Тексты
Вернуться к списку | редактировать | удалить | Создать новый | Статистика | ? Помощь
Nadežda Mičurova. Kevätloman luagerit Mägriän školas
Nadežda Mičurova
Kevätloman luagerit Mägriän školas
карельский: ливвиковское наречие
Новописьменный ливвиковский
Anuksen
piirin Mägriän školan opastajat kevätloman aigua järjestettih luagerit – ehtittih ruadua daigi huogavuo .Hyviä dieluo vajuas nedälis heil suitui aiga tukku .
Luageriloin ruadoloin luvettelos oldih Anuksen piirin opastajienväline stolatennisan kiža , kudamas mägriäläzet roittih enzimäzikse , volont’uorujoukkoloin festivuali Piiteris , kus oli pietty karjalazen tansun masterkluassu , vastavus oman čupun školien opastajienke , kuduat saneltih školaruadoloi da juattih omii ruadoneroloi .
Kevätkuun 30. päivänny Lahdenpohjan keskuskirjastos oli avattu taido-ozuttelu nimel "Otraženije ".Sinne yhtes toizien ruadoloinke kačottavakse pandih Mägriän školan opastajan Jelena Pogiban kuvatgi .Loman aigu oli pietty vesseläh da hyövynke .Nelländen opastusvuvven nelländeksen opastajat da opastujat allettih yhtespivos , kudaman omistettih Moskovan teraktah kuolluzien mustole .
Luageriloin ruaduo sanelou Mägriän školan algukluasoin
opastai Inna Mitroškina :
– Kevätloman aijal Mägriän školan lapsil ei olluh aigua ruadua tyhjiä da atkaloija .Školas ruadoi kaksi luagerii : "Oman muan suvaiččijat " da huogavundan luageri "Mägrät ".Luagerilois elaigu kiehui joga päiviä .Školah tulduu lapset ezmäi luajittih huondesniveldyksen , syödih huondesveruo da sit äski tartuttih kaikenjyttymih dieloloih : kižattih keskenäh Jiäkur’oi-stolakižah , käydih vahnembienke pihale sportupaikale .Yhtes opastajienke školaniekat ajeltih Anuksenlinnan ližäopastuksen keskukseh kaččomah linduloi , kukkiloi , kanoi , kodijänölöi da toizii elättilöi .Siegi lapset oldih skalodromal , kus opastuttih kangiekseh yläh seinii myö .Yhtennypiän Mägriän školan opastajan Marija Trihpojevanke pastettih keitinpiiraidu , tossupiän istutettih muah pomidoran da persun siemenii .Kodvazen peräs niilöis kazvetah taimenet , kudamii lapset istutetah školan pihah da erähii taimenii juatah Mägriän vahnembile eläjile .
Puutui patriottuluagerin lapsil ajellagi Petroskoile .Sie hyö käydih Karjalan tazavallan Kanzallizeh muzeih da batuttukeskukseh .Lapset suvaijah da vuotetah keziä , a kezässäh vie on kaksi kuudu .Sit viijenden da kuvvenden kluasan opastajat taluttih lapsii Lodienoile uidelemah basseinah .Vot oli hyviä mieldy tyttölöil da brihaččuloil .Vahnembat lapset , kudamat käydih Ruavon da huogavundan luagerih , avvutettih Voiton verkot -joukole luadie peittoverkoloi da juoksuhaudutuohuksii .Muga školaniekoin avul sai uvvistua školan tiijoituslavvat , ruokkie hierun velleskalmu da Mägriän školan piha .Voibi sanuo , gu nämmä lapset piettih kevätloman aijan hyövynke .Suadih hyögi hot pieni , ga jen’gupalku .Kevätkuun 28. päivänny yheksänden kluasan lapset yhtes opastajan Tatjana Rodionovanke käydih Petroskoile kaččomah koulledžoi , kunne suau puuttuo opastumah jälles yheksätty kluassua .Nelli päiviä Mägrät-joukon volont’uorat oldih Piiteris kolmandelkymmenendes volont’uoroin festivualis .Net lapset harjavuttih ruadamah vierahis nuorižojoukkolois , käydih kaččomah Piiterin histouriellizii kohtii , viettih kukat mustopaččahalluo , kudai on Voiton puustos .Karačova Darina da Skvortsova Anastasija enzi kerdua opittih olla joukon vahniminnu .
Kevätloman luagerit Mägriän školas
карельский: ливвиковское наречие
Новописьменный ливвиковский
–
Дубицкая Ольга
Лагери на весенних каникулах в мегрегской школе
русский
–