Тексты
Вернуться к списку | редактировать | удалить | Создать новый | Статистика | ? Помощь
Jelena Ruppijeva. Priäžäläzen “Melličän” idoizet kazvetah
Jelena Ruppijeva
Priäžäläzen “Melličän” idoizet kazvetah
карельский: ливвиковское наречие
Новописьменный ливвиковский
Idoizet-leirin Melliččy-fondah kuulujat
piettih omis uuzis kohendettulois tilois – Art-selo -yhteiskunnallizes rezidentsies .Tämä oli jo toine leiri , kudaman Melliččy-fondu on pidänyh lapsih niškoi , ku suas harjaittua heidy perindöllizih käziruadoloih .Enzimäine oli tämän vuvven kevätkuul .Silloi Priäžäh tuli seiččie lastu .Täl kerdua joukko on suurennuh – "Idoizih " tuli opastumah kaksitostu tyttösty da kolme brihaččuu Petroskois , Nuožarves , Pyhärves da Priäžäspäi .Kolme hengie heis on ottanuh ozua enzimäzeh leirihgi .Lapset oldih eri-igäzet , nuorimal ozanottajal on seiččie vuottu igiä .
NERONIEMELE
Nellän päivän aigah "Idoizet " harjavuttih eri käziruadoloih .Leirin programmu oli monipuoline da joga päiviä lapsil oli mondu voibi sanuo käziruadourokkua – muasteripajois opastustu .Priäžän Niittine-kluuban naizet Аleksandra Mihailova da Svetlana Demedenko tuttavutettih heidy kuvondu-neroloih .Priäžän Lastu-pajan ižändy Leonid Jakovlev harjaitti puusepän ruadoh .Miehenke yhtes leiriläzet luajittih puus aidazen jyttyzen avaimien seinypiettävän .Čalnalaine käziruadomuasteri Natalja Fomina nevvoi , kui voibi ičel keittiä duuhukas muilu .A čalnalaine neroniekku Jelena Kuzmina opasti lapsii luadimah tyttii oman ičen akkiloittavakse da ozutti , kui villas kuivan kataičendan vuoh voibi luadie čoma kalaine .Priäžäläine Irina Lotto sežo harjaitti lapsii kataičenduruadoh , ga jo toizeh tabah – märgäh .Hänen avul "Idoizet " luajittih kataitut kuvat hiilavien astieloin ual piettävih alustoih niškoi .Aiga suuri takku omin käzin luajittuu rodih joga lapsel kodih lähtijes .Äijät heis vaste "Idoizis " on ruvettu tuttavumah käziruadoneroloih .
OMA ILDAINE DA KIŽAT
Lapsii on syötetty da eläitetty leirin aigua .Art-selo -rezidentsies on pättävät tilat sih niškoi – keitändy - da syöndypertit da magavopertit .Kai syömisverot lapsile tuodih kylän erähäs koufeilaspäi , kerran vai leiriläzil pidi ičel šeimie ildaine .Varustettavakse yhteh iäneh vallittih burgerat .Ei vikse smietitty , ku kai tulou azuo ičel , päpit dai katlietat .
Toko oli hälyy keitändypertis niilöin varustajes !Ga kai loppih hyvin , nälläl vačal niken muate ei vierryh , čiganoi unis ei nähnyh .
Paiči tädä Keitämmö iče -programmua ehtil leiriläzile oli kehitetty kižua , pihal olendua da kävelendiä .Leirin erähänny piän gostih lapsilluo tuli nuožarveläine Vladimir Neronov , kudai ozutti , kui pidäy kižata perindöllizeh karjalazeh kyykkä-kižah .Mies toi keräle Reboi da hanhet -stolakižangi , kudai oli luajittu nuožarveläzien da pyhärveläzien erähän projektan aigua .Aigua lauččua painua "Idoizis " ei olluh ni ehtäl !
LÄMMÄT VASTAVUKSET
Idoizet-leiri oli kui hyvien ystävien lämmy nellipäiväine vastavus .Lapset jiädih hyväh mieleh , passiboittih leirin järjestäjii da uskaldettih tulla vie .A leirin pidäjät , Melliččy-fondan neičykkäzet , on ruvettu reknailemah tulieloi vastavuksii .Enzimäine leiri tämän vuvven keviälhäi sai pidiä projektan aigua , se oli ilmaine sen ozanottajih niškoi .Tämä toine oli kogonah iččeh hardieloile otettavu da lapsih niškoi maksolline .Roinnougo sih kiinnostustu da tulijua , sidä vikse ebäiltih , ga ruado puutui ruadua dai se hyvin oli ruattu .
– Duumaičen , ku myö jatkammo tädä ruaduo . Moizii leirilöi huavuammo pidiä lapsien lomien aigua da vie mieles olis luadie mitah huogavopäivyprogrammu perehih niškoi , kudamas käziruavot roittas ezisijal , sanelou Melliččy-fondah kuuluju Sofja Iljutkina .
Priäžäläzen “Melličän” idoizet kazvetah
карельский: ливвиковское наречие
Новописьменный ливвиковский