Тексты
Вернуться к списку | редактировать | удалить | Создать новый | Статистика | ? Помощь
Jelena Ruppijeva. Nuožarveläzien ruado on kiitettävy
Jelena Ruppijeva
Nuožarveläzien ruado on kiitettävy
карельский: ливвиковское наречие
Новописьменный ливвиковский
Mennyt
pyhänpiän , 31. heinykuudu , Nuožarves piettih kylän päiviä .Kylä on täyttänyh 526 vuottu .Paiči suurdu pruazniekkua , kudaman varustettih nuožarveläzet , kylän roindupäiväkse sai kohenduagi dorogu , kudai yhtistäy Keskusuuličan da federuallizen juaman .Kohendetun dorogan avuajazet pandihgi pruazniekan alguh .
Vie yhten suuren ruavon ollah ruattu nuožarveläzet .Tänävuon oman kylän päiväkse , kudai piettih Nuožarves heinykuun jälgimäzenny piän , kyläs puutui kohendua Keskusuuličan da federuallizen juaman yhtistäi dorogu .Tädä dorogua myöte nuožarveläzet ylen puaksuh ajellah .Sidä myöte suau piästägi federuallizel juamal olijale avtoubusan azetuskohtale .Mulloi kyläs toimijan Alovehellizen yhteiskunnallizen ičehalličuksen – TOSan – projektan hyvyös tälle dorogale suadih tuli .Tänävuon Rahvahalline b’udžiettu -programman hantuzis sai panna kundoh iče dorogu .Sih ruadoh nuožarveläzet ollah suadu puolitostu miljonua rubl’ua .
– Myö todevutammo äijän projektua , opimmo yhtes kunnostua omua kyliä . Täl kerdua , konzu duumaičimmo , kui voimmo ottua ozua Rahvahalline b’udžiettu -programmah , piimmö kyzelyn , enimät kylän rahvas kannatettihgi tämän dorogan kohendamizen , sellittäy Nuožarven kyläkunnan piälikkö L’ubov’ Ponomar’ova .
Kohendettu dorogu on kivittämätöi 600 metrii piduhine muadorogu .Heinykuul dorogan kohendamizeh ottavunnuh laitos on leikannuh dorogan vieres kazvajat tuhjot , juurdanuh sit da vedänyh iäres kannot da kivet , kaivanuh ojat dorogan reunoile da pannuh truvat , tazoitannuh dorogan pinnan da täyttänyh olluot havvat čuurul da hiekal .
Nuožarveläzien oman kylän hyväkse ruattavat ruavot ei azetuta ni kodvazekse da ollah ainos nägyvis , ku ollah tärgiet da aijoinaijallizet .Kylän päivänny äijät aktiivizet nuožarveläzet ollah suadu kiitändykirjazet virguniekois da Zakonoinhyväksyndykerähmön deputuatois .A Nuožarven kyläkunnan piälikkö L’ubov’ Ponomar’ova on suannuh Kanzallizen da alovehellizen poliitiekan ministerstvan rynnäsmerkin omas panokses kanzallizen yhteiskunnan kehitändäs Karjalan tazavallas da Nuožarven kul’tuurutaloin johtai Galina Jelisejeva – Kanzallizen da alovehellizen poliitiekan ministerstvan kiitändykirjazen projektoin hyvinmenijäs todevutandas Nuožarven kyläkunnas .
PRUAZNIEKAN ŠOHUU
Kylän päiväkse nuožarveläzet sežo varustuttih da ruattih äijän .Niitettih heinät pruazniekkulagevol , kohendettih aijan da aiduveriät , lavan da lahonnuot da murennuot laučat , kruasittih lavan da laučat , luajitettih uvvet bannerat lavale .Pädöy pruazniekku pidiä da gostii vastata !A rahvastu pruazniekkah tuli äijy : omua kylälästy dai tulolastu .Lämmin vastahotandu da monipuoline programmu vuotti jogahistu .Täh programmah kuuluttih jarmanku , tansit da pajot ven’an da karjalan kielel , magiel kalarokal gostitandu , kyykkäh kižuandu , nuožarveläine kruugu , Kyläläine -ozuttelun ezitändy .Pruazniekkujarmankal oli kaikkie myödävänny : käziruadoluajilmustu da čomendustu , nieglotestu da kuvotestu , kukkazii , paikallistu metty da varen’n’ua , kaikenluadustu karjalastu piiruadu : nägyy ei muattu Nuožarven dai toizis kylispäi tulluot emändät pruazniekkua vaste , kaiken yön šeimittih .A ozuttamah omua neruo laval tuli pajo da tansujoukkuo , yksinästy pajattajua da runoloin sanelijua omas kyläs , Jessoilas , Veškelykses da Pyhärves .
Jogahine pruazniekkah tulluh sai kävvä kaččomahgi priäžäläzen Melliččy-fondan luajittuu Kyläläine-ozutteluu , kudai oli avattu pruazniekkua vaste kylän haldivon talois .Ozuttelus ezitettylöin Priäžän čupun hyvyönluadijoin keskes on nelli nuožarvelästy : L’ubov’ Ponomar’ova , Aleksandr Voglojev , Vladimir Neronov da Marina Sokolova .Oman kylän hyväkse hyö ollah ylen äijän ruattu da nämmis ruadolois hyvin tietäh piiris .
Nuožarveläzien ruado on kiitettävy
карельский: ливвиковское наречие
Новописьменный ливвиковский