Тексты
Вернуться к списку | редактировать | удалить | Создать новый | Статистика | ? Помощь
Nadežda Mičurova. Tiä Petroskoi. Huondespaginua juondamas on Fil’oin Miikul
Nadežda Mičurova
Tiä Petroskoi. Huondespaginua juondamas on Fil’oin Miikul
карельский: ливвиковское наречие
Новописьменный ливвиковский
Fil’oin Miikulan , Nikolai Filatovan iäni
kuului kogo Karjalas .Loittozisgi kylis , kus keskihierun kohtua paččahas oli ainavo piharaadivo , hänen paginoi vuotettih kai hierulazet .Kevätkuun 28. päivänny Karjalan tazavallan kunnivoittu ruadai , Ven’an Federatsien arvostettu radistu , Kolatsellän čupun karjalaine Nikolai Petrovič Filatov täyttäy 85 vuottu .
Rodivui Nikolai Filatov Tulomjärven rannal , Haroilan kyläs .Jälles voinua heijän pereh muutti elämäh Robohlah Naravozen joven suuh .Kolatsellän školan loppiettuu vuvvennu 1956 Fil’oin Miikul piäzi opastumah Petroskoin yliopiston histouriifilolougizen tiedokunnan suomen kielen ozastole .Vuottu myöhembi suomen kieldy ruvettih pengomah školis da yliopistos .Suomen kielen ozasto salvattih , pidi opastuo ven’an kieleh da literatuurah .Yliopiston jälles Nikolai Petrovič yksitostu vuottu ruadoi opastajannu eri školis , opasti lapsile ven’an kieldy , literatuurua da kai fiiziekkua da matemuatiekkua .Viizi vuottu häi johti Kolatsellän školua , ga parahannu mieliruavonnu oli ruado Karjalan raadivos .
Raadivontoimittajan leibih Fil’oin Miikul tuli vuvvennu 1972 da ruadoi sie yhteh palah kaksikymmen seiččie vuottu .Raadivoh tulduu häi kerras libui luadimah paginoi omal karjalan kielel .Puutui Fil’oin Miikulal varustua suomen - da vepsänkielizii lähetyksii , avvuttua TV-programmoin luajindas .Nikolai Petrovič magnitofonanke oli pitkin poikkizin ajelluh ymbäri Karjalua da pagizutannuh mondu sadua ristikanzua .Joga kyläs händy tietäh da mustellah hyväl sanal .Kui iče sanou Nikolai Filatov : "Rahvas moitittih , konzu hätken en käynnyh heillyö ".Oligo se suuri herru libo mual ruadai da žiivatoin kazvattai , jogahizenke miehel löydyi paginua .
Karjalan raadivo - da tv-toimitukseh tulduu Nikolai Filatoval pidi uvvessah mustoittua suomen kieli .Suomen kielen neron häi sai vie školas opastujes .Raden’n’an da tirpandan vuoh Nikolai Petrovič muga hyvin opastui suomen kieleh , ga jälles händy kai moneh kerdah kučuttih kaikenmoizih kanzoinvälizih pidoloih kiändäjäkse .Puaksuh häi ajeli Suomeh yhtes Karjalan opastusministerstvan herroinke .Eläkkehel olles Nikolai Filatov ei istu joute ruavottah , kuda-midä kiändäy da kirjuttelou Oma Mua -lehteh da Taival-al’manuahah .Häi on kiändänyh karjalakse Nikolai Nekrasovan Syvysigävy-ozutelman , Pyhäžy dielo - da Hodari -spektaklit Kanzallizeh teatrah niškoi .Nikolai Filatov ylen äijäl suvaiččou kävvä kalah .Kalastamah häi rubei seiččievuodizennu N’akoilammis , se kolme kilometrii Vieljärven kyläspäi .Sidä tiedy häi ainos kävyy kalah ."Mih nuorete olet harjavunnuh , se ijän kaiken on veresgi ", sanou Nikolai Petrovič .
Nikolai Filatov on ozakas tuatto da suvaiččii died’oi .Hänel on kuuzi bunukkua .Tänäpäi miehen mielet ollah pilvettömäs huomenizes päiväs , karjalan rahvahan da kielen tulies aijas .Enämbi kaikkie häi tahtou , gu omat oldas tervehen daigi händy tervehys ku ei pettäs .Ole terveh da pyzy pystys , kunnon karjalaine mies !Meile , "Oman Muan " da raadivon da tv :n toimittajile on ilomieli hyvitellä teidy , armas Nikolai Petrovič , suuren merkipäivänke da sanuo suuret passibot teijän alallizes avus da nevvolois .
Tiä Petroskoi. Huondespaginua juondamas on Fil’oin Miikul
карельский: ливвиковское наречие
Новописьменный ливвиковский