Тексты
Вернуться к списку | редактировать | удалить | Создать новый | Статистика | ? Помощь
Nadežda Mičurova. Et tunne igii, konzu pajatat
Nadežda Mičurova
Et tunne igii, konzu pajatat
карельский: ливвиковское наречие
Новописьменный ливвиковский
Anuksenlinnas
Karjalan kompleksusotsiualukeskuksen ozaston tyves pajattau Pohjaine muarju -joukko .Sen pajoloi kuuluu ven’akse da karjalakse .
Jälgivuozinnu Karjalas on kazvanuh sotsiualukeskuksien lugu , kus pietäh huoldu vähävarazis perehis , vahnois da niistielöis .Anuksenlinnas moine Karjalan tazavallan kompleksusotsiualukeskuksen ozasto ruadau Peldouuličal vuvves 2011.Sinne kävyy eläkkehel olijua rahvastu , kel kois on igävy olla da kel on himo kehittiä omii neroloi eri kerholois .Kengo muite suvaiččou piirustua , ommella da niegluo , a kengo pajattua da sportuija .Joga toine täs keskukses löydäy dielon omua mieldy da syväindy myöte .Jo kaheksa vuottu sotsiualureabilitatsien ozastol harjaittelou "Severnaja jagoda ", karjalakse Pohjaine muarju -pajojoukko , kudamua volont’uorannu vedäy Svetlana Morozova , soittajannu on Viktor Rigojev .Enne pajojoukon roindua keskukses oli karaoke-kluubu , sen jälles horapajoloin suvaiččijoin kluubu .Äski sit rodih Pohjaine muarju -joukko .
— Myö ylen hätken duumaičimmo , mittuine nimi panna meijän joukole . Naizet tahtottih olla "muarjazinnu ", ga kaikis nimilöis valličimmo "Severnaja jagoda ".Sen nimen taričči meile meijän pajattai Galina Vdovinova .Ruutatgi ollah muzavanruskiedu värii .Meijän naizet kaikin maltetah pajattua , hos niken heis ei ole opastunnuh sih dieloh .Erähät vie lugietah runoloi karjalakse .Myö pajatammo yhtel iänel .Minä kiitän meijän naizii , gu hyö ollah ylen vastuollizet da ainos kävväh pajattamah , sanou Svetlana Morozova , Pohjaine muarju -pajojoukon johtai .
Enne pajojoukkoh tulendua Svetlana Morozova ruadoi juuri sit samazes sotsiualukeskukses kul’tuurupidoloin järjestäjänny .Sen ližäkse häi äijän vuottu pajatti Anuksen Karjalan koivu -horas , sendäh kai tämä ruado on hyvin tuttu hänel .Svetlana Petrovna mielihyväl vedäy repetitsieloi , a pajattajat ylen äijäl suvaijah händy .
Pruazniekkah rouno
Tänäpäi Pohjaine muarju -joukkoh kävyy nellitostu naistu .Kaikis vahnimal , Marija Artamonoval , on kaheksakymmen seiččie vuottu .Pajattajat ollah kirmiet jallal da vesselät .Joga repetitsieh , kudamii pietäh kaksi kerdua nedälis , ezmässargen da kolmanpiän , kävväh pruazniekkah rouno .Yhtes pajatetah , pietäh vastavuksii da huogavutahgi .Pajo naizil ainos on keräl .Pohjaine muarju -pajojoukko pajattau hyvin tundiettuloi ven’alazii , Nevvostoliiton aigazii da rahvahan pajoloi .Svetlana Morozova valliččou moizii pajoloi , kuduat ollah tuttavat rahvahale , da kudamii suvaiččou pajattua vahnu polvi , kerdu ezitytäh naizet omas sotsiualukeskuksesgi .
Karjalazet pajot ollah kullan kallehet
Vuvvennu 2022 "Pohjaine muarju " yhtyi suureh Hengen garmounii -projektah , kuduadu Anuksen sotsiualukeskus todevutti yhtes Karjalan tervehys -hyvyönluadijan fondanke .Abujen’gua projektu sai Karjalan piämiehen grantukilvas .Projektu oli azuttu sih niškoi , gu avvuttua eläkkehelolijal rahvahal parandua mielialua , omaničentunduo da tervehytty muuzikan , pajoloin , tansiloin da runoloin lugemizen avul .Projektan aigua suurdu huomivuo kiinitettih Karjalan rahvahan kul’tuurah da kieleh .Pajojoukos äijät maltetah karjalakse , ga paginluadu jogahizel on oma , gu pajattajii tiä on eri kylispäi .Niilöil , ket ei malteta kieldy , oli jygiettävy – pidi kai sanat opastuo .Muga Pohjaine muarju -pajojoukkoh tuli karjalazii pajoloigi , kudamat tänäpäi ollah kullan kallehet .Projektan lopus "Pohjaine muarju " yhtyi suureh pruazniekkufestivualih , kudai piettih Kondupohjas .Sinne tuli pajattajii Kalevalas , Kondupohjas , Anukses da Priäžäspäi .
– Minä ylen äijäl suvaičen karjalazii pajoloi . Ylen miellyttäy "Magei muarjaine ".Pajo andau hyviä mieldy da tervehytty .Minä ylen äijäl vuotan repetitsiipäivii , gu tulla tänne pajattamah .Meil on ylen hyvä joukko da ohjuaju Svetlana Petrovna , pehmeisydämelline da näbei .Olemmo gu suuri pereh .Piemmö yhtes pruazniekkoi , juommo čuajuu da pajatammo , a vie ajelemmo konzu kunne .Ei ammui olimmo Lodienoil , kävyimmö sinne muzeih .Enne mullostu pajojoukonke olimmo Kondupohjas .Pajatimmo Kotkatjärves , Alavozes , Nurmoilas da Petroskois .A enne sidä naizet ajeltih vie Tihvinäh da Terveniči-kyläh , sanelou pajattai L’udmila Aksentjeva .
Soitto ainos pyzyy käis
Pajojoukon soittai Viktor Rigojev on ylen nerokas mies – midä kuulou , sidägi soittau .Soittamah häi rubei seiččemes vuvves algajen .Sih dieloh Viktor Ivanovič ei ole nikus opastunnuh .Kuuli vai , kui enne omas hierus Pienes Sellis soitettih .Perehesgi oli omua soittajua .Viktor Rigojeval on kaksi kallistu diplomua , kudamii häi pidäy ruokos .Yhten diploman häi sai Amurskije volni -val’san soitandas .Sen Viktor Ivanovič työndi Kazanih Luč-2022 -nimizeh kogo Ven’an festivualikilbah da sai enzimäzen sijan .Kolmanden palkindon diploman Viktor Rigojeval annettih Pajo muamale -onlain-kilvas .
– Minä algain kävvä sotsiualukeskukseh onnuako vuvvennu 2012, konzu tiä oldih pruazniekat . Niilöi pidi Veteruanoin nevvosto .Silloi sen johtajannu oli Nikolai Bol’šakov , i häi kučui minuu tänne soittamah .Tualles muzikantannu ruadoi Nadežda Saveljeva .Häi soitti akardeonal .Jälles händy minä rubein soittamah , a Svetlana Petrovnanke myö zavodimmo jo myöhembi .Kevätkuul meijän joukol rodih jo kaheksa vuottu , sanelou Viktor Rigojev .
Pohjaine muarju -pajojoukko yhtyi äijih kui Karjalas , mugai Ven’al piettylöih pajokilboih da festivualiloih , kus oli parahien joukos .Pajojoukko ainos yhtyy Anuksen kanzallizen muzein da kirjaston pidoloih , ozuttau konsertoi Vahnoin kois da sotsiualukeskuksis .Nygöi naizet varustutah Voitonpäiväh da opastutah uuzii pajoloi .Tottu sanotah : "Kuni syväin pajattau , sini elaigu jatkuu ".
Et tunne igii, konzu pajatat
карельский: ливвиковское наречие
Новописьменный ливвиковский