova (Suomelas-ugrilazen školan piälikkö – toim .) ainos kannattau meidy , sanou Nadežda . – Olen ylen hyväs mieles , ku minun endizet opastujat kehoitetah da kannatetah vepsän kieldy , sanou inehmine .
Nadežda Anatoljevnan opastujua ruadau TV :n da ruadivon kanzalliskielizes toimitukses , Kodima-lehtes da Šoutjärven školas .
Oma Mua -lehten puoles hyvittelemmö Nadežda Anatoljevnua Vuvven 2016 laureatan arvonimen suaduu da toivotammo hyviä opastujua da uuttu voittuo kilvois da elaijasgi !
Nadežda Mičurova , Oma pajo -horan pajattai :
Omapajolazien puoles tahtommo hyvitellä meijän armastu pajattajua , vepsälästy inehmisty Nadežda Petrovua , ku häi rodih vuvven 2016 laureatakse meijän tazavallas .Korgiesti arvostammo hänen ruaduo vepsän kielen da rahvahan hyväkse .Anna tämä ruado jatkuu iellehgi .Toivotammo Nadeždale tervehytty , ozua da uuttu opastundukniigua .
Ruadua vepsäläzien hyväkse
карельский: ливвиковское наречие
Новописьменный ливвиковский
–
Дубицкая Ольга
Работать на благо вепсов
русский
–