Тексты
Вернуться к списку | редактировать | удалить | Создать новый | Статистика | ? Помощь
Nadežda Mičurova. Karjalan Rahvahan Liiton Alavozen alaozaston ruaduo vuvven 2023 aigua
Nadežda Mičurova
Karjalan Rahvahan Liiton Alavozen alaozaston ruaduo vuvven 2023 aigua
карельский: ливвиковское наречие
Новописьменный ливвиковский
Alavozes 8. talvikuudu
piettih KRL :n Alavozen alaozaston vuozikerähmö , kudamas paistih vuvven 2023 ruadolois .
Vuozikerähmö algavui Mix-lapsien teatran ezitykses .Lapset ozutettih Kaššali-spektaklin karjalan kielel .Mix-teatru Alavozen keskiškolan tyves ruadau jo tostu vuottu da se jo varusti kaksi spektaklii ."Kaššali " ei muga ammui oli ozutettu alovehellizes Karjalaine suarnu -festivualikilvas . Sit spektaklis lapsien teatru , sen johtai Svetlana Proničeva da ohjuaju Antonina Rossijeva suadih piäpalkindon .Kandelehelsoittajien Ilomieli-ansambl’u soitti omaluadustu Kalevalan muuzikkua , a Romaška-päivykoin lapset ozutettih Kirjavu kanaine -pienen spektaklin karjalan kielel .Sidä vuozikerähmöh tulluot suadih kaččuo internetači .KRL :n Alavozen alaozasto algavui Alavozen taigin -teatrustuudiespäi .Jo silloi Alavozen eläjät tiettih , gu on olemas moine KRL :n järjestö , kudai yhtistäy Petroskoin linnan da Karjalan eri piirilöis eläjii karjalazii da ruadau oman rahvahan da kielen hyväkse .Muga Alavozen karjalazet yhtyttih sen ruadoh .KRL :n johtokundah vallittih kylän kieliaktivistua , ven’an kielen da literatuuran opastajua Valentina Libertsovua .Gu Valentina Vasiljevna ainos kirjuttau Oma Mua -lehteh Alavozen kylän elaijas , rahvahas , hyvittelöy roindupäivienke alavozelazii , händy kyzyttih pidämäh lehten tiluandukompuaniedu , gu potakoija rahvastu enämbäl lugemah karjalan kielel .Sen ližäkse häi azui Kirjutammo karjalakse -joukon vk :sivun , kunne panou materjualoi karjalan kieles da literatuuras .Mennytvuon Karjalan Rahvahan Liitto sai abudengua Karjalaine etnoklasteru -projektan todevuttamizeh .Alavozen karjalazetgi yhtyttih sih projektah .Enzimäzikse järjestettih karjalan kielen kursit Alavozen školas .Kursiloin vedäjänny oli karjalan kielen opastai Antonina Rossijeva .Opastumah karjalan kieldy toiči kerävyi kai kaheksatostu hengie .Pidäy sanuo , gu Alavozen karjalazet ainos ollah lekkehil .Nygöi hyö ollah varustamas uuttu Nevvostoliiton aigastu spektaklii karjalan kielel .Alavozen taigin -teatrustuudii ruadau vuvven aloh .Artistat kerävytäh joga nedälii ezmässargiloin .Teatran ohjuajannu on Ol’ga Limarenko .Ol’ga Pavlovna ylen čopakosti da tarkah varustau spektakliloi , maltau hyvin ruadua rahvahanke .A vie häi joga vuottu viizin kuuloin ruadau laival , sanelou ven’alazile turistoile karjalan rahvahan histouries , perindölöis , kul’tuuras da kieles .Tuhukuul Alavozen taigin -teatran rahvas oldih Aleksalan hierus spektaklinke "Kui bajari seppii kadehti ".Jälles ozutettih Ku-ku-spektaklii Anuksen kanzallizes kirjastos Pagizemmo karjalakse -vastavuksen aigua da Anuksen karjalazet -yhtistyksen merkipäiväl .Alavozen karjalazet ainos yhtytäh Vladimir Brendojevan nimizeh Täs synnyinrannan minun algu -literatuurufestivualih .Tänävuon se oli omistettu Anuksen kadrielile .Kezäkuus "Alavozen taigin " ajeli Veškelyksen kyläpruazniekale yhtes Kummažet-pajojoukonke , ezityi Karjalan kielen kois Vieljärves .Ligakuus artistat yhtyttih Taidosuari-suomi-ugrilazien teatroin festivualih .
YHTES ON KEBJEMBI RUADUA
Kummažet-pajojoukko on pajattamas joga Alavozen kylän da Anuksen rajonan pruazniekas .Tänävuon naizet ezityttih viizikymmen kerdua .Pajatettih hyö Tuuksel , Kuittizes , Videles , Mägriel , Anukses , ajeltih Priäžäh da Vieljärveh , yhtyttih Segežas , Sordavalas da Puudogas piettylöih pajokilboih .Ylen syväh painui mieleh matku Tverin karjalazien luo , kus joga vuottu pietäh Kalitka-pajofestivualii .Eri festivualiloin da pajokilboin ozanottajat da laureatat "Kummažet " ei seizota yhtel kohtal , opastetah uuzii pajoloi da nygözien pajoloin kiännöksii , kudamii tuvvah iče Alavozen karjalazet : Vera Kondratjeva , Ol’ga Limarenko , Vera Larionova , Valentina Libertsova .Nygöi "Kummažet " ezitytäh yhtes Alavozen taigin -teatrujoukonke .
MUUDU RUADUO
Joga vuottu Alavozen karjalazet kirjutetah saneluu karjalan kielel .Kompjuutoran tiedäjät rahvas yhtytäh Karelija – eto mi -kilbah , kuduadu pietäh kevätkuus karjalan kielen nedälin hantuzis .Kezakuun 9. päivänny rodivui vie yksi uuzi pruazniekku "Karjalazien runoloin päivy ".Mennytvuon Valentina Libertsova yhtyi Oman runon ečos -kilbah da rodih voittajakse eeppizen pajon Pedri I Viborgas -scenuarienke .Tänävuon voittajien joukkoh puututtih Ilomieli-kandelehelsoittajien ansambl’ugi , kudai soitti "Karjalazen runon kandelehes " da Alavozen školan opastajat Svetlana Proničeva da Antonina Rossijeva diafil’manke "Mezikämmenen mečästys " školateatran spektaklin meterjualoin mugah .Tänävuon Alavozen karjalazet avvutettih nuorii tiedomiehii yhtymäl Vepkar – korpusan luadimizen marafonah , kudamas suadih enzimäzen da kolmanden sijat .Nygöi uvves kielikorpusas ollah Nina Ivanovan , Vera Larionovan , Antonina Rossijevan da Valentina Libertsovan paginkappalehetgi .Sen ližäkse Alavozen karjalazet kannatettih Kiži-muzein ruadajua Anna Anhimovua hänen kahtes projektas .Suurdu ruaduo liittolazet pietäh lapsienke .Avvutetah lapsien Alazet-taidostuudiele , Jumalan lapset -pravoslavnoin prihodan luagerile , sanellah lapsile karjalazien perindölöis , folklouras , literatuuras .Alavozen karjalazil on yhtehisty ruaduo Anuksen kanzallizen muzeinkegi .Mennytvuon Valentina Libertsova yhtyi enzimäzeh Prilukinan lugemizet -konferencieh da illaččuh "Vahnan abažuuran al ".Yhtelläh sellitettäviä probliemua on : – Lehtilöi ei tuvva rahvahale aigoinah .Se koskou Oma Mua -lehtiegi .Poštankandajal palku on pieni , ga ruaduo on kylläl .Nygöi lehtilöi tuvvah Anuksespäi Alavozeh kerran kahtes-kolmes nedälis .Uvvet poštankandajat , toinah kielen pahoi tiedämizen periä , ei oteta karjalankielizii lehtilöi .Net jiäjäh virumah poštale .Ei himoita , gu Alavozen eläjät heitettäs Oma Mua -ehten luvendan da tiluandan .– Pahoi kävväh avtoubusat . Alavozen pos’olkas siiriči mennäh pienet mikroavtoubusat Sordavalaspäi Petroskoile da sit ehtäl järilleh Petroskoilpäi Sordavalah .Niilöih avtoubussoih on jygei puuttuo , gu ajajua on äijy .Piiterin avtoubusat ei oteta rahvastu lyhyölöil matkoil .Sen periägi on jygei puuttuo Anukseh da toizih kylih .Toiči pidäy tilata taksimašinat , ga hinnat niilöih ollah liijan korgiet .Moizih eländykohtih kui meijän Alavoine pidäs olla omat avtoubusat .KRL :n Alavozen alaozastos nygöi enimyölleh ruatah penziel olijat rahvas .Heijän suurembii huolii da toivomuksii on se , gu liittoh tulis nuordu , aktiivistu rahvastu .Nuores väishäi on tulii aigu , muamankielen da karjalan rahvahan .On kirjutettu Alavozen karjalazien dokluadan mugah .
Karjalan Rahvahan Liiton Alavozen alaozaston ruaduo vuvven 2023 aigua
карельский: ливвиковское наречие
Новописьменный ливвиковский