Тексты
Вернуться к списку | редактировать | удалить | Создать новый | Статистика | ? Помощь
Сидоркин Валерий. Vienanmeren tilkkujen kaunehuš
Сидоркин Валерий
Vienanmeren tilkkujen kaunehuš
карельский: собственно карельское наречие
Новописьменный севернокарельский
Luovan kollektiivin
alkuhpanijana ta ohjuajana on Karjalan kanšantaiteilija , Pomorjen käsityö -korissuštaitojärješšön jäšen Svetlana Šavirina .Klubi peruššettih Belomorskin piirin kulttuuritalon tiloissa .
Svetlana Iosifovna tahto šäilyttyä ta kehittyä Vienanmeren rannikon perintehellistä tilkkutekniikkua .
– Taitotilkku ta tilkkutyö šynnyttih jo muinaisaikoina , kertou klubin ohjuaja . – Venäjällä še alko kehittyö 1800-luvun puolivälissä , konša tehtahalla valmissettujen puuvillakankahien käyttö leveni . Tilkkutyötä harraššettih piäasiešša talonpoikaisnaiset , kumpaset korissettih täkkijä värikkähistä kankahanpaloista luajituilla kuvijollisilla ornamenttiloilla .Nykyjäh tilkkutyöštä tuli dekoratiivini homma .Šen erikoisuona on perintehellisen tekniikan ta modernisen muotoilun yhisselmä .
Kaiken tämän tulokšena tavalliset palatäkit muututtih käsityömuasterien käsissä koristehellisiksi šeinäpannoiksi ta huonehien korissukšikši .
Šuurien ta pienien panno-kuvien lisäkši Belomorskin tilkkuklubin muasterit luajitah ni omaluatusie naisienpukuja ta niijen ošie , mattoja ta pielukšie , riepukukloja ta kukkasie .
Belomorskilaisien naisien töitä esitettih monissa festivaliloissa , kilpailuissa ta näyttelyissä .Ne jo ammuin šuatih luajua tunnuššušta kanšantaijon harraštajien kešen .
Nyt Loskutok-klubissa toimiu 15 naista .Hyö rikeneh pietäh muasteri-oppija eri-ikäsillä ihmisillä šekä kuntoutuš - ta sosialiturvakeškukšen lapšilla , šekä ošallissutah erilaisih kanšantaijon projektiloih .
Käsityötalon Jokahini tilkku on pala onnie -näyttelyššä belomorskilaiset käsityömuasterit esitettih yli 70 taitotyötäh .Jo enšimmäiseššä šalissa kävijien huomijuo kiinittäy näyttelyn šuurin , melkein koko šeinän kokoni Šielun musiikki -panno-kuva .Yhteistyönä šyntynyt tevoš on kerätty 520 värikkähäštä tilkušta .Muasterit luotih šitä kakši vuotta .
Jokahisella esitetyllä šuurella ta pienellä pannolla on oma temaattini nimi .Täššä muutoma niistä : Elävä vesi , Muan vartija , Šykyšyn simfonija , Kirkaš tähtini , Talvi eläy mökissä , Tuuli pohjosešta , Päivän alku .Panno-kuvien kokonaisutta täyvennetäh tilkkutöillä korissetut naisienpuvut , matot , pielukšet , kuklat ta kukkaset .
Oraškuun alušša belomorskilaisien tilkkutyömuasterien töitä esitettih Moskovan Gostinii Dvor -näyttelykeškukšešša , missä Venäjän šielu -festivalin rajoissa piettih kanšantaijon näyttely .Petroskoin näyttelyšalissa 16. heinäkuuta – 16. elokuuta järješšetäh vielä yksi Loskutok-klubin näyttely .
Jokahini tilkku on pala onnie -näyttelyh voit tuttavuštuo Karjalan kanšantaijon ta kulttuurialottehien keškukšen käsityötalošša 29. oraškuuta šuaten .
Vienanmeren tilkkujen kaunehuš
карельский: собственно карельское наречие
Новописьменный севернокарельский